Fuɗɗoode 2 - Dewtere Laamɗo Fulfulde Burkina Faso

¹ Nii kammu e leydi e ko woni e muɓɓen fuu kiɓɓiniraa.

² Nyalaande jeɗɗaɓerde ndeen tawi Laamɗo tilake e golleeji muuɗum tagugol fuu. O fowti e golleeji makko tagugol ɗi o gollannoo ɗiin fuu.

³ Laamɗo barkini nyalaande jeɗɗaɓerde ndeen, senini nde, sabo e mayre o fowtinii nde o timminnoo tagugol tageefo fuu ndeen.

No neɗɗo tagiraa

⁴ Inan no kammu e leydi tagiraa gilla fuɗɗoode. Nde Laamɗo Joomiraaɗo tagunoo kammu e leydi ndeen,

⁵ tawi lekki fuu walaano e leydi. Huɗo du fuɗaayno, sabo Laamɗo Joomiraaɗo tomnaayno ƴuwoonde dow leydi tafon. Neɗɗo du walaano faa golla e mayri.

⁶ Ammaa ndiyam na ilannoo na yarna leydi ndiin fuu.

⁷ Laamɗo Joomiraaɗo nokki leydi, tagi neɗɗo, de fuufi e kine muuɗum foofaango nguurndam. Ndeen neɗɗo oon laatii buurɗo.

⁸ Laamɗo Joomiraaɗo waɗi ngesa leɗɗe ley Eden faro lettugal. O watti neɗɗo mo o tagi oon ley ngesa ngaan.

⁹ Laamɗo Joomiraaɗo funni e leydi sii leɗɗe muuyniiɗe ndaarude ɗe ɓiɓɓe muɓɓen mbeli nyaamude fuu. O funni lekki nguurndam hakkunde ngesa ngaan, kam e lekki anndinoohi ko wooɗi e ko boni kiin.

¹⁰ Gooruwol yalti ley Eden ina yarna ngesa leɗɗe ngaan. Ngol feccii ɗo ngol yalti ɗoon, ngol laatii calɗi nay.

¹¹ Salndu arandeeru nduun ina wi'ee Pison. Kayru fiilii leydi Hawila. Leydi ndiin ina woodi kaŋŋe.

¹² Kaŋŋe leydi ndiin wo kaŋŋe dimo. Ɗakkere wi'eteende Bideliyum e kaaƴe dime bi'eteeɗe onikis du ina ngoni toon.

¹³ Salndu ɗiɗaɓuru nduun ina wi'ee Gihon. Kayru fiilii leydi Kuus fuu.

¹⁴ Salndu tataɓuru nduun ina wi'ee Tiigiri. Indu wubbira lettugal leydi Asuura. Salndu nayaɓurdu nduun woni Efrat.

¹⁵ Laamɗo Joomiraaɗo hooƴi neɗɗo mo tagi oon, watti ɗum ley ngesa Eden ngaan faa rema nga, hayba nga.

¹⁶ O yamiri neɗɗo oon, o wi'i ɗum: — Aɗa waawi nyaamude ɓiɓɓe leɗɗe gonɗe ley ngesa ɗeen fuu.

¹⁷ Ammaa taa nyaamu ɓiɓɓe lekki anndinoohi ko boni e ko wooɗi kiin, sabo nde nyaamuɗaa ɓiɓɓe makki fu, a maayan.

No debbo tagiraa

¹⁸ Ndeen Laamɗo Joomiraaɗo wi'i: — Neɗɗo haanaa wonude kam tan. Mi waɗanan mo balloowo nannduɗo e makko, kawranɗo o.

¹⁹ Laamɗo Joomiraaɗo waɗiri daabaaji ladde e pooli fuu e leydi, de waddi ɗi to neɗɗo oon faa ndaara noy o inndirta ɗi. Innde nde o hokki gootel e majji fuu, ndeen laatotoo innde muuɗum.

²⁰ Noon neɗɗo oon inndiri daabaaji e pooli e kulle ladde fuu. Ammaa ley majji fuu tawaaka balloowo kawranɗo o.

²¹ Laamɗo Joomiraaɗo ɗannini gorko oon ɗoyngol teddungol, itti ƴi'al wecco muuɗum gootal de uddiri nokkuure ndeen teewu.

²² Laamɗo Joomiraaɗo tagirii debbo e ƴi'al wecco ngal itti e gorko ngaal. Ndeen o waddi debbo oon to gorko oon.

²³ Gorko oon wi'ii: Ɗum kaa wo ƴi'al jeyaangal e ƴi'e am, wo teewu njeyaangu e teewu am. O noddirte debbo, sabo e gorko o ittaa.

²⁴ Ɗum waɗi de gorko yoppan inna mum e bammum, de nanngundura e deekum, ɓe ɗiɗo fuu ɓe laatoo neɗɗo gooto.

²⁵ Gorko oon e deekum fuu ɓalli ɓoli ngonnoo. Ɓe anndaano semteende.