Fuɗɗoode 45 - Dewtere Laamɗo Fulfulde Burkina Faso

No Yuusufi anndintiniri hoore mum sakiraaɓe muuɗum

¹ Nde Yaahuuda timminoo haalude ndeen, Yuusufi waawanaay ɓernde muuɗum yeeso yimɓe fiiliiɓe ɗum ɓeen. O feekii, o wi'i: — Mbuurtinee yimɓe fuu! Ndelle fay gooto e battaa'en ɓeen tawaaka ɗoon nde Yuusufi anndintinannoo sakiraaɓe muuɗum ɓeen hoore mum ndeen.

² O wulli bojji cattuɗi faa Misirankooɓe nani, yimɓe ɓaade Fira'awna du nani.

³ O wi'i sakiraaɓe makko ɓeen: — Miin woni Yuusufi. Yalla baaba am ina wuuri naa? Ammaa sakiraaɓe makko ɓeen mbemmbaa yeeso makko faa ndonki jaabaade.

⁴ Yuusufi wi'i sakiraaɓe muuɗum ɓeen: — Miɗo ŋaaroo on, ɓattitee kam! Ɓe ɓattitii. Ndeen o wi'i: — Miin woni Yuusufi, sakiike mon mo coottuɗon faa yaaree Misira oon.

⁵ Ammaa joonin, taa pelee ko'e mooɗon, taa mbemmbeɗon saabe ko coottuɗon kam ɗuum. Wo Laamɗo ardini kam on faa mi danna on.

⁶ Gilla duuɓi ɗiɗi rafo ina woni ley leydi. Duuɓi joy garooji ɗiin du aawataake, taƴataake.

⁷ Laamɗo neli kam yeeso mon ley leydi ndi faa mi hisina on, onon e ɓiɓɓe mooɗon, kisindam mawɗam.

⁸ Wanaa onon neli kam gaa, wo Laamɗo. O waɗii kam baaba Fira'awna e jom ɓaade muuɗum fuu. O laaminii kam dow leydi Misira fuu.

⁹ Joonin le, kootee to baaba am law, mbi'on ɗum: «Ɓiya Yuusufi wi'i: Laamɗo waɗii kam kaananke Misira fuu. War to am, taa hannda.

¹⁰ A hoɗan ley leydi Goosan, tawa aɗa ɓadii kam, aan e ɓiɓɓe maa e taaniraaɓe maa e dammuuli maa e na'i maa e jawdi maa fuu.

¹¹ Mi jogete, aan e ɓaade maaɗa, e jeydaaɗo maa fuu, faa taa ɓilloɗon, sabo rafo ngo heddoto faa waɗa duuɓi joy katin.»

¹² On njiirii gite mon, onon e minyam Benjamin fuu, wo miin jaati haaldata e mooɗon.

¹³ Kumpitee baaba am no potumi teddeengal ley Misira e ko nji'uɗon fuu. Njehee law, ngaddowon baaba am oon.

¹⁴ Kanko e Benjamin sakiike makko oon, ɓe mumlondiri, ɓe mboyi.

¹⁵ O muccii sakiraaɓe makko ɓeen fuu, o woyi e juuɗe maɓɓe. Caggal ɗuum ɓe njeewtidi e makko.

No sakiraaɓe Yuusufi kootiri

¹⁶ Ɓaade Fira'awna fuu nani kabaaru garol sakiraaɓe Yuusufi ɓeen. Ɗum weli Fira'awna e gollanooɓe ɗum fuu.

¹⁷ Fira'awna wi'i Yuusufi: — Inan ko mbi'ataa sakiraaɓe maa ɓeen: «Ndimndee araaji mon, njeccee leydi Kanaana.

¹⁸ Ngardowon e baabii on e koreeji mon to am. Mi hokkan on to ɓuri wooɗude e leydi Misira fuu. On nyaaman ko ɓuri welde ley leydi ndii.»

¹⁹ Inan ko njamirammaami mbi'aa ɓe katin: «Kooƴee torkooji ley leydi Misira, ngaddirowon sukaaɓe mon e rewɓe mon e baabii on faa ɗoo.

²⁰ Taa mimsitee ko njoppoton toon ɗuum, sabo on keɓan ko ɓuri fuu wooɗude ley leydi Misira.»

²¹ Ɓiɓɓe Israa'iila ngaɗiri noon. Yuusufi hokki ɓe torkooji fodde yamiroore Fira'awna. O hokki ɓe njooɓaari du.

²² O hokki mono e maɓɓe fuu kaddule kese de Benjamin kaa, o hokki ɗum buuɗi cardi 300 e kaddule kese joy.

²³ Inan ko o neldi baabiiko: gorbi sappo dimndaaɗi kulle ɓurɗe fuu woodde ley Misira. O neldi ɗum araaji debbi sappo dimndaaɗi alkama, buuru e nyaamduuji faa baabiiko heɓa ko yooɓoo.

²⁴ Ndeen o waynondiri e sakiraaɓe makko, de wakkati ndillannoo, o wi'i ɓe: «Taa ngaɗon kalala dow laawol!»

²⁵ Ɓe ndilli Misira, ɓe kooti leydi Kanaana to baabiiɓe Yaakuuba.

²⁶ Ɓe mbi'i ɗum: — Yuusufi ina wuuri! Wooɗi, wo kam jaati laamii leydi Misira fuu! Ammaa ɓernde Yaakuuba dimmbaaki sabo o hoolaaki haala maɓɓe.

²⁷ Ndeen ɓe kaaltani mo haalaaji ɗi Yuusufi haali fuu. O yi'i du torkooji ɗi Yuusufi neldi faa kooƴa mo ɗiin. Ndeen hakkillo makko waaltii.

²⁸ O wi'i: — Mi jaɓii, ɓiyam Yuusufi ina wuuri! Mi yahan, mi yi'owa mo gilla mi maayaay.