Fuɗɗoode 35 - Dewtere Laamɗo Fulfulde Burkina Faso

Gartol Yaakuuba Baytila

¹ Caggal ɗuum, Laamɗo wi'i Yaakuuba: — Umma, yahu Baytila, njooɗoɗaa toon de nyiɓanaa kam hirsirde, miin Laamɗo ɓanganɗo ma nde ndoggunoɗaa mawna Isuwa ndeen.

² Yaakuuba wi'i yimɓe galle muuɗum e wonduɓe e muuɗum fuu: — Paɗɗee tooruuji ɗi njogiɗon ɗiin, laaɓinee ko'e mon de mbattiton kaddule.

³ Ummee, njehen Baytila. Toon nyiɓanten Laamɗo sakkirde, sabo o jaabanake kam wakkati ɓillaare. Wooɗi du imo wondi e am e laawol ngol njahammi fuu.

⁴ Ɓe kokki Yaakuuba tooruuji gonɗi e juuɗe maɓɓe ɗiin fuu, e kootonɗe gonɗe e noppi maɓɓe. Yaakuuba uwi ɗum fuu ley lekki mawki gomma na woni ɗakkol Sikem.

⁵ Caggal ɗuum, ɓe eggi. Laamɗo du watti kulol e kuɓeeje piiliiɗe ɓe ɗeen fuu, ɗum waɗi fay gooto tannyaay ɓiɓɓe Yaakuuba ɓeen.

⁶ Yaakuuba e yimɓe muuɗum fuu njottii Luus ɗum woni Baytila, ley leydi Kanaana.

⁷ O nyiɓi toon sakkirde, o inndiri nokku oon Laamɗo Baytila, sabo ɗoon Laamɗo ɓangannoo mo nde o doggunoo mawniiko gorko ndeen.

⁸ Deboora, bammbunooɗo Rebeka oon maayi. Ɓe mooɓi ɗum ɗakkol Baytila ley lekki mawki, de ɓe inndiri ki «lekki gonɗi».

⁹ Nde Yaakuuba ƴuurunoo Padan-Aram ndeen, Laamɗo ɓangi e muuɗum katin, barkini ɗum.

¹⁰ Laamɗo wi'i mo: — Yaakuuba mbi'eteɗaa ammaa a noddirtaake Yaakuuba katin, wo Israa'iila inndirteɗaa. Noon Laamɗo inndiri mo Israa'iila.

¹¹ Laamɗo wi'i mo: — Miin woni Laamɗo Jom Baawɗe. Ndimaa, ɗuuɗaa. Ƴuwdi maa laatoto suudu mawndu. Lenyi keewɗi ƴuwan e maaɗa. Kaanankooɓe du njaltan e maaɗa.

¹² Leydi ndi kokkumi Ibrahiima e Isiyaaka ndiin, mi hokkete ndi. Caggal maa du, mi hokkan ndi ƴuwdi maaɗa.

¹³ Laamɗo ɓantii dow de woɗɗii nokkuure to haaldi e makko toon.

¹⁴ Yaakuuba darni hayre nokku ɗo ɓe kaaldi ɗoon. O joori nebbam dow mayre, o joori du sadaka njaram.

¹⁵ Yaakuuba inndiri nokku to Laamɗo haaldi e muuɗum toon Baytila.

Rimeede Benjamin e maayde Rahiina

¹⁶ Ɓe ndilli Baytila. Fadde maɓɓe yottaade Efrata, Rahiina rimi. De ndimu makko tiiɗi.

¹⁷ Wakkati ŋatawere makko ndeen, dimtinoowo oon wi'i mo: — Taa hulu sabo a heɓii ɓiɗɗo gorko katin.

¹⁸ Nde o haɓdannoo e yonki ndeen, o inndiri ɓiɗɗo oon Ben-oni. Ammaa baaba suka oon inndiri ɗum Benjamin.

¹⁹ Rahiina maayi, mooɓaa ɗakkol laawol Efrata, ɗum woni Baytilaama.

²⁰ Yaakuuba darni hayre dow saabeere makko. Ɗum laatii maande saabeere Rahiina faa hannden.

²¹ Israa'iila yehi yeeso, darni hukum mum caggal Migdal-Eder.

²² Wakkati Israa'iila jooɗinoo ley leydi ndiin ndeen, Ruben yehi fukkodowii e Bilha korɗo bammum nattaaɗo oon. Israa'iila nani kabaaru majjum. Yaakuuba ina jogii ɓiɓɓe worɓe 12.

²³ Ɓiɓɓe Leya wo: Ruben e Simeyon e Lewi e Yahuuda e Isakar e Jabulon. Ruben woni afo Yaakuuba.

²⁴ Ɓiɓɓe Rahiina wo: Yuusufi e Benjamin.

²⁵ Ɓiɓɓe Bilha korɗo Rahiina oon wo: Dan e Naftali.

²⁶ Ɓiɓɓe Jilpa korɗo Leya wo: Gad e Aser. Ɓeen ngoni ɓiɓɓe Yaakuuba rimaaɓe Padan-Aram.

Maayde Isiyaaka

²⁷ Yaakuuba yottii Mamre to bammum Isiyaaka, faa Kiriyat-Arba, ɗum woni Heberon. Wo toon Ibrahiima e Isiyaaka koɗunoo.

²⁸ Duuɓi Isiyaaka fuu wo 180.

²⁹ O wuuri duuɓi keewɗi e nguurndam kiɓɓuɗam, gaɗa ɗuum o maayi, o hawritowii e maamiraaɓe makko. Ɓiɓɓe makko Isuwa e Yaakuuba mooɓi mo.