Fuɗɗoode 30 - Dewtere Laamɗo Fulfulde Burkina Faso

¹ Nde Rahiina yiinoo rimanaay Yaakuuba ndeen, hiri mawnum debbo oon. O wi'i Yaakuuba: — Hokkam ɓiɓɓe! Si wanaa noon fu, mi maayan.

² Ɓernde Yaakuuba mettani Rahiina de wi'i: — Ndelle miin woni Laamɗo kaɗuɗo maa ɓeyngu naa?

³ Rahiina jaabii wi'i: — Inan korɗo am Bilha. Wondu e muuɗum faa rimana kam, miin du mi heɓira ɓiɓɓe e muuɗum.

⁴ O hokki Yaakuuba korɗo makko Bilha, oon laatii deekum. Yaakuuba wondi e Bilha.

⁵ Oon reedi, rimani mo ɓiɗɗo gorko.

⁶ Rahiina wi'i: — Laamɗo saranake kam, jaabanake kam du'aaw am, de hokki kam ɓiɗɗo gorko. Saabe majjum, o inndiri oon Dan.

⁷ Bilha, korɗo Rahiina oon, reedi katin, rimani Yaakuuba ɓiɗɗo gorko ɗiɗaɓo.

⁸ Rahiina wi'i: — Durwo naawngo kaɓumi e mawnam debbo. Mi jaalake. Ɗum waɗi de o inndiri suka oon Naftali.

⁹ Nde Leya yiinoo selii rimude ndeen, hooƴi korɗo muuɗum Jilpa, hokki Yaakuuba.

¹⁰ Jilpa, korɗo Leya oon, rimani Yaakuuba ɓiɗɗo gorko.

¹¹ Leya wi'i: — Mi welii hoore. Ndelle o inndiri oon Gad.

¹² Jilpa, korɗo Leya oon, rimani Yaakuuba ɓiɗɗo gorko ɗiɗaɓo katin.

¹³ Leya wi'i: — Mi seyake, sabo rewɓe fuu noddiran kam ceyiiɗo. Ɗum waɗi de o inndiri oon Aser.

¹⁴ Wakkati tayri alkama, Ruben yehi ley ladde. O heɓi toon ɓiɓɓe leɗɗe mandarago ɓennduɗe, o waddani ɗe inniiko Leya. Rahiina wi'i: — Hokkaram ɓiɓɓe leɗɗe ɓiya ɗeen!

¹⁵ Leya jaabii mo, wi'i: — Ndelle ko teetuɗaa kam goram ɗuum fuu heƴaay ma, de katin aɗa tefa teetude mandarago ɓiyam du naa? Rahiina jaabii mo, wi'i: — Ndelle Yaakuuba waalan suudu maaɗa jemma hannden, loomta mandarago ɓiya oon.

¹⁶ Nde Yaakuuba wartunoo ladde kiiral naange ndeen, Leya yalti hawri e muuɗum, wi'i ɗum: — Mbaalaa ley suudu am jemma o, sabo mi yoɓiri walannde maa ndeen e mandarago ɓiyam. Yaakuuba wondi e makko jemma oon.

¹⁷ Laamɗo jaabanii Leya. O reedi, o rimani Yaakuuba ɓiɗɗo gorko njoyaɓo.

¹⁸ Leya wi'i: — Laamɗo yoɓirii kam moƴƴere, sabo mi hokkii goram korɗo am. Ɗum waɗi de o inndiri ɓiɗɗo oon Isakar.

¹⁹ Leya reedi katin, rimani Yaakuuba ɓiɗɗo gorko njeegaɓo.

²⁰ Leya wi'i: — Laamɗo hokkii kam dokkal lobbal. Joonin goram teddinan kam, sabo mi rimanii mo ɓiɓɓe worɓe njeegom. Ɗum waɗi de o inndiri ɓiɗɗo oon Jabulon.

²¹ Caggal ɗuum, o rimi ɓiɗɗo debbo, o inndiri ɗum Dina.

²² Laamɗo miccitii Rahiina, jaabii du'aaw muuɗum, hokki ɗum ɓeyngu.

²³ O reedi, o rimi ɓiɗɗo gorko. O wi'i: — Laamɗo ittanii kam semteende.

²⁴ Ɗuum waɗi de o inndiri oon Yuusufi. O wi'i: — Joomiraaɗo ɓeydanam ɓiɗɗo gorko goɗɗo!

