Fuɗɗoode 16 - Dewtere Laamɗo Fulfulde Burkina Faso

Rimeede Ismaa'iila

¹ Saaray jom suudu Abram oon rimanaay ɗum. Imo joginoo korɗo Misiranke bi'eteeɗo Hajara.

² Ndeen Saaray haaldi e Abram, wi'i ɗum: — A yi'ii, Joomiraaɗo haɗii kam rimude. Ndelle njahaa to korɗo am oon, na hasii e makko keɓiranmi ɓiɗɗo. Abram nani haala Saaray kaan, de jaɓi.

³ Ndeen Saaray jom suudu makko oon hokki mo Hajara korɗo muuɗum Misirankeejo oon. Ɗuum waɗii tawi duuɓi sappo Abram hoɗiri ley leydi Kanaana.

⁴ Abram wondi e Hajara de hooƴi reedu. Nde Hajara oon faamunoo hooƴii reedu ndeen, huyfini joomum Saaray oon.

⁵ Ndeen Saaray haaldi e Abram, wi'i: — Mettorgal kewtiingal kam ngaal to maaɗa ƴuuri! Wo miin watti korɗo am e juuɗe maaɗa. Ammaa nde famunoo hooƴii reedu ndeen, fuɗɗi huyfinde kam. Joomiraaɗo saroo hakkunde am e maaɗa.

⁶ Abram jaabii mo, wi'i: — Wo o korɗo maaɗa, e junngo maa o woni. Ngaɗaa o ko kaajaɗaa fuu. Ndeen Saaray fuɗɗi torrude Hajara de kam du doggi woɗɗii ɗum.

⁷ Maleyka Joomiraaɗo tawi mo ɗakkol ildude wonnde ley ladde yoornde dow laawol Sur

⁸ de wi'i o: — Hajara, korɗo Saaray, toy ƴuuruɗaa? Toy njahataa? O jaabii, o wi'i: — Wo mi doggu joomam Saaray.

⁹ Maleyka oon wi'i mo: — Yecca to jooma debbo oon de leeƴinaa hoore maa yeeso makko.

¹⁰ Maleyka oon ɓeydi, wi'i: — Joomiraaɗo hebbinan ƴuwdi maa faa waawataake limeede.

¹¹ Maleyka Joomiraaɗo oon wi'i mo katin: Inan aɗa wondi e reedu, A riman ɓiɗɗo gorko, Inndiraa ɗum Ismaa'iila (ɗum na fiirta «Laamɗo nanii»), sabo Joomiraaɗo nanii bullaali maa ɗiin.

¹² Ɓiya oon laatoto hono araawa ladde. O haɓdan e yimɓe fuu. Yimɓe fuu kaɓdan e makko. O lunndoto sakiraaɓe makko fuu.

¹³ Hajara noddi Joomiraaɗo kaalduɗo e muuɗum oon. O wi'i ɗum wo a «El Roy» (ɗum na fiirta «Laamɗo ji'oowo kam») sabo o wi'itake: — Jaka wo ɗoo podanaami yi'ude koroowo kam oon!

¹⁴ Wo ɗuum saabii de ildude wonude hakkunde Kaades e Beret na inndiree Lahay Roy (ɗum na fiirta «Ildude Laamɗo Buurɗo ji'oowo kam»).

¹⁵ Hajara rimani Abram ɓiɗɗo gorko. Abram inndiri ɗum Ismaa'iila.

¹⁶ Duuɓi Abram wo 86 wakkati Hajara rimannoo ɗum Ismaa'iila ndeen.