Fuɗɗoode 46 - Dewtere Laamɗo Fulfulde Burkina Faso

No Yaakuuba e koreeji muuɗum ngardi Misira

¹ Israa'iila eggidi e ko mari fuu. O yottii Beerseba, ɗoon o waɗani Laamɗo baabiiko Isiyaaka kirsamaaji.

² Laamɗo haaldi e Israa'iila ley koyɗol jemma majjum, wi'i: «Yaakuuba! Yaakuuba!» Yaakuuba nootii, wi'i: — Inani kam.

³ Laamɗo wi'i: — Miin woni Laamɗo, miin woni Laamɗo bammaa. Taa hulu yaade Misira, sabo wo toon ɗuuɗinanmi ƴuwdi maaɗa.

⁴ Mi yaadan e maa Misira, mi wurtinoyte du. Si a maayii du, wo juuɗe Yuusufi pay culmata gite maaɗa de mooɓe.

⁵ Yaakuuba ummii Beerseba. Ɓiɓɓe Israa'iila nanni baaba muɓɓen Yaakuuba e ɓiɓɓe muɓɓen e rewɓe muɓɓen ley torkooji ɗi Fira'awna neldi ngadda ɗum'en ɗiin.

⁶ Ɓe kooƴi daabaaji maɓɓe e jawdi maɓɓe ndi ɓe keɓunoo ley leydi Kanaana. Yaakuuba yehi Misira, kam e koreeji muuɗum fuu.

⁷ O dillidi e ɓiɓɓe makko worɓe e taaniraaɓe makko worɓe e ɓiɓɓe makko rewɓe e taaniraaɓe makko rewɓe e koreeji makko fuu faa ɓe njottii leydi Misira.

⁸ Inan ɓiɓɓe Israa'iila warɓe Misira, ɗum woni Yaakuuba e ɓiɓɓe muuɗum. Afo Yaakuuba wo Ruben.

⁹ Inan ɓiɓɓe Ruben worɓe: Henok e Pallu e Hesron e Karmi.

¹⁰ Ɓiɓɓe Simeyon worɓe wo: Yemu'el e Yamin e Ohada e Yakin e Sohar e Sawulu, ɓii Kanaaninke debbo.

¹¹ Ɓiɓɓe Lewi worɓe wo: Gerson e Kehat e Merari.

¹² Ɓiɓɓe Yahuuda worɓe wo: Er e Onan e Sela e Peres e Jerak. Ammaa Er e Onan maayii leydi Kanaana. Ɓiɓɓe Peres worɓe: Hesron e Hamul.

¹³ Ɓiɓɓe Isakar worɓe wo: Tola e Puwa e Yoba e Simron.

¹⁴ Ɓiɓɓe Jabulon worɓe wo: Sered e Elon e Yahalel.

¹⁵ Ɓeen ngoni ɓiɓɓe Leya worɓe ɓe o rimdi e Yaakuuba nde ɓe ngonnoo Padan-Aram, kamɓe e Dina ɓiyiiko debbo. Ɓiɓɓe e taaniraaɓe ɓe Yaakuuba heɓidi e deekum Leya ɓeen fuu wo 33 worɓe e rewɓe.

¹⁶ Ɓiɓɓe Gad worɓe wo: Jifiyon e Haggi e Suni e Esbon e Eri e Arod e Areeli.

¹⁷ Ɓiɓɓe Aser wo: Yimna e Yiswa e Yiswi e Beriya e Seera, sakiike maɓɓe debbo. Ɓiɓɓe Beriya worɓe wo: Heber e Malkiyel.

¹⁸ Ɓeen ngoni ɓiɓɓe Jilpa mo Laban hokkunoo ɓiyum Leya, ɓeen Jilpa rimani Yaakuuba. Ɓe fuu wo ɓe 16.

¹⁹ Ɓiɓɓe Rahiina dee Yaakuuba, worɓe wo: Yuusufi e Benjamin.

²⁰ Ɓiɓɓe Yuusufi worɓe rimaaɓe leydi Misira ɓeen wo: Manasa e Efrayim. Wo Asanata, ɓii Potifera almaami wuro Ona oon rimani ɓe Yuusufi.

²¹ Ɓiɓɓe Benjamin worɓe wo: Bela e Beker e Asbel e Geera e Na'aman e Eki e Roos e Muppim e Huppim e Arda.

²² Ɓiɓɓe e taaniraaɓe ɓe Yaakuuba heɓidi e deekum Rahiina ɓeen fuu wo 14.

²³ Ɓii Dan gorko wo Husim.

²⁴ Ɓiɓɓe Naftali worɓe wo: Yassiyel e Guni e Yeser e Sillem.

²⁵ Ɓeen ngoni ɓiɓɓe Bilha mo Laban hokkunoo ɓiyum Rahiina. Ɓeen Bilha rimani Yaakuuba. Ɓe fuu wo ɓe njeɗɗo.

²⁶ Ɓiɓɓe e taaniraaɓe Yaakuuba, yaaduɓe e muuɗum Misira, fuu wo yimɓe 66, deekiraaɓe ɓiɓɓe muuɗum worɓe limaaka.

²⁷ Ɓiɓɓe Yuusufi worɓe rimaaɓe Misira wo ɗiɗo. Yimɓe suudu Yaakuuba yottiiɓe Misira fuu wo 70.

²⁸ Yaakuuba neli Yahuuda ardoo yaha to Yuusufi, faa Yuusufi sappoo ɗum laawol Goosan. Nde Yaakuuba e koreeji muuɗum njottinoo leydi Goosan ndeen,

²⁹ Yuusufi segilii torkooru pucci muuɗum, yehi faa jakkitowoo bammum Goosan toon. Nde o yi'unoo ɗum ndeen, o mumilii ɗum, o woyi faa ɓooyi.

³⁰ Israa'iila wi'i Yuusufi: — Joonin miɗo waawi maayude, sabo mi yi'ii yeeso maa, mi faamii aɗa wuuri.

³¹ Yuusufi haalani mawniraaɓe muuɗum worɓe e yimɓe suudu bammum fuu, wi'i: — Mi yahan mi haalanowa Fira'awna haala mon, mi wi'a ɗum: «Sakiraaɓe am, yimɓe suudu baaba am wonnooɓe leydi Kanaana ɓeen ngartii ɗo am ɗoo.

³² Worɓe ɓeen wo durooɓe daabaaji, margol woni gollal muɓɓen. Ɓe ngaddii be'i maɓɓe e baali maɓɓe e na'i maɓɓe e ko ɓe njogii fuu.»

³³ Si Fira'awna noddii on, ƴamii on ɗume woni golleeji mon fu,

³⁴ mbi'on: «Minen maccuɓe maa, wo min ekintinaaɓe durngol gilla cukaaku amin faa warde joonin, minen e baabiraaɓe amin fuu.» Noon keɓirton jooɗaade ley leydi Goosan, sabo durooɓe dammuuli fuu wo tuunɓe yeeso Misirankooɓe.