Fuɗɗoode 18 - Dewtere Laamɗo Fulfulde Burkina Faso

No Laamɗo faaminiri Saaratu heɓan ɓiɗɗo gorko

¹ Joomiraaɗo ɓangani Ibrahiima ɗakkol leɗɗe Mamre mawɗe, tawi imo jooɗinoo dammbugal hukum makko hakkunde naange.

² O ɓanti gite makko, o yi'i worɓe tato ina ndarii yeeso makko. Nde o yi'unoo ɓe fu, o harii, o ummii dammbugal hukum ɗoon, o doggi o jakkitowii ɓe. O hippii yeeso maɓɓe, o wi'i:

³ — Joomam, si mi heɓii hinney yeeso maaɗa fu, taa caloɗaa weerande kam, miin maccuɗo maaɗa.

⁴ Accee ndiyam seeɗa waddee, looton koyɗe mon, ŋottinoɗon ley lekki ɗo.

⁵ Mi waddanan on nyaamdu faa keɓon semmbe de paltoɗon, sabo on pantii to maccuɗo mooɗon. Ɓe mbi'i: — Waɗu no mbiiruɗaa noon.

⁶ Ibrahiima harii yottii to Saaratu ley hukum toon, wi'i ɗum: — Yaawnu! Ngaɗiraa maasaaje e conndi alkama ɗaatundi etirɗe tati.

⁷ Ibrahiima doggiri to na'i muuɗum toon, suɓii ngaari mbaggiri, hokki maccuɗo muuɗum de oon moƴƴini ndi law.

⁸ Ndeen o hooƴi kettungol e ɓiraaɗam e ngaari moƴƴinaandi ndiin, o yaari yeeso maɓɓe. O heddii imo darii ɗakkol maɓɓe ley lekki kiin, iɓe nyaama.

⁹ Ɓe kaaldi e makko, ɓe mbi'i: — Toy deeka Saaratu woni? O jaabii, o wi'i: — Ley hukum o woni.

¹⁰ Gooto e maɓɓe wi'i: — Mi yeccoto ɗo maa mawuuri hono wakkati oo, tawa Saaratu jom suudu maa oon heɓii ɓiɗɗo gorko. Saaratu nani, tawi ina wonnoo dammbugal hukum caggal makko.

¹¹ Ndeen tawi Ibrahiima e Saaratu naywii sanne. Saaratu faltake ɓeyngu.

¹² Saaratu jali ley ɓernde muuɗum de wi'i: — Yalla muuyo na heddanii kam katin miin naywirɗo nii oo? Jom ɓaade am du wo keewɗo duuɓi!

¹³ Joomiraaɗo haaldi e Ibrahiima, wi'i: — Ko waɗi de Saaratu jali? Ko saabii de wi'i noy waawiri rimude de wo nayeejo.

¹⁴ Yalla na woodi ko tiiɗani Joomiraaɗo naa? Mi wartan to maaɗa mawuuri hono wakkati oo, tawa Saaratu heɓii ɓiɗɗo gorko.

¹⁵ Saaratu kaa yeddi, wi'i: — Mi jalaay! Sabo o hulii. Joomiraaɗo jaabii mo, wi'i: — A jalii koy!

No Ibrahiima du'oranii huɓeere Sodoma

¹⁶ Worɓe tato ɓeen ndilli ɗoon, ponndii Sodoma. Ibrahiima ɗowti ɓe faa waynoo ɓe.

¹⁷ Joomiraaɗo miilii, wi'i: — Yalla mi suuɗan Ibrahiima ko ngaɗanmi ɗuum naa?

¹⁸ Si goonga Ibrahiima laatoto lenyol manngol, jogiingol semmbe. Lenyi adunaaru fuu e makko keɓirta barke.

¹⁹ Sabo mi suɓake mo faa o yamira ɓiɓɓe makko e suudu makko tinnaade e rewude laawol Joomiraaɗo caggal makko. Ɓe laatoo fonnditiiɓe, ɓe ngaɗa ko dartii faa mi yottina ko aadaniimi Ibrahiima ɗuum.

²⁰ Ndeen Joomiraaɗo wi'i Ibrahiima: — Ko Sodoma e Gomoora peldaa ɗuum mawnii faa faltake. Hakkeeji maɓɓe du ɗuuɗii sanne.

²¹ Saabe ɗuum mi jippoto mi ndaara yalla golleeji maɓɓe ina poti e pelooje ɗe nanumi ɗeen naa? Si wo goonga naa fewre fu mi faaman.

²² Ɗiɗo maɓɓe ndilli nokkuure ndeen ponndii Sodoma. Wakkati oon Ibrahiima heddii ina darii yeeso Joomiraaɗo.

²³ Ibrahiima ɓattii, wi'i: — Ndelle a halkidan fonnditiiɓe e oonyiiɓe fuu naa?

²⁴ Na waawi tawee fonnditiiɓe 50 na ngoni ley huɓeere Sodoma ndeen. Ndelle a yaafataako saabe 50 fonnditiiɓe wonɓe e mayre ɓeen?

²⁵ A'aa! A wanaa ngaɗoowo iri ɗuum! A halkidataa ponnditiiɗo e oonyiiɗo. Abada a fonndataa njoɓdi ponnditiiɗo e ndi bonɗo! Aan carotooɗo adunaaru fuu oon, a sarorto dartaare!

²⁶ Joomiraaɗo jaabii, wi'i: — Si mi tawii fonnditiiɓe 50 ley huɓeere Sodoma ndeen, mi yaafoto nde nde fuu saabe maɓɓe.

²⁷ Ibrahiima jaabii katin, wi'i: — Mi suusii haaldude e maaɗa, aan Joomiraaɗo! Miin laatiiɗo colla e ndoondi ɓoldi oon.

²⁸ Si tawii njoyo ina nyaki ley 50 ɓeen le? Saabe njoyo nyakuɓe ɓeen, a halkan huɓeere ndeen fuu naa? Joomiraaɗo wi'i: — Mi halkataa nde si mi tawii toon fonnditiiɓe 45.

²⁹ Ibrahiima haaldi e makko katin wi'i: — Si 40 tawaama toon le? Joomiraaɗo jaabii, wi'i: — Mi halkataa ɓe saabe fonnditiiɓe 40 ɓeen.

³⁰ Ibrahiima wi'i katin: — Joomiraaɗo, taa ɓernu, won ko njiɗumi ɓeydude. De si fonnditiiɓe 30 tawaama toon le? O jaabii, o wi'i: — Mi halkataa ɓe si mi tawii toon fonnditiiɓe 30.

³¹ Ibrahiima ɓeydi katin, wi'i: — A yi'ii mi suusii haaldude e maaɗa, aan Joomiraaɗo. De si fonnditiiɓe 20 tawaama toon le? Joomiraaɗo wi'i: — Mi halkataa ɓe saabe fonnditiiɓe 20 ɓeen.

³² Ibrahiima wi'i katin: — Joomiraaɗo, taa ɓernu. Mi ɓeydan huunde wootere tan. Si fonnditiiɓe sappo tawaama toon le? Joomiraaɗo jaabii, wi'i: — Mi halkataa ɓe saabe fonnditiiɓe 10 ɓeen.

³³ Joomiraaɗo dilli nde tilinoo haaldude e Ibrahiima ndeen. Ibrahiima hooti wuro muuɗum.