Fuɗɗoode 21 - Dewtere Laamɗo Fulfulde Burkina Faso

Rimeede Isiyaaka

¹ Joomiraaɗo miccitii Saaratu hono no wiirunoo noon de waɗani ɗum ko aadaninoo ɗum ɗuum.

² Saaratu hooƴi reedu, rimani Ibrahiima ɓiɗɗo gorko ley naywaaku muuɗum wakkati mo Laamɗo wi'unoo oon.

³ Ibrahiima inndiri ɓinngel gorel ngeel Isiyaaka (ɗum na fiirta «imo jala»).

⁴ Caggal balɗe jeetati Ibrahiima taadi Isiyaaka hono no Laamɗo yamirnoo ɗum noon.

⁵ Duuɓi Ibrahiima wo 100 nde rimananoo Isiyaaka ndeen.

⁶ Saaratu wi'i: — Laamɗo hokkii kam ɓernde welnde e jaleeɗe, neɗɗo fuu nanɗo ɗum jaldan e am.

⁷ O ɓeydi katin, o wi'i: — Moy waawunoo wi'ude Ibrahiima, Saaratu muynan ɓiɓɓe? Ammaa mi rimanii o ɓiɗɗo gorko ley naywaaku makko!

No Ibrahiima riiwiri Hajara e Ismaa'iila

⁸ Isiyaaka mawni de entaa. Ibrahiima waɗi weltaare mawnde nyannde o entanoo ndeen.

⁹ Saaratu yi'i ɓiɗɗo gorko mo Hajara Misiranke debbo rimani Ibrahiima oon, na jalnoroo Isiyaaka.

¹⁰ Ndeen o wi'i Ibrahiima: — Riiwu korɗo oo e ɓiyum fuu! Ɓiyiiko oon heɓataa ronidaa e ɓiyam Isiyaaka.

¹¹ Haala kaan naawi Ibrahiima sanne sabo Ismaa'iila oon du, wo ɓiyum.

¹² Ammaa Laamɗo haaldi e Ibrahiima wi'i: — Taa mettin ɓernde maa saabe suka maa e korɗo maa oon. Ko Saaratu wi'i fuu, njaɓaa, sabo e Isiyaaka kemrataa lenyol.

¹³ Ɓii korɗo oon du, mi waɗan ɗum lenyol sabo wo o ƴuwdi maaɗa.

¹⁴ Ibrahiima dawi gilla subaka kecco, hooƴi buuru e sumalle ndiyam, wakkini Hajara, hokki ɗum suka oon de dillini ɗum. O dilli, imo yiiltoo ley ladde Beerseba yoornde.

¹⁵ Nde ndiyam sumalle ɗaam timmoynoo fu, o yoppi suka oon ley lekki pamari gomma.

¹⁶ O toowti haddi fiɗande kural, o jooɗii. O wi'i e ɓernde makko: — Taa mi yi'a maayde ɓinngel am! Nde o jooɗinoo ndeen, o ɓanti daande makko, o woyi.

¹⁷ Laamɗo nani daande cukalel ngeel. Maleyka Laamɗo ƴeewnii illa dow kammuuli noddi Hajara, wi'i ɗum: — Ɗume danyi maa Hajara? Taa hulu, sabo Laamɗo nanii daande suka oon faa to woni toon.

¹⁸ Umma kooƴaa suka oon, nanngaa o e junngo maaɗa faa wooɗa sabo mi waɗan o laatoo lenyol manngol.

¹⁹ Laamɗo omti gite makko. Ndeen o yi'i ildude ndiyam. O yehi, o hebbini sumalle oon, o yarni cukalel makko ngeel.

^20-21 Laamɗo wondi e suka oon. O mawni, imo jooɗii ley ladde Paran yoornde. O laatii piɗoowo kure. Inniiko ɓaŋani mo suka debbo jeyaaɗo Misira.

No Ibrahiima waɗiri aadi hakkunde muuɗum e Abimelek

²² Wakkati oon Abimelek wardi e hooreejo sordaasiiɓe muuɗum bi'eteeɗo Pikol, to Ibrahiima mbi'i: — Laamɗo ina wondi e maa ley ko ngaɗataa fuu.

²³ Joonin kaa, hunanam dow innde Laamɗo, a jambataako kam, a jambataako ɓiɓɓe am, a jambataako taaniraaɓe am, saabe mbooɗirka ka ngaɗanmaami kaan. Hunanam a moƴƴanan kam miin e leydi ndi koɗuɗaa e mum ndiin hono no moƴƴirammaami noon.

²⁴ Ibrahiima jaabii, wi'i: — Mi hunanake ma.

²⁵ Ammaa Ibrahiima feli Abimelek dow kabaaru ɓunndu ndu gollooɓe Abimelek teeti nduun.

²⁶ Abimelek jaabii, wi'i: — Mi anndaa moy waɗi ɗum. A humpitaay kam ɗum. Wooɗi du mi nanaay kabaaru majjum si wanaa hannden.

²⁷ Ibrahiima hooƴi na'i e be'i e baali hokki Abimelek de ɓe ngaɗidi aadi.

²⁸ Ibrahiima suɓii ɓiɓɓe baali debbi jeɗɗi.

²⁹ Abimelek haaldi e Ibrahiima, wi'i: — Ɓiɓɓe baali jeɗɗi ɗi ittuɗaa ɗiin, ko saabii de sennduɗaa ɗi?

³⁰ Ibrahiima jaabii, wi'i: — A jaɓan jeɗɗi ɗiin e junngo am, ɗum laatoo seedaaku ko hollata wo miin wasi ɓunndu nduun.

³¹ Ɗum waɗi de ɓe inndiri nokku oon Beerseba (ɗum na fiirta «Ɓunndu hunayeere») sabo wo toon ɓe kunodii.

³² Noon ɓe ngaɗidiri aadi Beerseba toon. Abimelek ummii, hoondi e Pikol hooreejo sordaasiiɓe muuɗum oon leydi Filistiyankooɓe.

³³ Ibrahiima darni lekki Tamaris ɗakkol Beerseba. O du'ii toon e innde Laamɗo Joomiraaɗo duumiiɗo faa abada.

³⁴ Ibrahiima heddii ley leydi Filistiyankooɓe duuɓi keewɗi.