Fuɗɗoode 42 - Dewtere Laamɗo Fulfulde Burkina Faso

No Yaakuuba neliri ɓiɓɓe muuɗum Misira

¹ Nde Yaakuuba maatunoo nguurey ina heɓee leydi Misira fu, wi'i ɓiɓɓe muuɗum: — Ko waɗi de oɗon njooɗii oɗon ndaarondira?

² O wi'i: — Mi nanii nguurey ina woni Misira. Njehee, coodanowee en nguurey heɓa mbuuren, taa maayen rafo.

³ Sakiraaɓe Yuusufi sappo ɓeen njehi Misira faa coodowa neema.

⁴ Ammaa Yaakuuba accaay Benjamin, minyoo Yuusufi oon yaadi e maɓɓe. Sabo o wi'i ina hasii si oon yehii fu, masiiba hewtan ɗum.

⁵ Ɓiɓɓe Israa'iila ngardi e woɓɓe warɓe faa cooda, sabo rafo waɗii ley leydi Kanaana ndiin fuu.

Jiidal Yuusufi e sakiraaɓe muuɗum

⁶ Yuusufi laatii hooreejo leydi Misira, wo kam sonnirta yimɓe leydi ndiin fuu nguurey. Sakiraaɓe makko ɓeen ngari cujidani mo.

⁷ Nde Yuusufi yi'unoo mawniraaɓe muuɗum ɓeen fu, annditi ɗum'en, ammaa o waɗi hono o anndaa ɓe. O wi'i ɓe: — Toy ƴuuruɗon? Ɓe njaabii mo, ɓe mbi'i: — Leydi Kanaana min ƴuwi. Min ngarii faa min cooda nguurey.

⁸ Yuusufi annditi sakiraaɓe muuɗum, ammaa ɓeen annditaay mo.

⁹ Ndeen Yuusufi miccitii koyɗi ɗi hoyɗunoo dow maɓɓe ɗiin, de wi'i ɓe: — Onon, wo on horooɓe leydi, on ngarii faa ndaaron lokkaaku leydi ndi.

¹⁰ Ɓe njaabii, ɓe mbi'i: — Joomii amin, wanaa noon! Maccuɓe maa wo ngaru faa cooda nyaamri.

¹¹ Min fuu, wo min baaba gooto, miɗen koolnii. Minen maccuɓe maa, min nganaa horooɓe leydi.

¹² O jaabii ɓe, o wi'i: — A'aa, on penan! Wo horude lokkaaku leydi ndi ngaranɗon.

¹³ Ɓe njaabii, ɓe mbi'i: — Minen maccuɓe maaɗa ɓeen, wo min sakiraaɓe sappo e ɗiɗo ɓe baaba gooto. Baaba amin na woni ley leydi Kanaana. Koddaajo amin oon ina toon hannden to baaba amin de gooto amin du heddaaki.

¹⁴ Yuusufi jaabii, wi'i: — Ɗuum saabii de mbi'umi wo on horooɓe.

¹⁵ Inan no ndaartindortoomi on: Mi hunorake yonki Fira'awna, on njaltataa ɗo si koddaajo mooɗon oon waraay.

¹⁶ Nelee gooto mooɗon yaha waddowa mo. Onon heddiiɓe ɓeen, on uddete ley kasu faa nde laaɓowi haalaaji mon ɗiin wo goonga. Si on ngaɗaay noon fu, mi hunorake yonki Fira'awna wo on horooɓe.

¹⁷ O watti ɓe, ɓe fuu ley kasu faa waɗi balɗe tati.

¹⁸ Nyannde tataɓerde ndeen, Yuusufi wi'i ɓe: — Inan no ngaɗoton de mbuuron, sabo miin wo mi kuloowo Laamɗo.

¹⁹ Si on goongalaaɓe fu, gooto mon heddoo ley kasu ɗoo. Heddiiɓe ɓeen njaarana yimɓe mon yolbuɓe ɓeen nyaamri.

²⁰ Ngaddanowee kam minyii on oon, faa ngoonɗinon haalaaji mon ɗiin de kison maayde. Ɓe ngaɗiri noon.

