Fillitagol 4 - Dewtere Laamɗo Fulfulde Burkina Faso

No jamirooje Joomiraaɗo kaaniri jokkireede

¹ Muusaa ɓeydi wi'i: Onon yimɓe Israa'iila, kettinee jamirooje e sariyaaji ɗi njannginanmi on. Ɗowtanoɗon ɗi faa mbuuron de njahon njeytowon leydi ndi Joomiraaɗo, Laamɗo maamiraaɓe mooɗon hokkata on ndiin.

² Taa ