Fillitagol 5 - Dewtere Laamɗo Fulfulde Burkina Faso

Haala konngi sappo ɗiin

¹ Muusaa noddi yimɓe Israa'iila fuu de wi'i ɗum'en: Onon Israa'iila'en, kettinee jamirooje e sariyaaji ɗi kollammi on hannden. Ekitoɗon ɗi de ngaɗon ko ɗi mbi'i.

² Joomiraaɗo, Laamɗo meeɗen waɗidii e meeɗen amaana nde ngonnoɗen waamnde Sinayi.

³ Wanaa e maamiraaɓe meeɗen tan Joomiraaɗo waɗidinnoo amaana oon, wo e meeɗen, enen wuurɓe wonɓe ɗo joonin ɓeen.

⁴ Joomiraaɗo haaldii e meeɗen hunnduko e hunnduko dow waamnde Sinayi hakkunde yiite.

⁵ Wakkati oon miɗo darinoo hakkunde Joomiraaɗo e mooɗon faa mi yottina on konngol muuɗum ngool sabo oɗon kulannoo yiite ngeen de saabe ɗuum on ƴeenyaay waamnde ndeen. Inan ko o wi'i: —

⁶ — Miin woni Joomiraaɗo, Laamɗo maaɗa, wo miin wurtini ma leydi Misira, ley suudu maccungaaku.

⁷ Taa ngoodaa alla goɗɗo si wanaa miin.

⁸ Taa ngaɗanaa hoore maaɗa tooruuji nanndinaaɗi ko woni dow kammu naa e leydi naa ley ndiyam.

⁹ Taa kofoɗaa yeeso kujje ɗeen, wooɗi du, taa ɗowtanoɗaa ɗe sabo miin Joomiraaɗo, Laamɗo maaɗa oon wo mi Laamɗo keewɗo kiram. Mi kiitotooɗo ɓiɓɓe saabe hakkeeji baabiraaɓe muɓɓen faa hewta taaniraaɓe e jaatiraaɓe wanyuɓe kam ɓeen.

¹⁰ Ammaa yiɗuɓe kam de na ɗowtanoo jamirooje am ɓeen kaa, mi hinnoto ɗum'en faa hewta jamaanuuji ujunere.

¹¹ Taa noddaa innde am ɓolum, miin Joomiraaɗo, Laamɗo maaɗa, sabo mi accataa pijirɗo innde am ɓolum.

¹² Kakkilanon nyalaande fowteteende ndeen. Nde laatanoo on seniinde fodde no Joomiraaɗo, Laamɗo mooɗon yamiri.

¹³ Ngolliraa balɗe jeegom, timminaa ko ngollataa fuu.

¹⁴ Ammaa nyalaande jeɗɗaɓerde ndeen kaa, wo nyannde fowteteende saabe Joomiraaɗo, Laamɗo maaɗa. Taa ngollaa faa'e aan e ɓiɓɓe maaɗa worɓe e rewɓe e maccuɓe ma e horɓe ma e na'i ma e araaji ma e daabaaji ma laatiiɗi fuu e jananɓe jooɗiiɓe ley galluuje maaɗa faa maccuɓe ma e horɓe ma ɓeen keɓa powtiri hono no maaɗa noon.

¹⁵ Miccitoɗaa a laatakeno maccuɗo leydi Misira de Joomiraaɗo, Laamɗo maaɗa wurtiniri ma semmbe mawɗo. Saabe ɗuum de Joomiraaɗo, Laamɗo maaɗa yamiri ma kakkilanaa nyalaande fowteteende ndeen.

¹⁶ Teddinaa baaba ma e inna ma hono no Joomiraaɗo, Laamɗo maaɗa yamiri ma noon faa balɗe maaɗa njuuta de keɓaa barke ley leydi ndi o hokkete ndiin.

¹⁷ Taa ngaɗaa war-hoore.

¹⁸ Taa ngaɗaa jeenu.

¹⁹ Taa mbujjaa.

²⁰ Taa ceedanoɗaa goɗɗo fewre.

²¹ Taa muuyaa dee goɗɗo. Taa eelaa suudu goɗɗo naa ngesa mum naa maccuɗo mum naa korɗo mum naa nagge mum naa araawa mum naa huunde fuu ko jeyi.

²² Wo haalaaji ɗii, Joomiraaɗo hokki jamaare Israa'iila dow waamnde hakkunde yiite e ruulde e nimre tekkunde. O haaliri ɗi e daande toownde, o ɓeydaay faa'e. O winndii ɗi dow alluuje kaaƴe ɗiɗi de o hokki kam.

No Muusaa yottiniri Israa'iila'en konngol Joomiraaɗo

²³ Wakkati nanunoɗon daande nder nimre tekkunde, tawi waamnde ndeen fuu na huɓɓa yiite, onon ardiiɓe lenyi e mawɓe tawaaɓe hakkunde mooɗon fuu ɓattitiɗon kam.

²⁴ Ndeen mbiiɗon: — Joomiraaɗo, Laamɗo meeɗen hollii min teddeengal e manngu muuɗum. Min nani daande makko nder yiite. Hannden, min nji'i ko Laamɗo na waawi haaldude e tagaaɗo de joomum heddoo na wuuri.

²⁵ Joonin le, saabe ɗume de miɗen maaya? Sabo yiite maawnge ngee nyaaman min! Si miɗen keddii miɗen nana daande Joomiraaɗo, Laamɗo meeɗen ndeen fu sikke walaa, min maayan.

²⁶ Moy heɓi nanude daande Laamɗo Buurɗo na haala nder yiite hono no amin ni de heddodii e yonki?

²⁷ Ndelle ɓatta, aan Muusaa, kettindoɗaa ko Joomiraaɗo, Laamɗo meeɗen wi'ata fuu. Wo aan hollata min ko Joomiraaɗo, Laamɗo meeɗen oon wi'i fuu. Min kettinto, wooɗi min ngaɗan ko o wi'i fuu.

²⁸ Joomiraaɗo nanii ko mbiiɗon kam ɗuum de wi'i kam: — Mi nanii ko jamaare ndeen wi'i ma. Ko ɓe mbi'i ɗuum na wooɗi.

²⁹ Si kulol am ngool waawuno heddaade ley ɓerɗe maɓɓe faa ɓe ɗowtanoo jamirooje am nyannde fuu, ndeen ɓe keɓanno wuurude e jam kamɓe e ɓiɓɓe maɓɓe fuu faa abada.

³⁰ Yahu, mbi'aa ɓe ɓe njeccoo ley hukumuuji maɓɓe.

³¹ Ammaa aan kaa, keddodoɗaa e am ɗo faa mi hokke jamirooje e sariyaaji e kiite ko ekintintaa ɓe faa ɓe ngaɗa ko mbiimi ley leydi ndi kokkammi ɓe, laatoo ndongu maɓɓe ndiin.

³² Muusaa wi'i ɓe: — Kakkilon wooɗa, ngaɗon ko Joomiraaɗo, Laamɗo mooɗon yamiri on fuu. Taa oonyoroɗon nano naa nyaamo.

³³ Tokkon laawol ngol Joomiraaɗo, Laamɗo mooɗon hokki on ngool faa mbuuron de keɓon jam, wooɗi du, balɗe mooɗon njuuta ley leydi ndi njeytoyton ndiin.