²¹ Ɓe mbi'ondiri: — Kaari! Junuuba yowake dow men saabe minyii en mo ngattunoɗen e torra oon. Imo ŋaaronoo en njurmoɗen o ammaa en kettindanaaki o. Wo ɗuum saabii de torra o hewtii en.

²² Ruben wi'i ɓe: — Wanaa mi wi'iino on taa ngaɗon suka oon ko boni naa? De on njaɓaay. Ndelle joonin, ƴiiƴam makko ina woni dow meeɗen.

²³ Ɓe paamaay Yuusufi ina nana ko ɓe kaalata ɗuum, sabo nantinoowo wonnoo hakkunde maɓɓe.

²⁴ Yuusufi dilli woɗɗii ɓe faa woya. Caggal ɗuum o warti, o haaldi e maɓɓe. O nanngi Simeyon, o haɓɓi ɗum yeeso maɓɓe.

Haala yeccagol sakiraaɓe Yuusufi Kanaana

²⁵ Caggal ɗuum, Yuusufi yamiri gooto maɓɓe fuu bootooru muuɗum hebbinee nguurey de ceede muuɗum ngattee ley toon. Wooɗi du ɓe kokkee njooɓaari. Noon o waɗani ɓe.

²⁶ Ndeen ɓe ndimndi alkama oon dow araaji maɓɓe, ɓe ndilli.

²⁷ To ɓe mbaalowi toon, gooto maɓɓe omti bootooru muuɗum faa nyaamna araawa mum. Wakkati oon, o yi'i ceede makko e hunnduko bootooru nduun.

²⁸ O wi'i sakiraaɓe makko: — Ceede am njeccinaama ley bootooru am. Inani ɗe! Ɓerɗe maɓɓe taƴi. Ɓe kuli, ɓe ƴamondiri: «Ɗume woni ko Laamɗo waɗi en ɗuum?»

²⁹ Ɓe njottii leydi Kanaana to baabiiɓe Yaakuuba, ɓe pillanii ɗum ko hewtii ɓe ɗuum fuu. Ɓe mbi'i:

³⁰ — Gorko laamiiɗo leydi oon sattinanii min sanne. O ndaardii min hono wo min horooɓe leydi ndiin.

³¹ Min mbi'i o wo min yimɓe hoolniiɓe. Min mbi'i min nganaa horooɓe.

³² Min mbi'i wo min sappo e ɗiɗo hawtuɓe baaba gooto, ammaa gooto amin heddaaki, wooɗi koddaajo amin du ina heddodii e baaba amin ley leydi Kanaana.

³³ Ndeen gorko laamiiɗo leydi oon wi'i min: «Inan no paamirammi wo on hoolniiɓe: njoppanee kam gooto mooɗon, kooƴanon yimɓe mon yolbuɓe ɓeen nguurey, de kooton».

³⁴ Ngaddonon kam minyii on oon, ndeen mi faaman on nganaa horooɓe, wo on hoolniiɓe. Ndeen mi hokkitan on sakiike mon oon, de kumton haajuuji mon ley leydi ndi.

³⁵ Ɓe puɗɗi yuppude bootooji maɓɓe. Wakkati ɓe njuppannoo ɗi, mono fuu tawi ceede ley bootooru muuɗum! Nde kamɓe e baabiiɓe njiinoo ceede ɗeen fu, ɓe kuli.

³⁶ Baabiiɓe Yaakuuba wi'i ɓe: — On mursinii kam ɓiɓɓe am! Yuusufi heddaaki, Simeyon du heddaaki, de joonin on teetan kam Benjamin du. Wo dow hoore am ɗum fuu ɗum saami.

³⁷ Ndeen Ruben wi'i bammum: — Si mi wartiranaay ma mo fu, mbaraa ɓiɓɓe am ɗiɗo ɓeen. Wattu o e junngo am, mi wartirante o.

³⁸ Oon jaabii, wi'i: — Ɓiyam oon yaadataa e mooɗon. Sabo mawniiko maayii, kanko tan heddii. Si won torra kewtiiɗo mo e laawol ngool fu, ɗum waɗan faa miin jom hoore raneere oo, mi maayda e mettorgal ɓernde.