Fuɗɗoode 32 - Dewtere Laamɗo Fulfulde Burkina Faso

¹ Jaango mum, Laban dawi gilla subaka kecco, muccii ɓiɓɓe muuɗum rewɓe e taaniraaɓe muuɗum worɓe, barkini ɗum'en. Caggal ɗuum, o dilli to maɓɓe, o hooti wuro makko.

No Yaakuuba segilorii hawrude e Isuwa

² Yaakuuba du jokki laawol muuɗum. Nde o yahannoo ndeen, maleyka'en Laamɗo kawri e makko.

³ Nde o yi'unoo ɓe fu, o wi'i: — Ɓe wo konunkooɓe Laamɗo! O inndiri nokku oon Mahanayim.

⁴ Yaakuuba waɗi nelaaɓe ardii ɗum njehi to mawnum Isuwa ley Seyir ɗuum woni leydi Edom.

⁵ O yamiri ɓe, o wi'i: — Inan ko mbi'oton joomam Isuwa: «Inan ko maccuɗo maa Yaakuuba wi'i: Mi jooɗake to Laban, miɗo heddii toon faa joonin.

⁶ Mi heɓii na'i e araaji e dammucce e maccuɓe e horɓe. Mi nelii yimɓe faa mi humpite, aan joomam, yalla miɗo heɓa yarramuye maa.»

⁷ Nelaaɓe ɓeen ngarti to Yaakuuba, mbi'i ɗum: — Min njehii to mawna Isuwa, kam du ina wara faa hawra e maaɗa. Imo wondi e worɓe 400.

⁸ Yaakuuba huli sanne, wemmbaa. O fecci yimɓe wonduɓe e makko ɓeen pecce ɗiɗi, kam'en e dammucce e na'i e geelooɗi ɗiin fuu.

⁹ O wi'itii: — Si Isuwa yanii e feccere wootere, fiyii nde fu, tawan ɗiɗaɓerde ndeen ina reenii.

¹⁰ Yaakuuba wi'i: — Laamɗo maama am Ibrahiima, Laamɗo baaba am Isiyaaka, aan Joomiraaɗo wi'i kam: «Yecca leydi maa e suudu bammaa, mi waɗante moƴƴere!»

¹¹ Miin maccuɗo maa, mi fotaay heɓude hinney e hoolaare nde ngaɗanɗaa kam ndeen fuu. Sabo sawru am tan njoginoomi nde peƴƴannoomi gooruwol Urdun, ammaa joonin mi laatake cefe ɗiɗi.

¹² Miɗo ŋaare reenam e junngo mawnam Isuwa, sabo miɗo hula taa o wara, o fiya kam, miin e ɓiɓɓe am e inniraaɓe muɓɓen, o wara min.

¹³ Aan Joomiraaɗo wi'i kam: «Mi waɗante moƴƴere, mi hebbinan ƴuwdi maa hono njaareendi maayo, ndi limataako.»

¹⁴ Yaakuuba waali toon jemma oon. Finti subaka, o itti dokkal ley ko o jogii e junngo makko fuu, o neli mawniiko Isuwa hokkee:

¹⁵ be'i debbi 200 e damɗi 20. Baali debbi 200 e jawɗi 20.

¹⁶ Geelooɗi 30 ɓireteeɗi e ɓiɓɓe muɓɓen. Na'i debbi 40 e ga'i 10. Tefeeji 20 e gorbi 10.

¹⁷ O hokki ɗi maccuɓe makko, coggal fuu yaha e feere muuɗum, o wi'i ɓe: — Ardee kam, njoppon njaayri hakkunde coggal e coggal fuu.

¹⁸ O yamiri arano oon, o wi'i: — Si mawnam Isuwa hawri e maaɗa, de ƴami ma: «Wo a maccuɗo moy? Toy njahataa? Moy jeyi coggal gonngal yeeso maa ngaal?» fu,

¹⁹ njaaboɗaa, mbi'aa: «Maccuɗo maa Yaakuuba jeyi ngal. Wo ɗum dokkal ngal o neldi joomiiko, Isuwa hokkee. Kanko du imo wara caggal amin.»

²⁰ O wi'i noon ɗiɗaɓo oon e tataɓo oon e soggooɓe cogge ɓeen fuu: — Inan no kaaldirton e Isuwa si on kawrii e muuɗum,

²¹ mbi'on mo: «Maccuɗo maa Yaakuuba du ina wara caggal amin.» Sabo o wiitake: «Mi filoto surdude mo e dokkal teddungal ardotoongal. Caggal ɗuum si min kawrii fu, na hasii o jaɓɓoo kam.»

²² Dokkal ngaal ardii, de kanko e hoore makko kaa, o waalti e hoɗorde ndeen jemma oon.

Haala durwo Yaakuuba

²³ Ley jemma oon, o ummini rewɓe makko ɗiɗo e horɓe muɓɓen ɗiɗo e ɓiɓɓe makko worɓe 11 ɓeen. O feƴƴintini ɓe feƴƴitirde gooruwol Yabok.

²⁴ Nde o feƴƴintinnoo ɓe ndeen, o feƴƴintini ko o mari fuu.

²⁵ Kanko kaa o heddii gaɗa toon. Ley jemma majjum gorko gomma wari, durwi e makko faa weeti.

²⁶ Nde oon yiinoo waawataa mo ndeen, fiyi mo dow asangal, de asangal makko ngaal silɓi ley durwo maɓɓe ngoon.

²⁷ Gorko oon wi'i: — Yoppam faa mi dilla, sabo ɓadake weetude. Ndeen Yaakuuba jaabii mo, wi'i: — Mi yoppataa ma, si wanaa mbarkinɗaa kam.

²⁸ Gorko oon wi'i mo: — Noy mbi'eteɗaa? O jaabii, o wi'i: — Miɗo wi'ee Yaakuuba.

²⁹ Oon wi'i: — A inndirtaake Yaakuuba katin. A noddirte Israa'iila sabo a durwidii e Laamɗo, wooɗi a durwidii e yimɓe du, de keɓuɗaa barke.

³⁰ Yaakuuba ƴami mo, wi'i: — Haalanam innde maa. O jaabii, o wi'i: — Ko saabii lamndiɗaa innde am? Ndeen oon barkini mo.

³¹ Yaakuuba wi'i: — Mi yi'i Laamɗo gite e gite, de ɗuum fuu yonki am hisi. Saabe majjum, o inndiri nokku oon Paniyel. Ɗuum woni «Yeeso Laamɗo».

³² Nde o faltotonoo Paniyel ndeen, naange fuɗi. Imo laƴa asangal.

³³ Ɗum waɗi de Israa'iila'en nyaamataa ɗaɗol asangal gilla ndeen faa hannden. Sabo Laamɗo fiyii dow ɗaɗol asangal Yaakuuba.