Fuɗɗoode 17 - Dewtere Laamɗo Fulfulde Burkina Faso

No innde Abram waylitorii Ibrahiima

¹ Nde Abram hewtunoo duuɓi 99 ndeen, Joomiraaɗo ɓangani ɗum wi'i: — Miin woni Laamɗo Jom Baawɗe. Njokkaa laawol am, laatoɗaa ponnditiiɗo.

² Mi waɗan amaana hakkunde am e maaɗa, mi ɗuuɗinan ƴuwdi maa sanne.

³ Abram hippi yeeso muuɗum dow leydi. Laamɗo haaldi e makko katin wi'i:

⁴ — Inan amaana mo ngaddammi e maaɗa: A laatoto baaba lenyi keewɗi.

⁵ A noddirtaake Abram katin, de joonin kaa, innde maa laatake Ibrahiima sabo mi waɗete baaba lenyi keewɗi.

⁶ Mi ɗuuɗinan ɓeyngu maaɗa sanne, mi waɗe lenyi keewɗi. Kaanankooɓe njaltan e maaɗa.

⁷ Mi tabintinan amaana hakkunde am e maaɗa e ƴuwdi maaɗa ley jamaanuuji muɓɓen fuu. O laatoo amaana duumotooɗo faa abada. Mi laatoto Laamɗo maaɗa, aan e taaniraaɓe maa caggal maaɗa.

⁸ Mi hokkete aan e ƴuwdi maaɗa ngaroori caggal maa, leydi ndi laatinoɗaa beero ley muuɗum ndiin ɗum woni leydi Kanaana. Leydi ndiin fuu laatoto jeyal maaɗa faa abada. Wooɗi miin du, mi laatoto Laamɗo ƴuwdi maaɗa.

⁹ Laamɗo haaldi e Ibrahiima katin, wi'i ɗum: — Aan kaa, njogoɗaa amaana am oon, aan e ƴuwdi maaɗa ngaroori caggal maa ley jamaanuuji muɓɓen fuu.

¹⁰ Inan amaana hakkunde am e maaɗa mo njeyɗaa jokkude aan e ƴuwdi maa ngaroori caggal maaɗa: Taadon ɓiɓɓe worɓe fuu.

¹¹ Taadol ngool laatoo maande amaana gonɗo hakkunde am e mooɗon oon.

¹² Ley jamaanuuji fuu, nde ɓiɗɗo gorko rimaa faa hewti balɗe jeetati fu, taadon ɗum. Noon ngaɗanton ɓii maccuɗo dimaaɗo ley ɓaade mooɗon e maccuɓe ɓe cooduɗon laatii yimɓe mooɗon fuu.

¹³ Ndelle maccuɗo dimaaɗo ley ɓaade maaɗa e mo cooduɗaa fuu taadee faa amaana am oon tawee e ɓalli mon de laatoo amaana duumotooɗo faa abada.

¹⁴ Gorko mo taadaaka fu ittete e yimɓe muuɗum, sabo joomum bonnii amaana am oon.

¹⁵ Laamɗo haaldi e Ibrahiima katin, wi'i ɗum: — Saaray deeka oon du, taa noddiraa ɗum Saaray katin. Joonin kaa, Saaratu woni innde makko (ɗum na fiirta «ɓii laamu debbo»).

¹⁶ Mi barkinan o, mi hokkete ɓiɗɗo gorko ƴuuroowo e makko. Mi barkinan o, o laatoto inna lenyi keewɗi. Laamiiɓe lenyi keewɗi njaltan e makko.

¹⁷ Ibrahiima hippi yeeso muuɗum dow leydi de jali. O wi'i ley ɓernde makko: — Gorko mo duuɓi 100 na waawi rimude katin naa? Yalla Saaratu mo duuɓi 90, na waawi heɓude ɓeyngu katin naa?

¹⁸ Ibrahiima haaldi e Laamɗo, wi'i: — Ko ŋaarotoomi woni Ismaa'iila wuura yeeso maaɗa.

¹⁹ Laamɗo jaabii, wi'i: — Wanaa noon! Saaratu deeka oon jaati rimante ɓiɗɗo gorko. Inndiraa mo Isiyaaka. Mi tabintinan amaana hakkunde am e makko, de amaana oon laatanto taaniraaɓe makko ley jamaanuuji fuu faa abada.

²⁰ Ko mbiiɗaa e Ismaa'iila ɗuum, mi jaɓanii ma. Mi barkinan o. Mi hokkan o ɓeyngu, mi ɗuuɗinan ƴuwdi makko sanne. O laatoto baaba laamotooɓe 12. Mi waɗan mo lenyol manngol.

²¹ Ammaa amaana am oon kaa, e Isiyaaka mo Saaratu rimante mawuuri ley wakkati oo tabintinanmi ɗum.

²² Nde Laamɗo selnoo haaldude e Ibrahiima fu, dilli.

²³ Ibrahiima hooƴi Ismaa'iila ɓiyum gorko oon, e rimaaɓe ley ɓaade muuɗum e ɓe soodi ɓeen fuu. O hooƴi worɓe galle makko fuu, o taadi ɗum'en nyalooma oon hono no Laamɗo wi'iri mo noon. O taadi hoore makko du.

²⁴ Nde Ibrahiima taadotonoo ndeen, duuɓi muuɗum wo 99.

²⁵ Ismaa'iila ɓiyiiko oon du duuɓi muuɗum wo 13 de taadaa.

²⁶ Nyalooma oon pay, Ibrahiima e Ismaa'iila ɓiyum oon taadodii.

²⁷ Worɓe ɓaade makko e maccuɓe worɓe rimaaɓe ley ɓaade makko e ɓe o soodi to yananɓe fuu, taadodii e makko.