Fuɗɗoode 48 - Dewtere Laamɗo Fulfulde Burkina Faso

No Yaakuuba barkiniri Efrayim e Manasa

¹ Balɗe njehi ngarti, Yuusufi wi'aa bammum sellaa. Ndelle o yaadi e ɓiɓɓe makko ɗiɗo, Manasa e Efrayim.

² Yaakuuba haalanaa: «Inan ɓiya Yuusufi warii faa yi'e». Israa'iila tinnitii, ummii, jooɗii dow daɗɗo muuɗum.

³ Yaakuuba wi'i Yuusufi: — Laamɗo Jom Baawɗe ɓanganii kam Luus ley leydi Kanaana. O barkini kam,

⁴ o wi'i kam: «Mi hokkete ɓeyngu, mi yaajinan suudu maa, mi ɗuuɗinan lenyol maa faa ngol laatoo siyiiji yimɓe heewɓe. Caggal ma, mi hokkan ƴuwdi maa leydi ndii, ɓe njeyta ndi faa abada.»

⁵ Joonin le, Efrayim e Manasa, ɓiɓɓe maa ɗiɗo ɓe keɓuɗaa ley leydi Misira gilla mi waraay to maa ɓeen laatoto ɓe njeymi hono ɓiɓɓe am Ruben e Simeyon noon.

⁶ Ammaa ɓiɓɓe ɓe keɓuɗaa caggal maɓɓe ɓeen, wo aan jeyi. Ɓe ndonan leydi dow innde mawniraaɓe maɓɓe Efrayim e Manasa.

⁷ Miin kaa, nde ƴuurunoomi Padan-Aram ndeen, Rahiina inna ma maayii e juuɗe am dow laawol leydi Kanaana. Ɗum waɗii fadde amin e yottaade Efrata. Mooɓumi mo dow laawol Efrata toon, ɗuum woni Baytilaama.

⁸ Israa'iila yi'i ɓiɓɓe Yuusufi ɓeen de wi'i: — Ɓee wo ɓeye?

⁹ Yuusufi jaabii bammum, wi'i: — Ɓe wo ɓiɓɓe am, ɓe Laamɗo hokki kam ɗo. O jaabii, o wi'i: — Ɓattin ɓe faa mi barkina ɓe.

¹⁰ Tawi o naywii faa gite makko cuddii. Nde Yuusufi ɓattinnoo ɓe o ndeen, o mumilii ɓe, o muccii ɓe.

¹¹ Caggal ɗuum, Israa'iila wi'i Yuusufi: — Mi miilaayno yalla mi yi'an yeeso maa katin, de inan Laamɗo waɗii faa mi yi'ii ɓeyngu maa du.

¹² Yuusufi itti ɓe dow koppi muuɗum, hofii, de hippi yeeso muuɗum e leydi.

¹³ Ndeen Yuusufi nanngi ɓe ɓe ɗiɗo fuu, Efrayim e junngo muuɗum nyaamo, faro nano Israa'iila, Manasa du e junngo muuɗum nano, faro nyaamo Israa'iila. O ɓattini ɓe Israa'iila.

¹⁴ Israa'iila foorti junngo mum nyaamo, yowi dow hoore Efrayim, fay ko oon laatii minyiiwo ɗuum fuu, nano muuɗum ngoon du dow hoore Manasa. O falondiri juuɗe makko dow ko'e maɓɓe sabo Manasa woni mawniiwo.

¹⁵ O barkini Yuusufi e ƴuwdi muuɗum, o wi'i: — Laamɗo mo baabiraaɓe am Ibrahiima e Isiyaaka njokkunoo oon, reenii kam ley nguurndam am fuu.

¹⁶ Maleyka kisinɗo kam e sii torra fuu, barkina sukaaɓe ɓee. Innde am e innde saaraaɓe am Ibrahiima e Isiyaaka, keddoo saabe maɓɓe. Ɓe ɗuuɗa faa ɓe keewa ley adunaaru.

¹⁷ Nde Yuusufi yiinoo bammum yowii junngo mum nyaamo dow hoore Efrayim fu, mettaa. O nanngi ngo faa o itta dow hoore Efrayim, o yowa ngo dow hoore Manasa.

¹⁸ Yuusufi wi'i bammum: — Wanaa noon baaba, sabo o woni afo. Yowu nyaamo maa dow hoore makko.

¹⁹ Baabiiko salii, wi'i: — Miɗo anndi ɗum Yuusufi, miɗo anndi ɗum. Kanko du o laatoto lenyol, o laatoto du tedduɗo. Ammaa minyiiko oon ɓuran mo teddeengal, ƴuwdi muuɗum du laatoto lenyi keewɗi.

²⁰ Nyannde ndeen o barkinii ɓe, o wi'i: — Saabe mooɗon yimɓe Israa'iila ndu'oto, mbi'a: «Laamɗo waɗe hono Efrayim e Manasa»! Noon Yaakuuba ardiniri Efrayim dow Manasa.

²¹ Israa'iila wi'i Yuusufi: — Inan miɗo maaya. Ammaa Laamɗo wondan e mooɗon, o soƴƴinan on leydi baabiraaɓe mon.

²² Katin du mi hokkii ma leydi Sikem, ngeɗu ɓurngu sakiraaɓe maa, wo ndi leydi Amorinkooɓe ndi teetirmi kaafaahi e laanyal am.