Fuɗɗoode 26 - Dewtere Laamɗo Fulfulde Burkina Faso

Isiyaaka ley leydi Filistiyankooɓe

¹ Wakkati majjum rafo waɗi ley leydi ndiin. Ingo seedi e rafo waɗunoongo ley jamaanu Ibrahiima ngoon. Wakkati oon, Isiyaaka yehi leydi Abimelek kaananke Filistiyankooɓe, faa wuro Gerar.

² Joomiraaɗo ɓangi e makko wi'i: — Taa yahu Misira. Jooɗa ley leydi ndi kaalananmaami haala muuɗum ndiin.

³ Keddoɗaa ley leydi ndi ɗo. Mi wondan e maaɗa, mi barkinte. Sabo wo aan e ƴuwdi maa kokkammi leydi ndii fuu. Mi hiɓɓinan hunayeere nde kunaniimi bammaa Ibrahiima ndeen.

⁴ Mi ɗuuɗinan ƴuwdi maa hono koode, mi hokkan ƴuwdi maa leyɗe ɗee fuu. Lenyi adunaaru fuu keɓan barke saabe ƴuwdi maa.

⁵ Mi waɗiran noon sabo Ibrahiima hettindanake kam. O tinnake e jamirooje am e ekintinooje am e sariyaaji am.

⁶ Isiyaaka jooɗii Gerar.

⁷ Worɓe nokkuure ndeen kaaldi e makko haala jom suudu makko. O wi'i: — Wo o sakiike am debbo. O suusaay wi'ude oon wo jom suudu makko. Si goonga, o hulii taa worɓe nokkuure ndeen mbara mo saabe Rebeka, sabo oon wo jom ŋari sanne.

⁸ Ɓe ɓooyi ley leydi ndiin. Nyannde gomma, Abimelek, kaananke Filistiyankooɓe oon, ndaari faro feneetere, yi'i Isiyaaka ina ŋawlondira e deekum Rebeka.

⁹ Abimelek noddi Isiyaaka, wi'i: — Jaka wo o deeka! Ko saabii de mbiiɗaa wo o sakiike maa debbo? Isiyaaka jaabii mo, wi'i: — Mi wi'ii noon faa taa mi waree saabe makko.

¹⁰ Abimelek wi'i: — Ɗume woni ko ngaɗuɗaa min nii? Seeɗa haɗi gooto amin fukkodaade e jom suudu maaɗa de ngaddanaa min junuuba.

¹¹ Ndeen Abimelek wi'i yimɓe ɓeen fuu: — Meemuɗo gorko o naa deekum fu, warete.

¹² Ley hitaande ndeen Isiyaaka aawi e leydi ndiin, de Joomiraaɗo barkini mo, ko o heɓi ɗuum ɓuri ko o aawi ɗuum kile 100.

¹³ Jawdi makko ina ɓeydoo faa o laatii jom jawdi mawɗo.

¹⁴ O laatii jom cogge be'i e baali e na'i e gollooɓe heewɓe. Ndeen Filistiyankooɓe kaasidii mo.

¹⁵ Ɓulli ɗi gollooɓe baabiiko Ibrahiima mbasunoo fuu, Filistiyankooɓe uwi ɗum'en, kebbini ɗum'en leydi.

¹⁶ Abimelek wi'i Isiyaaka: — Dillu, mboɗɗoɗaa min, sabo a ɓurii min semmbe sanne.

¹⁷ Isiyaaka dilli toon, yehi ley naɗɗol Gerar, jooɗii toon.

¹⁸ Isiyaaka uuti ɓulli basanooɗi illa jamaanu bammum Ibrahiima ɗiin, ɗi Filistiyankooɓe uwunoo caggal maayde bammum ɗiin. O inndiri ɗi inɗe ɗe baabiiko inndirnoo ɗi.

¹⁹ Gollooɓe Isiyaaka mbasi ley naɗɗol toon de keɓi ɓunndu ndu ndiyam iloojam sanne.

²⁰ Ndeen durooɓe Gerar pooɗondiri e durooɓe Isiyaaka, mbi'i: — Ndiyam ɗam wo minen njeyi ɗam. Isiyaaka inndiri ɓunndu nduun Eseka, sabo ɓe pooɗondirii dow mayru.

²¹ Ndeen ɓe mbasi ɓunndu wonndu, de ɓe kaɓdi dow nduun du. Saabe majjum o inndiri nduun Sitna.

²² O eggi, o dilli toon, o wasi ɓunndu wonndu, ammaa nduun kaa ɓe ndukidaay dow muuɗum. Ɗum waɗi de o inndiri ndu Rehobot. O wi'i: — Joonin Joomiraaɗo yaajinanii en nokkuure, en ɓeydoto ley leydi ndi.

Aadi hakkunde Isiyaaka e Abimelek

²³ Caggal ɗuum, Isiyaaka dilli toon, yehi Beerseba.

²⁴ Joomiraaɗo ɓangani mo ley jemma, wi'i: — Miin woni Laamɗo bammaa Ibrahiima. Taa hulu, sabo miɗo wondi e maaɗa. Mi barkinte, mi ɗuuɗinan ƴuwdi maa saabe maccuɗo am Ibrahiima.

²⁵ O nyiɓi toon sakkirde, o du'ii e innde Joomiraaɗo. O darni hukum makko. Gollooɓe makko mbasi ɓunndu ɗoon.

²⁶ Abimelek ƴuuri Gerar wari to makko, wardi e Akusat, tindinoowo ɗum e Pikol, hooreejo sordaasiiɓe muuɗum.

²⁷ Isiyaaka ƴami ɓe: — Ko saabii de ngarɗon ɗo am? Wanaa wo on mbanyuno kam de ndiiwuɗon kam naa?

²⁸ Ɓe mbi'i: — Min nji'ii, min taƴorii Joomiraaɗo ina wondi e maaɗa. Min tawii sanaa ngaɗiden hunayeere hakkunde meeɗen. Adiden aadi.

²⁹ Taa ngaɗaa min ko boni, hono no min meemiraay ma noon, hono no min ngaɗaay ma faa'e si wanaa ko wooɗi tan, min njoppii ma ndilluɗaa e jam, aan laatiiɗo joonin barkinaaɗo Joomiraaɗo.

³⁰ Isiyaaka waɗani ɓe weltaare, ɓe nyaami, ɓe njari.

³¹ Ɓe ndawi jaangoore majjum, ɓe adidi aadi, de Isiyaaka yoppi ɓe, ɓe ndilli e jam.

³² Ley nyalooma oon gollooɓe Isiyaaka ngari kaalani ɗum kabaaru ɓunndu ndu mbasi nduun, mbi'i mo: «Min keɓii ndiyam».

³³ Isiyaaka inndiri ndu Seba, ɗum waɗi de huɓeere ndeen ina wi'ee Beerseba faa warde hannden.

³⁴ Nde Isuwa heɓunoo duuɓi 40 ndeen, dewli Yehuditi ɓii Beeri Hittiyanke. O hooƴi du Basimat ɓii Elon, oon du Hittiyanke.

³⁵ Rewɓe ɗiɗo ɓeen mettini ɓernde Isiyaaka e Rebeka.