Fuɗɗoode 19 - Dewtere Laamɗo Fulfulde Burkina Faso

Haala kiite Sodoma e Gomoora

¹ Maleyka'en ɗiɗo ɓeen njottii Sodoma kiiral naange. Wakkati oon tawi Luudu ina jooɗii dammbugal huɓeere ndeen. Nde o yiinoo ɓe fu, o ummii, o jakkitii ɓe, o sujidani ɓe.

² O wi'i: — Joomiraaɓe am, miɗo nyaagoo on, ngaron ley suudu am, miin maccuɗo mooɗon, looton koyɗe mooɗon, mbaalon toon. Jaango subaka, kooƴon laawol mooɗon mbittoɗon. Ɓe njaabii ɓe mbi'i: — A'aa! Min mbaalan yaasin ɗo.

³ Ammaa Luudu heddii ina sura ɓe faa ɓe njaɓi, ɓe naati ley suudu muuɗum. O jaɓɓii ɓe, o waɗani ɓe neema, o waɗani ɓe buuru mo jillaaka rabilla. Ɓe kiirtii.

⁴ Fadde maɓɓe fukkaade, worɓe Sodoma fuu ngari, jokolɓe e nayeeɓe e sukaaɓe fuu, piilii suudu nduun.

⁵ Ɓe noddi Luudu, ɓe mbi'i ɗum: — Toy yimɓe warɓe to maa futuro oo ɓeen ngoni? Yaltin ɓe faa min pukkodoo e maɓɓe.

⁶ Luudu yalti de ommbi dammbugal suudu muuɗum.

⁷ O haaldi e maɓɓe, o wi'i: — Sakiraaɓe am, miɗo ŋaaroo on, taa ngaɗee ko boni!

⁸ Inan, miɗo woodi ɓiɓɓe rewɓe ɗiɗo ɓe anndaa worɓe. Accon mi yaltinana on ɓe, ngaɗon ɓe ko muuyɗon fuu. Ammaa yimɓe ɓe kaa, taa ngaɗon ɗum'en ko boni, sabo ley ɓaade am ɓe njippii.

⁹ Ɓe mbi'i: — Dillu toon! Ndelle, aan janano oo wo aan taƴanta min sariya ley wuro amin naa? Joonin min ngaɗete bone ɓurɗo mo min ngaɗata ɓe oon. Ɓe ndunyiri o semmbe, ɓe ɓattii ommbirgal ngaal faa ɓe ɗoofa ngal.

¹⁰ Ndeen weerɓe ɗiɗo ɓeen poorti juuɗe muɓɓen, nanngi Luudu, nanni ɗum to muɓɓen ley suudu toon, de ommbi dammbugal ngaal.

¹¹ Ɓe piiri yimɓe wonɓe e dammbugal ɓeen masiiba mbumndam. Ɓe fuu, ɓe mbumi, gilla pamaro faa mawɗo. Ɓe kunngii yiitude dammbugal ngaal.

¹² Weerɓe ɓeen kaaldi e Luudu katin, mbi'i ɗum: — Yalla aɗa woodi jeydaaɓe woɓɓe ɗoo naa? Ɓe fuu, illa ɓiɓɓe maa worɓe e rewɓe yaade goriraaɓe ɓiɓɓe maaɗa rewɓe, e koreeji maa tawaaɓe ley wuro ngo fuu, yaltin ɗum'en, ndillon,

¹³ sabo min kalkan nokku oo. Joomiraaɗo nanii ko ɓe peldaa ɗuum, de nuli min, min kalka wuro ngoon.

¹⁴ Luudu yalti haaldi e haɓɓanɓe ɓiɓɓe muuɗum rewɓe ɓeen, wi'i ɗum'en: — Ummee! Njalten, ndillen nokku oo, sabo Joomiraaɗo halkan wuro ngo. Ammaa esiraaɓe makko ɓeen ndaardi haala kaan hono toolo.

¹⁵ Nde ɓadinoo weetude ndeen, maleyka'en ɓeen ciini Luudu yalta. Ɓe mbi'i ɗum: — Umma, hooƴu deeka e ɓiɓɓe maa rewɓe ɗiɗo ɓeen, taa kalkeɗaa saabe hakkeeji wuro ngo.

¹⁶ Ammaa Luudu wonnoo na sikkitira. Ndeen maleyka'en ɓeen nanngi junngo muuɗum e junngo jom suudu muuɗum e juuɗe ɓiɓɓe muuɗum rewɓe ɗiɗo ɓeen, sabo Joomiraaɗo yurmake mo. Ɓe mburtini ɓe, ɓe ɗowi ɓe faa e caggal wuro ngoon.

