Fuɗɗoode 6 - Dewtere Laamɗo Fulfulde Burkina Faso

No ɓerɗe yimɓe poti ɓawlude

¹ Nde yimɓe puɗɗunoo heewude ley adunaaru de ndimi ɓiɓɓe rewɓe ndeen,

² ɓiɓɓe Laamɗo nji'i no ɓiɓɓe rewɓe ɓeen ŋarɗiri. Ɓe cuɓii ley ɓeen ɓe ɓe njiɗi, ɓe ndewli ɗum'en.

³ Ndeen Joomiraaɗo wi'i: — Ruuhu am heddataako e neɗɗo faa abada, sabo wo teewu tan. Duuɓi muuɗum paltataako 120 katin.

⁴ Ley jamaanu oon, e caggal muuɗum fu, tagaako mawko ina ngonnoo ley adunaaru. Sabo wo ɓiɓɓe Laamɗo kawriti e ɓiɓɓe tagaaɓe rewɓe de ndimdi e muɓɓen. Ɓeen ngoni worɓe jom'en semmbe ɓe inɗe anndeeɓe ley jamaanuuji ɗiin.

Haala ilam tuufaanu

⁵ Joomiraaɗo yi'i no ɓerɗe yimɓe poti ɓawlude ley adunaaru, e no miilooji bonɗi tan keewiri ley ɓerɗe muɓɓen wakkati fuu.

⁶ Joomiraaɗo mimsiti ko tagannoo neɗɗo ley adunaaru. Ɓernde muuɗum metti sanne.

⁷ Ndeen o wi'i: — Mi fiɗɗan yimɓe ɓe tagumi ɓeen e adunaaru, kamɓe e kulle mawɗe e pamare e ladooje e leydi e pooli piirooji fuu, sabo mi mimsitii ko tagannoomi ɗum'en.

⁸ Ammaa Nuuhu kaa heɓii moƴƴere yeeso Joomiraaɗo.

⁹ Inan kabaaru Nuuhu e ɓiɓɓe muuɗum. Nuuhu wo gorko ponnditiiɗo mo walaa feloore e hakkunde yimɓe jamaanu muuɗum. O jokkii laabi Laamɗo.

¹⁰ O rimi ɓiɓɓe worɓe tato, ɓeen ngoni: Saam e Haam e Yaafet.

¹¹ Adunaaru heewi bonde yeeso Laamɗo, darngal heewi e mayru.

¹² Laamɗo yi'i no adunaaru nduun foti bonde, sabo yimɓe wonɓe e mayru fuu njokkii laabi oonyiiɗi.

¹³ Laamɗo wi'i Nuuhu: — Timmoode ko tagunoomi ɗuum fuu yottake, sabo yimɓe kebbinirii adunaaru e bonde muɓɓen. Si goonga, mi fiɗɗan ɓe ley adunaaru ndu.

¹⁴ Kooƴaa leɗɗe Gofir, moƴƴinanaa hoore maa laana mawka. Ngaɗaa cuuɗi ley makka, takkiraa ceeki makka ɗiin taari, dow e ley fuu.

¹⁵ Inan no moƴƴinirtaa ka: Njuuteefi makka laatoo piyanɗe 300, njaajeefi makka laatoo piyanɗe 50, tooweefi makka du laatoo piyanɗe 30.

¹⁶ Ngaɗaa feneetere e wecco makka nde njuuteefi muuɗum wo fiyande wootere. Ngaɗaa dammbugal laana kaan dow wecco makka. Ngaɗanaa ka cuuɗi leyiiji e hakkundeeji e dowuuji.

¹⁷ Miin du, mi waddan ilam tuufaanu e adunaaru faa mi halka ko wuuri, ko foofata fuu. Ko woni e adunaaru ndu fuu halkan.

¹⁸ Ammaa mi tabintinan amaana am e maaɗa. A naatan laana kaan, aan e ɓiɓɓe maaɗa worɓe e jom suudu maa e deekiraaɓe ɓiɓɓe maaɗa.

¹⁹ Ko wuuri fuu, nannaa ɗum'en ley laana kaan, ɗiɗi ɗiɗi, gorel e dewel faa keddodoo e maaɗa.

²⁰ Pooli e siyiiji muɓɓen, daabaaji e siyiiji muɓɓen, ko ladata fuu e siyiiji muɓɓen, ɗiɗi ɗiɗi ngara to maa faa keddoo de kisa.

²¹ Kooƴanaa hoore maa sii neema fuu, ndesaa faa laatane aan e majji fuu nyaamdu.

²² Nuuhu waɗiri noon pay, o waɗi ko Laamɗo yamiri ɗuum fuu.