Fillitagol 6 - Dewtere Laamɗo Fulfulde Burkina Faso

No haaniri Israa'iila'en njiɗira Joomiraaɗo

¹ Inan jamirooje e sariyaaji e kiite ɗe Joomiraaɗo, Laamɗo mooɗon yamiri njanngineɗon faa ɗowtanoɗon ko wi'i ley leydi ndi ponndiɗon faa laatoo jeyal mooɗon ndiin.

² Noon waɗata faa kulon Joomiraaɗo, Laamɗo mooɗon de ndeenon sariyaaji e jamirooje ɗe ekintinanmi on ɗeen haddi nguurndam mon fuu, onon e ɓiɓɓe mon e taaniraaɓe mon faa balɗe mooɗon njuuta.

³ Ndelle onon Israa'iila'en, kettindoɗon faa wooɗa de tinnoɗon ngaɗon ko yamiraa faa keɓon jam, ɓeydoɗon keewon fodde no Joomiraaɗo, Laamɗo maamiraaɓe mooɗon wi'iri on laatoyto ley leydi ndi kosam e njuumndi ilata e muuɗum ndiin.

⁴ Hettinda Israa'iila! Joomiraaɗo, Laamɗo meeɗen oon tan woni Joomiraaɗo.

⁵ Njiɗiraa Joomiraaɗo, Laamɗo maaɗa e ɓernde maa fuu e yonki maa fuu e semmbe maa fuu.

⁶ Jamirooje ɗe kokkammi ma hannden ɗeen, keddoo ley ɓernde maaɗa.

⁷ Njannginaa ɗe ɓiɓɓe maaɗa, kaalaa haala majje nde njooɗiɗaa ley ɓaade maaɗa, nde njahataa e laawol, nde pukkotoɗaa e nde ummotoɗaa fuu.

⁸ Kaɓɓaa ɗe e juuɗe maaɗa hono maande, ɗe ngona dow tiinde maaɗa.

⁹ Mbinndaa ɗe dow bimmbeeje dammbugal suudu maaɗa e dow dammbuɗe galluuje maaɗa.

¹⁰ Nde Joomiraaɗo, Laamɗo mooɗon nannowi on leydi ndi hunaninoo maamiraaɓe mooɗon Ibrahiima e Isiyaaka e Yaakuuba hokkan on ndiin fu, on tawan galluuje lobbe mawɗe ɗe on nyiɓaay.

¹¹ On tawan cuuɗi keewɗi ko wooɗi ɗi on kebbinaay e ɓulli ndiyam ɗi on mbasaay e gese inabooje e leɗɗe jaytun ɗe on tiiraaki. Nde nyaamoyɗon kaaruɗon fu,

¹² tinnoɗon taa njeggiton Joomiraaɗo burtinɗo on leydi Misira, ley suudu maccungaaku oon.

¹³ Kulon Joomiraaɗo, Laamɗo mooɗon. Wo oon ɗowtantoɗon wooɗi du, e innde makko kunortoɗon.

¹⁴ Taa ndewon allaaji goɗɗi hakkunde allaaji lenyi piiliiɗi on ɗiin,

¹⁵ sabo Joomiraaɗo, Laamɗo mooɗon gonduɗo e mooɗon oon wo Laamɗo keewɗo kiram. Ndelle taa umminee tikkere makko dow mooɗon sabo o halkan on, o fiɗɗan on e duuniyaaru.

¹⁶ Taa ndaartinoɗon Joomiraaɗo, Laamɗo mooɗon hono no ngaɗirɗon nde njooɗinoɗen wuro Massa noon.

¹⁷ Tinnoɗon e ɗowtanaade jamirooje makko, kakkilanon kiite makko e sariyaaji makko fodde no o yamiri on noon.

¹⁸ Ngaɗon ko dartii, ko wooɗi yeeso Joomiraaɗo faa keɓon jam de naaton leydi lobbiri ndi hunaninoo maamiraaɓe mooɗon ndiin.

¹⁹ O riiwan wayɓe on fuu yeeso mooɗon fodde no o wi'iri noon.

²⁰ Si ley ko warata ɓiɓɓe mooɗon ƴamowii on mbi'i: — Ɗume kiite e jamirooje e sariyaaji ɗi Joomiraaɗo, Laamɗo meeɗen hokki on ɗiin njiɗi wi'ude?

²¹ Ndeen njaaboɗon ɓe mbi'on: — Enen, en laatakeno maccuɓe Fira'awna, kaananke leydi Misira, ammaa Joomiraaɗo wurtinirii en leydi ndiin e semmbe mawɗo.

²² E gite amin o fiiri Fira'awna e leydi muuɗum e suudu muuɗum fuu maandeeji e kaayeefiiji mawɗi kulɓiniiɗi sanne.

²³ O wurtini en toon faa o wadda en leydi ndi o hunaninoo maamiraaɓe men o hokkan en ndiin.

²⁴ Joomiraaɗo yamirii ɗowtanoɗen jamirooje ɗeen fuu de kulen ɗum kam Joomiraaɗo, Laamɗo meeɗen oon faa keɓen jam nyannde fuu de mbuuren hono no njooɗoriɗen hannden noon.

²⁵ Ndelle en laatoto dartiiɓe si en tinnake e ɗowtanaade jamirooje ɗe Joomiraaɗo, Laamɗo meeɗen hokki en ɗeen fuu.