Fuɗɗoode 22 - Dewtere Laamɗo Fulfulde Burkina Faso

No Laamɗo ndaartindorii Ibrahiima

¹ Caggal ɗuum, Laamɗo ndaartindii Ibrahiima, wi'i ɗum: — Ibrahiima! O jaabii, wi'i: — Inani kam!

² Joomiraaɗo wi'i o: — Adu Isiyaaka, ɓiya korsuɗo mo njiɗɗaa sanne oon, njahaa leydi Moriya, ngaɗaa mo sadaka buleteeɗo dow waamnde mawnde nde kollanmaami ndeen.

³ Ibrahiima dawi gilla subaka kecco, seeli leɗɗe duppirteeɗe sadaka, rimndi araawa muuɗum de yaadi e gollooɓe muuɗum ɗiɗo e Isiyaaka ɓiyum oon. O yehi nokku to Laamɗo sifanii o oon.

⁴ Nyalooma tatoɓo, Ibrahiima ɓanti gite muuɗum de yi'i nokkuure ndeen to woɗɗi.

⁵ Ibrahiima haaldi e gollooɓe muuɗum ɓeen, wi'i: — Keddee ɗoo, onon e araawa ngaan. Miin e suka o, min ƴeeŋan faa dow toon, min cujidana Laamɗo, de min ngarta.

⁶ Ibrahiima hooƴi leɗɗe sadaka ɗeen, ronndini Isiyaaka ɓiyum oon. Imo tiigii e junngo makko yiite e laɓi iɓe njaha kamɓe ɗiɗo.

⁷ Ndeen Isiyaaka haaldi e bammum Ibrahiima, wi'i ɗum: — Abba! O jaabii: — Inani kam, suka am. O wi'i: — Inan yiite e leɗɗe, de toy jawgel buleteengel ngeel le woni?

⁸ Ibrahiima jaabii, wi'i: — Suka am, Laamɗo hokkan jawgel duppeteengel ngeel. Ɓe njokki laawol maɓɓe iɓe njaha.

⁹ Nde ɓe njottinoo nokku ɗo Laamɗo sifanii o ɗoon fu, Ibrahiima nyiɓi sakkirde. O hawrondini leɗɗe ɗeen. O haɓɓi Isiyaaka ɓiyiiko oon, o yowi ɗum dow leɗɗe sakkirde ndeen.

¹⁰ Ibrahiima foorti junngo muuɗum, hooƴi laɓi faa hirsa ɓiyum oon.

¹¹ Ammaa wakkati oon, Maleyka Joomiraaɗo ƴeewnii illa dow kammuuli, noddi mo wi'i: — Ibrahiima! Ibrahiima! O jaabii, o wi'i: — Inani kam!

¹² Joomiraaɗo wi'i: — Taa junngo maa yottoo suka oon! Taa ngaɗaa mo fay gootum, sabo joonin kaa, mi annditii wo a kuloowo Laamɗo. A salanaaki kam ɓiya korsuɗo gooto mo njogiɗaa oon.

¹³ Ibrahiima ɓanti gite muuɗum de yi'i njawdiri, luwe muuɗum na ngadii e wuumoore. O yehi o nanngowi ndi, o waɗani Joomiraaɗo sadaka buleteeɗo, lunnde ɓiyiiko oon.

¹⁴ Ibrahiima inndiri nokkuure ndeen «Joomiraaɗo hokkan». Faa hannden nokku oon noon inndirtee «Dow waamnde nde Joomiraaɗo hokkata.»

¹⁵ Katin Maleyka Joomiraaɗo noddi Ibrahiima illa dow kammuuli.

¹⁶ O wi'i: — Inan konngol Joomiraaɗo: «Mi hunorake e innde am, saabe ko ngaɗuɗaa ɗuum, a salanaaki kam ɓiya gooto korsuɗo mo njogiɗaa oon,

¹⁷ mi barkinte, mi ɗuuɗinan ƴuwdi maa hono koode kammu, hono gabbe njaareendi daande maayo. Ƴuwdi maa ronan galluuje wayɓe muuɗum.

¹⁸ E ƴuwdi maaɗa lenyi duuniyaaru fuu keɓirta barke, sabo a ɗowtanake konngol am.»

¹⁹ Ibrahiima yeccii to gollooɓe muuɗum toon. Ɓe ummii, ɓe kooti Beerseba sabo toon Ibrahiima jooɗinoo.

Haala ƴuwdi Nahor

²⁰ Caggal ɗuum, Ibrahiima humpitaa, wi'aa: Inan Milka du rimanii Nahor minya gorko oon ɓiɓɓe worɓe:

²¹ Us afo makko e Buus minyum, e Kemuwel baaba Aram.

²² O rimanii oon katin Keset, e Hajo, e Pildas, e Yidilaf, e Betuwel.

²³ Betuwel du rimi Rebeka. Ɓe njeetato Milka rimani Nahor minyoo Ibrahiima.

²⁴ Korɗo naattaaɗo Nahor bi'eteeɗo Reyuma oon du rimani ɗum Teeba e Gaham e Tahas e Maaka.