Fuɗɗoode 40 - Dewtere Laamɗo Fulfulde Burkina Faso

No Yuusufi fiirtiri koyɗi kasunkooɓe ɗiɗo

¹ Caggal ɗuum, gollanooɓe Fira'awna ɗiɗo lutti de ɗuum mettini ɓernde muuɗum. Gooto wo mawɗo hokkooɓe njaram, gooto du wo mawɗo defanooɓe mo.

² Fira'awna ɓernani battaa'en muuɗum ɗiɗo ɓeen, kokkoowo njaram e kokkoowo nyaamdu oon.

³ O yamiri ɓe uddee ley suudu hooreejo kasu, to Yuusufi kasaa toon.

⁴ Hooreejo kasu oon halfini ɓe e juuɗe Yuusufi faa reena ɓe. Battaa'en ɓeen ɓooyii e kasu seeɗa.

Haala koyɗi battaa'en

⁵ Jemma gomma gollooɓe kaananke Misira ɗum woni kokkoowo njaram e defoowo neema koyɗi ley kasu toon. Mono fuu e koyɗol muuɗum. Koyɗol fuu e maanaa muuɗum.

⁶ Nde weetunoo fu, Yuusufi wari to maɓɓe, tawi iɓe ɓalinii.

⁷ O ƴami ɓe wi'i: — Ɗume metti on hannden?

⁸ Ɓe njaabii mo, ɓe mbi'i: — Min koyɗii koyɗi de fay gooto waawaa fiirtude ɗi. Ndeen Yuusufi wi'i ɓe: — Yalla wanaa Laamɗo woni piirtoowo koyɗi naa? Kaalanee kam ɗi!

^9-10 Mawɗo hokkooɓe njaram oon haalani Yuusufi koyɗol muuɗum wi'i: — Mi hoyɗii inaboohi ki liccoy tatoy ina darii yeeso am. Ki waɗi piindi de bukki ɗiin ɓenndi.

¹¹ Miɗo jogii yardude Fira'awna. Kooƴumi bukki inabooje ɗeen, ɓoosumi ɗi ley yardude Fira'awna ndeen, ngattumi nde e juuɗe makko.

¹² Yuusufi wi'i mo: — Inan ko koyɗol ma ngool hollata: Liccoy tatoy koy wo balɗe tati.

¹³ Ley balɗe tati garooje ɗee, Fira'awna ɓantete. O soƴƴinte nokku maa, de kokkaa o yardude e juuɗe makko hono no mboowrunoɗaa noon.

¹⁴ Ammaa miɗo ŋaare, nde keɓtoyɗaa hoore maaɗa fu, miccoɗaa miɗo wondunoo e maaɗa, ngaɗanaa kam moƴƴere, kaaldaa e Fira'awna heɓa mi ƴuwa e nokku oo.

¹⁵ Si goonga, wo mi gaddiraaɗo doole gilla leydi Ibraninkooɓe, wooɗi fay e leydi ndi du, walaa ko ngaɗumi ko hewti mi wattee ley kasu.

¹⁶ Nde mawɗo defooɓe oon yi'unoo Yuusufi fiirtii koyɗol ngool, wooɗi maanaa maggol na wooɗi fu, wi'i: — Miin du, mi hoyɗii. Ley koyɗol ngol nji'umi miɗo ronndii kandeeje tati kebbinaaɗe buuru.

¹⁷ Sii nyaamduuji keewɗi ɗi Fira'awna nyaamata fuu ina ngoni ley hanndeere dowuure ndeen. De pooli ina coppa nder mayre.

¹⁸ Yuusufi jaabii o wi'i: — Inan ko ngol fiirti: Kandeeje tati ɗeen wo balɗe tati.

¹⁹ Ley balɗe tati Fira'awna senndan hoore maa e daande maa. O jorfete e lekki de pooli coppa teewu maaɗa.

²⁰ Nyalaande tataɓerde ndeen ina hawra e nyalaande rimeede Fira'awna. O defani gollooɓe makko ɓeen fuu. O teddini kokkoowo njaram oon e kokkoowo nyaamdu oon hakkunde maɓɓe.

²¹ O soƴƴini mawɗo hokkooɓe njaram oon nokku muuɗum, de fuɗɗiti ina tummba horde njaram e junngo makko katin.

²² Ammaa mawɗo hokkooɓe nyaamdu oon kaa, o haɓɓi ɓoggol e daande muuɗum, o ɓili ɗum hono no Yuusufi fiirtirnoo koyɗol mum ngool noon.

²³ Ammaa kokkoowo njaram oon yeggiti Yuusufi, miccitaaki haalande Fira'awna haala muuɗum.