Fuɗɗoode 27 - Dewtere Laamɗo Fulfulde Burkina Faso

No Yaakuuba heɓiri barke e Isiyaaka

¹ Nde Isiyaaka naywunoo ndeen, gite muuɗum cuddi faa yi'ataa katin. O noddi Isuwa afo makko oon. Oon jaabii wi'i: — Inani kam.

² O wi'i ɗum: — Ndaar mi naywii, mi anndaa nde maayammi.

³ Ndelle hooƴu kure maa e ɓaaru maa e laanyal maa de njahaa ladde, loohanoɗaa kam.

⁴ Moƴƴinanaa kam nyaamdu welndu hono no njiɗirmi noon, ngaddanaa kam mi nyaama, de yonki am barkine gilla mi maayaay.

⁵ Rebeka na hettinii nde Isiyaaka haaldannoo e ɓiyum Isuwa ndeen. Nde Isuwa yehunoo ladde faa loohowo waddana bammum ndeen,

⁶ Rebeka haalani ɓiyum Yaakuuba, wi'i: — Mi nanii bammaa na haalda e mawna Isuwa, na wi'a:

⁷ «Loohanowam teewu ladde, moƴƴinanaa kam nyaamdu welndu faa mi nyaama de mi nyaagane Joomiraaɗo, barkine gilla mi maayaay.»

⁸ Joonin, ɓiyam, hettindanam. Inan ko njamiranmi ma:

⁹ Yahu to dammuuli toon, nannganaa kam ndamkoy ɗiɗoy lobboy faa mi moƴƴina koy, mi waɗa nyaamdu welndu no bammaa yiɗiri noon.

¹⁰ Njaaranaa ɗum ndu faa nyaama, de barkine gilla maayaay.

¹¹ Yaakuuba jaabii inna mum, wi'i: — Mawnam Isuwa wo gorko mo ɓanndu mum heewi leeɓi, de miin, mi worraa noon.

¹² Ina hasii baaba am meema kam, de ndaarda kam wo mi jambotooɗo. Ndeen mi heɓataa barke, wo kuddi tan ngaddananmi hoore am.

¹³ De inniiko wi'i mo: — Si wo noon fu, kuddi ndiin saama dow am. Suka am, hettinda haala am tan, yahu nannganowaa kam ko mbiimaami ɗuum.

¹⁴ Ndelle o yehi, o nanngowi ndamkoy kooy, o waddani Rebeka inniiko. Inniiko oon moƴƴini nyaamdu welndu hono no baabiiko yiɗiri noon.

¹⁵ Ndeen inniiwo oon hooƴi kaddule Isuwa ɓiyum mawɗo lobbe ɗe resunoo ley suudu waɗi Yaakuuba minyiiwo oon ɓoornii.

¹⁶ O ɓoorni guri ndamkoy ɗiin e juuɗe muuɗum, e to leeɓi ngalaa e daande mum toon.

¹⁷ O hokki ɗum nyaamdu welndu nduun e buuru mo o moƴƴini oon.

¹⁸ Yaakuuba naati to bammum, wi'i ɗum: — Baaba! O jaabii o wi'i: — Aan wo moy suka am?

¹⁹ Yaakuuba wi'i bammum: — Miin Isuwa, afo maa. Mi waɗii ko mbiiɗaa kam ɗuum. Umma jooɗa, nyaamaa teewu ngu loohoymi nguun, de mbarkinaa kam.

²⁰ Isiyaaka wi'i ɓiyum oon: — Suka am, noy ngaɗuɗaa de keɓuɗaa teewu ladde faa ngartuɗaa law hono nii? O jaabii, o wi'i: — Joomiraaɗo, Laamɗo maa, kam waddi ngu to am.

²¹ Ndeen Isiyaaka wi'i Yaakuuba: — Suka am, ɓatta faa mi meeme, mi faama yalla aan woni ɓiyam Isuwa naa a wanaa.

²² Yaakuuba ɓattii bammum Isiyaaka. Oon meemi mo, de wi'i: — Haala kaa wo haala Yaakuuba, ammaa juuɗe ɗe wo juuɗe Isuwa.

²³ O annditaay ɗum sabo juuɗe muuɗum ina njogii leeɓi hono juuɗe Isuwa mawniiwo oon. Ndeen o barkini ɗum.

²⁴ Isiyaaka wi'i: — Yalla goonga fuu a ɓiyam Isuwa naa? O jaabii, o wi'i: — Ayyo wo miin!

²⁵ Isiyaaka wi'i: — Ɓiyam, ɓattinanam teewu nguun, faa mi nyaama, de mi barkine. O ɓattinani ɗum, nyaami. Ndeen o waddani ɗum inaboojam du, yari.

