Fuɗɗoode 25 - Dewtere Laamɗo Fulfulde Burkina Faso

Haala maayde Ibrahiima e ƴuuruɓe e muuɗum

¹ Ibrahiima hooƴi debbo goɗɗo katin, innde debbo oon wo Ketura.

² Oon rimani mo Simran, Yoksan, Medan, Madiyan, Yiisbak, e Suwak.

³ Yoksan rimi Seba e Dedan. Ɓiɓɓe Dedan ngoni Asurinkooɓe e Letusinkooɓe e Le'uminkooɓe.

⁴ Inan ɓiɓɓe Madiyan: Efa, e Efer, e Henok, e Abida e Elda'a. Ɓeen fuu e Ketura ƴuuri.

⁵ Ibrahiima hokki Isiyaaka huunde fuu ko jeyi.

⁶ Ibrahiima itti jawdi, hokki ɓiɓɓe worɓe ɓe rewɓe muuɗum naattaaɓe ndimani ɗum ɓeen, o woɗɗini ɓe, ɓe njehi faro lettugal, ɓe ndilli ɗakkol ɓiyiiko Isiyaaka gilla imo wuuri.

⁷ Duuɓi Ibrahiima fuu wo 175.

⁸ Ibrahiima wuuri duuɓi keewɗi e nguurndam kiɓɓuɗam. O maayi caggal naywaaku mbelngu. O mooɓaa, o hawritowi e maamiraaɓe makko.

⁹ Isiyaaka e Ismaa'iila ɓiɓɓe makko ɓeen mooɓi mo ley loho Makpela ɗakkol Mamre ley ngesa Eforon ɓii Sohar, Hittiyanke.

¹⁰ Ngaan woni ngesa nga Ibrahiima soodi to Hittiyankooɓe ngaan. Toon Ibrahiima e deekum Saaratu fuu mooɓaa.

¹¹ Caggal maayde Ibrahiima, Laamɗo barkini Isiyaaka ɓiyum oon. Isiyaaka jooɗowii ɗakkol ɓunndu Lahay Roy.

¹² Inan ƴuwdi Ismaa'iila ɓii Ibrahiima mo Hajara Misiranke oon rimani ɗum.

¹³ Inan inɗe ɓiɓɓe Ismaa'iila worɓe e no ɓe njokkondiri Nebayot afo makko e Kedar e Adubel e Mibisam,

¹⁴ e Misma e Duma e Masa,

¹⁵ e Hadat e Teema e Yetur e Nafis e Kedema.

¹⁶ Ɓee ngoni ɓiɓɓe Ismaa'iila worɓe, ɓe 12. Mono e maɓɓe fuu laamake lenyol jooɗiingol ley kuɓeeje e gure ɗo tawaa. Mono fuu innde muuɗum heddii e nokku ɗo laamii ɗoon.

¹⁷ Duuɓi ɗi Ismaa'iila wuuri fuu wo 137. O maayi, o mooɓaa, o hawritowi e maamiraaɓe makko.

¹⁸ Yuwdi makko jooɗake illa Hawila faa yaade Sur ɗakkol Misira faa yaade Asuura. Ɓe keddodii toon rafi potal e sakiraaɓe maɓɓe.

Haala Yaakuuba Haala rimeede Isuwa e Yaakuuba

¹⁹ Inan ƴuwdi Isiyaaka ɓii Ibrahiima: Ibrahiima rimi Isiyaaka.

²⁰ Duuɓi Isiyaaka wo 40 nde ɓaŋannoo Rebeka minyoo Laban, ɓii Betuwel Aramanke ƴuuruɗo Padan-Aram oon.

²¹ Rebeka kaa wo dimaro. Saabe ɗuum Isiyaaka du'ii, ŋaarii Joomiraaɗo saabe jom suudu muuɗum. Joomiraaɗo nani du'aaw makko, de Rebeka hooƴi reedu.

²² Ɓiɓɓe ɓeen ina ndunƴondira ley reedu muuɗum. O wi'i: — Si wo nii, ko saabii miɗo wuuri? O yehi, o lamndii Joomiraaɗo.

²³ Joomiraaɗo jaabii mo, wi'i: Lenyi ɗiɗi ngoni ley reedu maaɗa, laamuuji ɗiɗi ɗi kawtaa njaltan e maaɗa. Lenyol gootol laatoto ɓurngol semmbe. Mawniiwo oon gollanan minyum.

²⁴ Nde wakkati ɓeyngu makko yottinoo ndeen, o rimi funeereeɓe worɓe.

²⁵ Arandeejo oon yalti, wo boɗeejo coy, de leeɓi ina keewi dow ɓanndu muuɗum fuu hono saayo. Ndelle o inndiraa Isuwa.

²⁶ Caggal ɗuum, ɗiɗaɓo oon yalti, junngo mum ina tiigii teppere Isuwa. Oon inndiraa Yaakuuba (ɗum na fiirta «tiigiiɗo teppere»). Duuɓi Isiyaaka wo 60 nde ɓe ndimetenoo ndeen.

²⁷ Sukaaɓe ɓeen mawni. Isuwa laatii loohotooɗo mawɗo jiɗuɗo yiilaade ley ladde, de Yaakuuba kaa laatii neɗɗo keesindiiɗo buurɗo ley hukumuuji.

²⁸ Isiyaaka ina yiɗunoo Isuwa sabo imo yiɗi teewu ladde, de Rebeka kaa wo Yaakuuba yiɗi.

²⁹ Nyannde gomma Yaakuuba defi nyebbe, Isuwa du ƴuuri ladde warti, ina tampi sanne.

³⁰ Isuwa haaldi e Yaakuuba, wi'i: — Miɗo ŋaare, kokkaa kam nyebbe maa boɗeeje ɗe seeɗa mi nyaama, sabo mi tampii. Saabe ɗuum o inndiraa Edom (ɗum na fiirta «Boɗeejo»).

³¹ Yaakuuba wi'i: — Ndelle sonniram mawniraagu maa tafon.

³² Isuwa jaabii, wi'i: — Inan miɗo maaya! Ɗume mawniraagu nafata kam?

³³ Yaakuuba wi'i: Kunanoɗaa kam, tafon. De Isuwa hunanii mo, soottirii mo mawniraagu muuɗum.

³⁴ Yaakuuba hokki Isuwa buuru e nyebbe cewɗe boɗeeje ɗeen. O nyaami, o yari de o ummii o dilli. Noon Isuwa famɗiniri darja mawniraagu muuɗum.