Fuɗɗoode 4 - Dewtere Laamɗo Fulfulde Burkina Faso

No Kayiinu wardi Haabiila

¹ Aadama wondi e deekum Hawwaa de hooƴi reedu, rimi Kayiinu. Hawwaa wi'i: — Mi heɓii ɓiɗɗo gorko e baawɗe Joomiraaɗo.

² Caggal ɗuum o rimi Haabiila minyoo Kayiinu. Haabiila laatii duroowo dammuuli, Kayiinu du laatii demoowo.

³ Nyannde gomma, Kayiinu ittani Joomiraaɗo sadaka ley ko remi ɗuum.

⁴ Haabiila du suɓii ɓurɗi fayde hakkunde artiiɗi rimeede ley dammuuli muuɗum. Joomiraaɗo jaɓɓii Haabiila e sadaka muuɗum.

⁵ Ammaa o jaɓɓaaki Kayiinu e sadaka muuɗum. Kayiinu ɓerni sanne, ɓalinii.

⁶ Joomiraaɗo wi'i Kayiinu: — Ko waɗi de ɓernuɗaa? Ko ɗume de aɗa ɓalinii?

⁷ Yalla si a waɗii ko wooɗi, a jaabantaake naa? Ammaa si a waɗaay ko wooɗi fu, hakke na woni e dammbugal maaɗa ina doomi ma, ina filoo nanngude ma. De aan kaa, tinnoɗaa njaaloɗaa ɗum.

⁸ Kayiinu haaldi e minyum Haabiila, de ɓe njaadi ley ngesa. Wakkati ɓe ngonnoo ley ngesa ndeen, Kayiinu hippii minyum Haabiila oon, wari ɗum.

⁹ Joomiraaɗo wi'i Kayiinu: — Toy minya Haabiila woni? Kayiinu jaabii, wi'i: — Mi anndaa! Yalla wo miin woni doomoowo minyam oon naa?

¹⁰ Laamɗo wi'i: — Ɗume ngaɗuɗaa? Ƴiiƴam minya oon na wullitoo gilla e leydi faa na hewta kam.

¹¹ Joonin a huɗaama, a riiwaama dow leydi njarndi ƴiiƴam minya ndiin.

¹² Nde ndemoyɗaa ndi du, a heɓataa nafaa e mayri. A laatoto jiilotooɗo mo heɓataa ɗo wona dow mayri.

¹³ Kayiinu wi'i Joomiraaɗo: — Njobdi hakke am ndiin teddii, mi waawataa ndi.

¹⁴ Inan a riiwii kam e leydi ndii hannden, mi suuɗoto, mi dilla yeeso maa. Mi waancoto ley adunaaru. Keɓuɗo kam du fuu waran kam.

¹⁵ Joomiraaɗo wi'i: — Wanaa noon. Neɗɗo fuu barɗo Kayiinu, joomum yomnitete nde jeɗɗi. Joomiraaɗo waɗi maande dow Kayiinu faa kawruɗo e muuɗum fuu taa wara ɗum.

¹⁶ Caggal ɗuum, Kayiinu dilli yeeso Joomiraaɗo, jooɗowii leydi Not lettugal Eden.

Haala ƴuwdi Kayiinu

¹⁷ Kayiinu wondi e deekum, de oon hooƴi reedu, rimi Henok. Kayiinu nyiɓi huɓeere de inndiri huɓeere ndeen innde ɓiyum Henok.

¹⁸ Henok rimi Irad. Irad rimi Mehuya'el. Mehuya'el rimi Metusa'el. Metusa'el rimi Lamek.

¹⁹ Lamek ɓaŋi rewɓe ɗiɗo. Gooto ina wi'ee Aada, ɗiɗaɓo oon ina wi'ee Sila.

²⁰ Aada rimi Jabal, oon woni baaba jooɗiiɓe ley hukumuuji, maruɓe daabaaji.

²¹ Minyiiko ina wi'ee Yuubal. Oon woni baaba fiyooɓe kolli e cereeli fuu.

²² Sila du rimi Tubal-Kayiinu. Oon laatii baylo tafoowo kujje ceeɓuɗe gaɗiraaɗe njamndi mboɗeeri e ɓaleeri fuu. Minyoo Tubal-Kayiinu debbo ina wi'ee Na'ama.

²³ Lamek noddi rewɓe muuɗum, wi'i: Aada e Sila, kettindanee kam, onon rewɓe Lamek, nanee ko kaalammi ɗuum faa wooɗa. Mi warii neɗɗo gomma saabe nawnii kam, mi warii jokolle saabe fiyii kam.

²⁴ Si barɗo Kayiinu fuu yomnitete nde jeɗɗi, ndelle ko Lamek ɗuum yomnitete kile capanɗe jeɗɗi e jeɗɗi.

²⁵ Aadama wondi e deekum katin. Oon rimi ɓiɗɗo gorko, inndiri ɗum Siita. O wi'i: — Laamɗo hokkii kam ɓiɗɗo goɗɗo loomtuɗo Haabiila mo Kayiinu wari oon.

²⁶ Siita du heɓi ɓiɗɗo gorko, inndiri mo Enos. Ndeen yimɓe puɗɗi du'oraade innde Joomiraaɗo.