²⁶ Ndeen baabiyo oon wi'i mo: — Suka am, ɓatta muccoɗaa kam.

²⁷ O ɓattitii, muccii ɗum. O nani uurngol kaddule muuɗum de o barkini ɗum o wi'i: Uurngol suka am ina nanndi e uurngol ngesa nga Joomiraaɗo barkini.

²⁸ Laamɗo jippinane peewol saawoore ƴuurunde dow. O hokke du leydi lobbiri e alkama ɗuuɗɗo, e inaboojam keewɗam.

²⁹ Cuuɗi baaba ngollane! Laamuuji cujidane! Laamoɗaa sakiraaɓe maa! Ɓiɓɓe inna maa cujidane. Kuɗuɗo ma fuu, kuddi ndiin saama dow muuɗum. Du'aniiɗo ma fuu, Laamɗo barkin ɗum!

³⁰ Isiyaaka tilii barkinde Yaakuuba. Nde Yaakuuba wurtinoo to baaba muuɗum ndeen, wakkati oon pay, Isuwa sakiikem oon warti loohagol, naati.

³¹ Kanko du o moƴƴini nyaamdu welndu, o nanni to baabiiɓe, de o wi'i ɗum: — Baaba, umma nyaamu teewu ngu loohanoymi ma nguun, de mbarkinaa kam, miin ɓiya.

³² Baabiiko Isiyaaka wi'i mo: Aan, a moy? O jaabii, o wi'i: Wo miin Isuwa, ɓiya afo oon.

³³ Wakkati oon, Isiyaaka diwni sanne, wi'i: — Moy woni loohoyɗo de waddani kam teewu ladde nyaamumi gilla a waraay mbarkinmaami oon? Mi barkinii joomum. Noon du barke oon heddortoo e muuɗum.

³⁴ Nde Isuwa nannoo haalaaji bammum ɗiin fu, wulli wullaango manngo mettungo sanne, wi'i bammum: — Barkinam miin du baaba!

³⁵ Oon jaabii, wi'i: — Minya wardii e hiila, heɓii barke maa oon.

³⁶ Isuwa jaabii, wi'i: Wanaa innde makko wo Yaakuuba naa? O hiilii kam kile ɗiɗi. O teetii mawniraagu am, joonin du o teetii barke am. — A heddanaay kam barke naa?

³⁷ Isiyaaka jaabii Isuwa, wi'i: — Ndaar, mi waɗii mo jooma, mi hokkii mo rimdaaɓe makko fuu ngollana mo, mi yooɓinii mo alkama e inaboojam. Ndelle ɗume mbaawumi waɗande ma katin, suka am?

³⁸ Isuwa wi'i bammum: — Barke gooto tan njogiɗaa naa baaba? Barkinam miin du baaba! Ndeen o wulli, o rufi gonɗi mettorgal.

³⁹ Baabiiko Isiyaaka wi'i mo: Wuro maaɗa woɗɗoto e leydi lobbiri, ngoodundi barke, ndi saawoore kammu jippataako dow muuɗum.

⁴⁰ A wuurdan e kaafaahi maa. A gollanan minya oon. Ammaa ley yiilnde maa, a taƴan ɓoggol maccungaaku ngol o yowi e daande maa ngool.

No Yaakuuba doggiri Isuwa

⁴¹ Ɓernde Isuwa wanyi Yaakuuba saabe barke mo bammum barkini ɗum oon. Isuwa anniyii, wi'i: — Maayde baaba am ɓadake, caggal ɗuum, mi waran sakiike am Yaakuuba.

⁴² Rebeka humpitaa haalaaji afo muuɗum Isuwa ɗiin. O neli o noddanee ɓiyiiko Yaakuuba minyiiwo oon. O wi'i ɗum: — Ndaar, sakiike maa Isuwa ina filoo warude maa faa itta dukkuru muuɗum e maaɗa.

⁴³ Joonin, suka am, hettina haala am: — Umma, doggu, yahu to Laban sakiike am, gonɗo Haran oon.

⁴⁴ Keddoɗaa to makko seeɗa faa ɓernde sakiike maa oon feewa.

⁴⁵ Nde ɓernde makko waaltii faa o yeggiti ko ngaɗuɗaa o ɗuum fu, mi nelante ngartaa. Mi yiɗaa mursude on, on ɗiɗo fuu nde wootere.

⁴⁶ Caggal ɗuum Rebeka wi'i Isiyaaka: — Mi sawtii adunaaru saabe rewɓe Isuwa Hittiyankooɓe ɓeen. Si Yaakuuba ɓaŋii debbo Hittiyanke hono maɓɓe ley rewɓe leydi ndi, ɗume nguurndam am nafata?