Fuɗɗoode 12 - Dewtere Laamɗo Fulfulde Burkina Faso

Nguurndam Ibrahiima No Laamɗo noddiri Abram

¹ Joomiraaɗo haaldi e Abram, wi'i: — Dillu leydi maa e lenyol maa e suudu bammaa de njahaa leydi ndi kollanmaami ndiin.

² Mi waɗete lenyol manngol, mi barkinte, mi mawninan innde maa. Yimɓe fuu keɓan barke saabe maaɗa.

³ Mi barkinan barkinɓe ma, Mi huɗan kuɗuɗo ma. Saabe maaɗa lenyi adunaaru fuu keɓan barke.

⁴ Abram dilli hono no Joomiraaɗo wi'iri ɗum noon. Luudu yaadi e makko. Abram tawraa duuɓi 75 nde o dillannoo Haran.

⁵ O yaadi e Saaray jom suudu makko e Luudu ɓii sakiike makko e jawdi maɓɓe e maccuɓe maɓɓe ko ɓe keɓi Haran fuu. Ɓe ndilli Haran faa ɓe njehi leydi Kanaana.

Abram ley leydi Kanaana e Misira

⁶ Nde ɓe njottinoo leydi Kanaana ndeen, Abram dawi feƴƴiti leydi ndiin faa yottowii Sikem, to lekki mawki ngonuki Moore. Wakkati oon, Kanaaninkooɓe njooɗinoo e leydi ndiin.

⁷ Joomiraaɗo ɓangi e Abram, wi'i ɗum: — Wo ƴuwdi maa kokkammi leydi ndii. Abram mahani Joomiraaɗo sakkirde to ɓangani ɗum toon.

⁸ O eggi ɗoon, o yehi hayre wonnde lettugal Baytila o darnowi hukum makko toon. Baytila ina heedi o gorgal, Ayi du ina heedi o lettugal. Toon o mahani Joomiraaɗo sakkirde wonnde de o du'orii e innde Joomiraaɗo.

⁹ Noon Abram heddorii ina waɗa egga-hoɗa faro horɗoore leydi Kanaana.

¹⁰ Rafo waɗi ley leydi ndiin. Wakkati oon Abram jipporii Misira faa jooɗowoo toon, sabo rafo ngoon mawni e leydi ndiin sanne.

¹¹ Nde o ɓadinoo yottaade Misira ndeen, o haaldi e Saaray jom suudu makko, o wi'i ɗum: — Hettina, miɗo anndi a debbo jom ŋari, belɗo ndaarude.

¹² Nde Misirankooɓe nji'ii ma fu, mbi'an wo a jom suudu am, ɓe mbaran kam de ɓe acce aan kaa mbuura.

¹³ Miɗo ŋaare, mbi'aa ɓe wo a sakiike am debbo faa mi heɓa moƴƴere, de mi wuura saabe maaɗa.

¹⁴ Nde Abram yottinoo Misira ndeen, Misirankooɓe nji'i deekum oon na ŋarɗi sanne.

¹⁵ Mawɓe laamu du nji'i mo de mani o yeeso Fira'awna. O yaaraa ley laamordu muuɗum.

¹⁶ Abram heɓi moƴƴere saabe makko. O heɓi maccuɓe e horɓe e baali e be'i e na'i e araaji gori e debbi e geelooɗi.

¹⁷ Ammaa Joomiraaɗo fiyiri Fira'awna e suudu muuɗum nyawuuji bonɗi saabe Saaray jom suudu Abram oon.

¹⁸ Fira'awna noddi Abram, wi'i: — Ko saabii de ngaɗuɗaa kam nii? Ko waɗi de a haalanaay kam wo o deeka?

¹⁹ Ko waɗi mbiiɗaa wo o sakiike maa debbo, ngaɗuɗaa kooƴumi o, o laatii jom suudu am? Joonin kaa inan deeka. Adu mo ndillidaa!

²⁰ Fira'awna hokki yimɓe yamiroore ɗowta mo, kanko e jom suudu makko e huunde fuu ko o jeyi.