No Yaakuuba hemri jawdi

²⁵ Nde Rahiina rimunoo Yuusufi ndeen, Yaakuuba wi'i Laban: — Hokkam laawol mi hoota wuro am e leydi am.

²⁶ Hokkam rewɓe am e ɓiɓɓe am ɓe ngollanmi ma saabe muɓɓen ɓeen faa mi dilla. Sabo aɗa anndi golleeji ɗi ngollanmi ma.

²⁷ Laban wi'i mo: — Si aɗa yardii fu, keddoɗaa ɗo am ɗoo. Mi yi'ii e tiimgal, Joomiraaɗo barkinii kam saabe maa.

²⁸ Haalanam njobdi maa, faa mi hokke ndi.

²⁹ Yaakuuba jaabii, wi'i: — Aɗa anndi ko ngollanmaami. Aɗa anndi du no dammuuli maa ɓeydorii e junngo am.

³⁰ Ko njoginoɗaa fadde am e warude ɗuuɗaano. De joonin, ɗum ɓeydake, ɗum ɗuuɗii sanne. Gilla koyngal am yottii ley ɓaade maa, Joomiraaɗo barkinii ma. Joonin le, faa ndeye ngollananmi ɓaade am, miin du?

³¹ Laban ƴami mo, wi'i: — Ɗume kokkanmaami? Yaakuuba jaabii, wi'i: — Taa hokkam fay gootum. Si a jaɓii fu, mi yeccoto e durngol dammuuli maa ɗiin katin, mi hayba ɗi.

³² Mi yiiltoto hakkunde cogge maa ɗeen fuu hannden, de mi sennda baali nyaawi e toddi e ɓaleeji fuu. Hono noon du be'i nyaawi e pantooji. Ɗiin fuu laatotoo njobdi am.

³³ Fonnditaare am seedanto kam yeeso maa ko waroyta. Nyannde ngaroyɗaa faa ndaaraa njobdi am, si a yi'ii ley be'i debbi ɗiin nga wanaa nyaawa naa pantoowa fu, naa ley baali ɗiin nga wanaa ɓaleewu fu, wo ko wujjaa.

³⁴ Laban wi'i: — Ina wooɗi. En ngaɗa no mbiiruɗaa noon.

³⁵ Ammaa nyannde ndeen Laban wurtini ley be'i ɗiin damɗi toddi e pantooji. Hono noon du be'i debbi nyaawi e pantooji e ko woodi pelle daneeje fuu, e baali ɓaleeji fuu. O watti ɗi e juuɗe ɓiɓɓe makko worɓe.

³⁶ Caggal ɗuum, o woɗɗorii Yaakuuba yaadu balɗe tati. Yaakuuba duri dammuuli Laban keddiiɗi ɗiin.

³⁷ Ndeen Yaakuuba adi looci leɗɗe popiliye e amande e palatan kecci de feƴƴi ɗi. O siri ɗi faa leɗɗe majji daneeje ɗeen ɓanga.

³⁸ O fukkini ɗi yeeso dammuuli ɗiin nder akalawal ndiyam to ɗi njarata ɗoon. Nde dammuuli ɗiin ngari faa njara fu, kalahali majji ina tummbina debbi ɗiin ley ɗoon.

³⁹ Dammuuli ɗiin na tummba hakkunde looci ɗiin, de ndimi toddi e pantooji e nyaawi.

⁴⁰ Yaakuuba senndi ɓiɓɓe baali ɗiin. O wayliti keddiiɗi ɗiin, o huccini geese majji faro baali Laban toddi e ɓaleeji ɗiin. Hono nii o heɓirani hoore makko coggal dammuuli, o hawrondinaay ɗi e dammuuli Laban.

⁴¹ Si dammuuli payɗi ɗiin ngarii faa njara de ina tummba fu, Yaakuuba wallinan looci ɗiin yeeso majji.

⁴² Si dammuuli pooƴuɗi ɗiin ngarii yarude fu, o wallintaa looci ɗiin. Noon pooƴuɗi ɗiin laatorii ɗi Laban de payɗi ɗiin laatii ɗi makko.

⁴³ Noon Yaakuuba laatorii jom jawdi sanne. O heɓi dammuuli keewɗi e maccuɓe e horɓe e geelooɗi e araaji fuu.