Fuɗɗoode 23 - Dewtere Laamɗo Fulfulde Burkina Faso

No Ibrahiima soodiri saabeere Saaratu

¹ Saaratu wuuri duuɓi 127.

² O maayi Kiriyat-Arba, ɗum woni Heberon, ley leydi Kanaana. Ibrahiima woyi mo.

³ Ibrahiima ummii dilli to maayɗo muuɗum oon, yehi haaldowi e Hittiyankooɓe wi'i ɗum'en:

⁴ — Mi janano hakkunde mooɗon, wo mi beero Coonniree kam saabeere ley nokkuure mon faa mi mooɓa maayɗo am.

⁵ Hittiyankooɓe ɓeen njaabii Ibrahiima, mbi'i:

⁶ — Joomii amin, hettindana min. Wo a neɗɗo Laamɗo tedduɗo hakkunde amin. Mooɓu maayɗo maa ɗo ɓuri wooɗude ley caabeeje amin ɗee fuu. Fay gooto amin haɗataa ma mooɓude maayɗo maaɗa ley caabeeje muuɗum.

⁷ Ibrahiima ummii, hippii yeeso Hittiyankooɓe, jeyaaɓe e leydi ɓeen.

⁸ O haaldi e muɓɓen, o wi'i: — Si on njaɓii mi mooɓa maayɗo am fu, nanee ko ŋaarotoomi on. Kaaldanee kam e Eforon, ɓii Sohar oon.

⁹ Mbi'on ɗum soonnira kam loho muuɗum mo waamnde Makpela. Loho koon na woni keerol ngesa makko toon. Mi yoɓan ceede makko fuu yeeso mooɗon, ko laatanoo kam nokku caabeeje mo njeymi.

¹⁰ Tawi Eforon Hittiyanke oon na tawaa hakkunde sakiraaɓe muuɗum jooɗiiɓe ɗoon. O ɓanti daande makko o jaabii Ibrahiima faa Hittiyankooɓe tawaaɓe dammbugal huɓeere ndeen fuu nani. O wi'i:

¹¹ — Wanaa noon, Joomam! Hettindanam! Ngesa ngaan, mi hokkii ma ngaa yeeso yimɓe am. Loho wonko e magga koon du, mi hokkii ma ɗum. Mooɓu maayɗo maa!

¹² Ibrahiima hippii yeeso yimɓe laamorde ndeen katin,

¹³ haaldi e Eforon faa yimɓe laamorde ndeen fuu nani. O wi'i: — Si a jaɓii fu, kettindanoɗaa kam. Mi hokkete coggu ngesa ngaan. Njaɓaa ɗum e junngo am tafon de mi mooɓa maayɗo am.

¹⁴ Eforon jaabii Ibrahiima, wi'i:

¹⁵ — Joomam, hettindanam! Ceede leydi ndiin na hewta buuɗi cardi 400, ammaa ɗuum wanaa faa'e hakkunde am e maaɗa? Ndelle mooɓu maayɗo maa oon.

¹⁶ Ibrahiima faamri e Eforon. O hiisanii ɗum ceede ɗe wi'i ɗeen yeeso Hittiyankooɓe fuu: buuɗi 400, ko hawrata e fonndirde luumotooɓe.

¹⁷ Ibrahiima soodi ngesa Eforon goonga ɗakkol Makpela, lettugal Mamre ngaan, kanga e loho wonko e magga koon, e leɗɗe gonɗe ley ngesa ngaan, e gonɗe faro keerol magga ɗeen fuu.

¹⁸ Ibrahiima soodi ɗum fuu yeeso Hittiyankooɓe e yeeso yimɓe tawaaɓe dammbugal huɓeere ndeen.

¹⁹ Caggal ɗuum, Ibrahiima mooɓi Saaratu deekum oon ley loho ngesa Makpela lettugal Mamre, ɗum woni Heberon, ley leydi Kanaana.

²⁰ Ngesa ngaan e loho tawaako e magga koon fuu coodaama e juuɗe Hittiyankooɓe, ɗum laatii caabeeje ɗe Ibrahiima jeyi, faa heɓa ɗo mooɓa maayɓe muuɗum.