¹⁷ Nde ɓe njaltinannoo ɓe ndeen, gooto e maleyka'en ɓeen wi'i: — Tinna doggu! Ndannaa yonki maa. Taa njeeƴoɗaa, taa ndaaraa nokku fuu hakkunde baamle ɗee. Doggu taa kalkaa!

¹⁸ Luudu haaldi e makko, wi'i: — Miɗo ŋaare joomam!

¹⁹ Inan, miin maccuɗo maa, a waɗanii kam moƴƴere mawnde. A hollii kam yurmeende mawnde ko kisinɗaa kam ɗuum. Ammaa mi waawaa doggude faa mi hewta baamle ɗeen tawa masiiba o hewtaay kam, wara kam.

²⁰ Ndaar, inan wuro famaro ɗo, kanngo ɓuri ɓadanaade doggoowo, wo ngo famaro du, ndeen mi heɓan mi danna yonki am.

²¹ Maleyka oon wi'i mo: — Wooɗi, mi ndaardete hinney katin. Mi halkataa wuro ngo kaalataa haala muuɗum ngoon.

²² Tinna ndoggaa cuuɗowoɗaa toon sabo mi waawaa waɗude huunde fuu fadde maa yottaade toon. Ɗum waɗi de wuro ngoon inndiraa Sowar (ɗum na fiirta «pamarel»).

²³ Wakkati puɗal naange, Luudu naati huɓeere Sowar.

²⁴ Ndeen Joomiraaɗo tomni dow Sodoma e Gomoora yiite sitti ƴuwnge e kammu.

²⁵ Laamɗo halki kuɓeeje ɗeen e wuuruɓe e muɓɓen e ko fuɗi e leydi ndiin fuu.

²⁶ Ndeen dee Luudu yeeƴii ndaari caggal muuɗum, de laatii waande lamɗam.

²⁷ Ibrahiima dawi, yehi nokku ɗo darinoo yeeso Joomiraaɗo ɗoon.

²⁸ O ƴeewi faro Sodoma e Gomoora e laddeeji leydi ndiin. O yi'i, inan cuurki leydi ndiin ina ƴeeŋa dow hono cuurki duppirde.

²⁹ Nde Laamɗo halkannoo gure gonɗe ley naɗɗol ngool ndeen, miccitii Ibrahiima de danni Luudu. O itti ɗum e halkere ndeen. Nii o halkiri gure ɗo Luudu hoɗunoo ɗoon.

Haala Luudu e ɓiɓɓe muuɗum rewɓe

³⁰ Luudu wurtii wuro Sowar, de ƴeeŋi dow waamnde. Sabo si goonga, o hulii jooɗaade ley wuro ngoon. O jooɗowii ley loho waamnde ndeen, kanko e ɓiɓɓe makko rewɓe ɗiɗo ɓeen.

³¹ Nyannde gom afo oon haaldi e minyum wi'i ɗum: — Baabii'en naywii, wooɗi gorko du fuu walaa e nokku o faa wonda e meeɗen hono no woowri ley duuniyaaru noon.

³² War! Njarnen baaba meeɗen njaram culoojam de pukkodoɗen e muuɗum faa keɓanen baabii'en ƴuwdi.

³³ Jemma oon ɓe njarni baabiiɓe njaram culoojam. Ɓiɗɗo debbo mawniiwo oon wari fukkodii e bammum mo maataay nde o fukkii, maataay nde o ummii.

³⁴ Jaango majjum, mawniiwo oon haaldi e minyum, wi'i ɗum: — A yi'i, hankin mi fukkodake e baaba am. Njarnen mo jemma hannden du, de njahaa pukkodoɗaa e makko faa keɓanen baabii'en ƴuwdi.

³⁵ Jemma oon du, ɓe njarni baabiiɓe. Minyiiwo oon fukkodowii e makko. O maataay nde oon fukkii e nde ummii fu.

³⁶ Nii Luudu reediniri ɓiɓɓe muuɗum rewɓe ɗiɗo ɓeen.

³⁷ Mawniiwo debbo oon rimi ɓiɗɗo gorko, inndiri ɗum Mo'ab (ɗum na fiirta «ƴuwdi baaba»). Oon woni baaba Mo'abinkooɓe faa warde hannden.

³⁸ Minyiiwo oon du rimi ɓiɗɗo gorko, de inndiri ɗum Ben Ammi (ɗum na fiirta «Ɓii suudu baabam»). Oon woni baaba Amoninkooɓe faa warde hannden.