Fuɗɗoode 14 - Dewtere Laamɗo Fulfulde Burkina Faso

Abram e Kaanankooɓe e Malkisedek

¹ Ley nyalaaɗe ɗeen, Amrafel kaananke Sinar e Ariyok kaananke Elasaar e Kedar-Layomer kaananke Elam e Tidal kanaanke Goyim

² kaɓdi e Bera kaananke Sodoma e Birsa kaananke Gomoora e Sinabu kaananke Aduma e Semeber kaananke Seboyim e kaananke Bela, ɗum woni Sowar.

³ Ɓe fuu ɓe kawritowi naɗɗol Siddim. Kanngol inndirtee maayo Lamɗam.

⁴ Duuɓi 12 ɓe laatorii maccuɓe Kedar-Layomer, ammaa ley hitaande sappo e tataɓerde ndeen, ɓe muurti.

⁵ Ley hitaande sappo e nayaɓerde, Kedar-Layomer e Kaanankooɓe wonduɓe e muuɗum ɓeen ngari njaalii Refayinkooɓe nokku bi'eteeɗo Astarot-Karnayim. Ɓe njaalii Jujinkooɓe ngenndi Ham, tawti Eminkooɓe ley njaayri Kiriyatayim,

⁶ e Horinkooɓe dow waamnde muɓɓen Seyir ndeen faa yottii Eyel-Paran wuro wonngo ɗakkol seeno ngoon.

⁷ Ndeen ɓe ngarti, ɓe oorani En-Mispat, ɗum woni Kaades. Ɓe njaalii leydi Amalekinkooɓe fuu, tawti Amorinkooɓe jooɗinooɓe Hasason-Tamar.

⁸ Kaananke Sodoma oon yaltidi e kaanankooɓe Gomoora e Aduma e Seboyim e Bela, ɗum woni Sowar. Ɓe cegilanii konu ley naɗɗol Siddim.

⁹ Ɓe kaɓdi e Kedar-Layomer kaananke Elam, e Tidal kanaanke Goyim, e Amrafel kaananke Sinar, e Ariyok kaananke Elasaar. Kaanankooɓe nayo na kaɓda e kaanankooɓe njoyo.

¹⁰ Wakkati oon tawi naɗɗol Siddim ngool ina heewi loopal takkoowal hono taari. Nde kaanankooɓe Sodoma e Gomoora ndoggannoo ndeen caami ley loope ɗeen de heddiiɓe ndoggiri waamnde.

¹¹ Kaanankooɓe nayo ɓeen kooƴi jawdi Sodoma e Gomoora fuu. Ɓe adi neema e ko ɓeen ngoodunoo fuu, ɓe ndillidi.

¹² Ɓe nanngi Luudu, ɓii sakiike Abram, ɓe kooƴi jawdi muuɗum fuu ɓe ndillidi. Ley Sodoma Luudu oon jooɗinoo.

¹³ Woodii dogguɗo daɗi de haalanowi ɗum Abram Ibraninke oon. Ndeen tawi Abram ina hoɗi ley leɗɗe Amorinke bi'eteeɗo Mamre. Oon wo sakiike Eskol e Aner. Aadi ina wonnoo hakkunde maɓɓe e Abram.

¹⁴ Nde Abram nanunoo sakiike muuɗum oon nanngaama ndeen, ummodii e maccuɓe muuɗum waawuɓe wolde, rimaaɓe ley ɓaade muuɗum, worɓe 318. O taayniti kaanankooɓe nayo ɓeen faa Dan.

¹⁵ O fecci yimɓe makko ɓeen, de ɓe kippii kaanankooɓe ɓeen ley jemma. O riiwi ɓe, o jokki ɓe faa Hooba, soɓɓirre Damas.

¹⁶ O teeti jawdi ndiin fuu, o wartiri Luudu sakiike makko e jawdi muuɗum, e rewɓe e nannganooɓe heddiiɓe.

¹⁷ Nde Abram jaaloynoo Kedar-Layomer e kaanankooɓe wonduɓe e muuɗum ɓeen ley naɗɗol Saawe, ɗum woni naɗɗol bi'eteengol naɗɗol Kaananke ndeen, kaananke Sodoma yalti jaɓɓii o.

¹⁸ Malkisedek kaananke Salaam wooɗi du almaami Laamɗo Toowɗo waddani o buuru e inaboojam.

¹⁹ O barkini Abram, o wi'i: — Laamɗo Toowɗo taguɗo kammu e leydi, barkin Abram.

²⁰ Jettooje ngoodanii Laamɗo Toowɗo gattuɗo wayɓe maaɗa e junngo maa. Abram hokki mo sappoɓerde e ley huunde fuu ko jogii.

²¹ Kaananke Sodoma oon haaldi e Abram, wi'i: — Hokkam tagaaɓe de njogoɗaa jawdi ndiin.

²² Abram jaabii mo, wi'i: — Mi ɓantii junngo am mi hunorake Joomiraaɗo, Laamɗo Toowɗo, taguɗo kammu e leydi,

²³ mi hooƴantaa ma fay huunde, fay gaarawol naa ɓoggol paɗe maa, sakko mbi'aa aan waɗi Abram laatii jom jawdi.

²⁴ Mi hooƴataa fay huunde si wanaa ko yimɓe am ɓeen nyaami e ngeɗu yaadooɓe e am. Ɓeen ngoni Aner e Eskol e Mamre, accaa ɓeen kaa kooƴa ngeɗu muɓɓen.