Fuɗɗoode 47 - Dewtere Laamɗo Fulfulde Burkina Faso

¹ Yuusufi yehi humpitowi Fira'awna, wi'i: — Baaba am e sakiraaɓe am e dammuuli muɓɓen e na'i muɓɓen e ko ɓe njogii fuu ƴuwii leydi Kanaana, ngarii. Iɓe toon ley leydi Goosan.

² Yuusufi adi hakkunde sakiraaɓe muuɗum ɓeen yimɓe njoyo, darni ɓe yeeso Fira'awna.

³ Fira'awna wi'i sakiraaɓe makko ɓeen: — Ɗume woni gollal mon? Ɓe njaabii Fira'awna, ɓe mbi'i: — Maccuɓe maa wo durooɓe, minen e baabiraaɓe amin fuu.

⁴ Min ngarii wo min yananɓe ley leydi maa, sabo dammuuli maccuɓe maa ngalaa durduɗe, rafo sattii ley leydi Kanaana. Joonin miɗen ŋaare, njardoɗaa maccuɓe maa njooɗoo ley leydi Goosan.

⁵ Fira'awna haaldi e Yuusufi, wi'i: — Bammaa e sakiraaɓe maa ngarii to maaɗa.

⁶ Leydi Misira ina woni yeeso maa. Honnu ɓe ley leydi ɓurndi woodde. Ɓe koɗa ley leydi Goosan. Si aɗa anndi waawɓe gollal durngol ina ngoni hakkunde maɓɓe fu, ngaɗaa ɗum'en hooreeɓe durooɓe daabaaji am.

No Yaakuuba e ɓiɓɓe muuɗum kawriri e Fira'awna

⁷ Yuusufi waddi bammum Yaakuuba, yaari ɗum yeeso Fira'awna. Yaakuuba barkini Fira'awna.

⁸ Fira'awna ƴami Yaakuuba wi'i: — Duuɓi maa wo foti?

⁹ Yaakuuba jaabii Fira'awna, wi'i: — Duuɓi am wo 130. Mi wuurdii egga-hoɗa. Duuɓi am seeɗa ɗi du, mi wuurii ɗi ley tiiɗalla. Mi heɓaay duuɓi ɗi maamiraaɓe am mbuuri ley egga-hoɗa muɓɓen ɗiin.

¹⁰ Yaakuuba barkini Fira'awna, de waynii ɗum.

¹¹ Yuusufi honni bammum e sakiraaɓe muuɗum, hokki ɗum'en laamoo ɗo ɓuri fuu wooɗude e leydi Misira, ley leydi Ramses hono no Fira'awna yamirnoo noon.

¹² Yuusufi hokki bammum e sakiraaɓe muuɗum e koreeji muɓɓen nguurey fodde no sukaaɓe muɓɓen poti.

¹³ Tawi nyaamdu walaa ley leydi ndiin fuu, sabo rafo ngoon sattii sanne. Leydi Misira e leydi Kanaana fuu tampii rafo sanne.

¹⁴ Yuusufi hawrondini ceede tawaaɗe Misira e tawaaɗe Kanaana ɗe ɓe coodiri nguurey ɗeen fuu. Yuusufi waddi ceede ɗeen suudu Fira'awna laamordu.

¹⁵ Nde ceede timmunoo leydi Misira e leydi Kanaana ndeen, Misirankooɓe fuu ngari to Yuusufi, mbi'i: — Hokku min nguurey. Ndelle min maayan yeeso maa saabe min ngalaa ceede katin naa?

¹⁶ Yuusufi wi'i: — Si on ngalaa ceede, ngaddee daabaaji mon de mi hokka on nyaamri.

¹⁷ Ɓe ngaddi daabaaji maɓɓe to Yuusufi, pucci e dammuuli e na'i e araaji, de kam du hokki ɓe nguurey. Hitaande ndeen ɓe kokki mo daabaaji maɓɓe fuu faa ɓe keɓa nguurey.

¹⁸ Ko hitaande ndeen faltii, hitande jokkunde ndeen, ɓe ngarti to makko, ɓe mbi'i: — Ceede amin timmii, min mbaawaa suuɗude ɗum joomii amin. Daabaaji amin du fuu ngartii e juuɗe maa, min ngalaa fuu ko min kokke si wanaa ko'e amin e leydi amin.

¹⁹ Yalla min maayan yeeso maa naa? Leydi amin wanaa faa'e. Coodaa min minen e leydi amin ndiin fuu, de kokkaa min nguurey. Min laatoo maccuɓe Fira'awna, o hawjoo leydi amin ndiin du. Hokku min aawdi faa min mbuura, taa min maaya, taa leydi amin laatoo ɓoldi.

²⁰ Yuusufi soodani Fira'awna leydi Misira fuu, sabo Misirankooɓe fuu connii gese muɓɓen, no rafo ngoon sattiri. Leydi ndiin laatii halal Fira'awna.

²¹ Ammaa yimɓe ɓeen, o eggini ɗum'en njooɗowii ley kuɓeeje, faa keeri Misira fuu.

²² O soodi leydi ndiin fuu. Leydi almaami'en tan woni o soodaay. Sabo nguurey almaami'en ɓeen wo to Fira'awna woni. Ɓe mbuurdi e nguurey mo Fira'awna hokki ɓe oon, ɗum waɗi de ɓe connaay gese maɓɓe.

²³ Ndeen Yuusufi wi'i yimɓe ɓeen: — Hannden onon e gese mon fuu on laatake jeyal Fira'awna. Inan aawdi mooɗon. Aawee gese ɗeen.

²⁴ Wakkati tayri on kokkan Fira'awna joorde joyaɓerde. Geɓe nay keddiiɗe ɗeen laatanoo on aawdi e nyaamri, onon e wonɓe ley cuuɗi mon e sukaaɓe mon fuu.

²⁵ Ɓe mbi'i: — A dannii yonkiiji amin. Min keɓii moƴƴere yeeso joomii amin, min laatoto maccuɓe Fira'awna.

²⁶ Yuusufi waɗi ɗum yamiroore ley leydi Misira gilla ndeen faa warde hannden: Joorde tayri joyaɓerde fuu wo Fira'awna jeyi. Leydi almaami'en ndiin tan woni ndi laatanaaki Fira'awna.

²⁷ Ɓiɓɓe Israa'iila du koɗi leydi Misira nder leydi Goosan. Ɓe keɓi toon jawdi, ɓe ndimi, ɓe keewi sanne.

²⁸ Yaakuuba wuuri ley leydi Misira duuɓi 17. Duuɓi ɗi Yaakuuba wuuri fu wo duuɓi 147.

²⁹ Nde Israa'iila ɓadinoo maayde ndeen, noddi ɓiyum Yuusufi, wi'i ɗum: — Si aɗa yardii fu, wattu junngo maa ley busal am de kunanoɗaa kam, ngoonɗinaa a waɗanan kam hinney, a mooɓataa kam ley leydi Misira.

³⁰ Ammaa mooɓowaa kam ɗakkol baabiraaɓe am. Mburtinaa kam Misira, kooraa kam ley caabeeje maɓɓe, mooɓaa kam toon. Yuusufi wi'i: — Mi waɗiran hono no mbiiruɗaa noon.

³¹ Yaakuuba wi'i: — Hunanam! Yuusufi hunanii mo. Israa'iila sujidi dow hoore daɗɗo muuɗum.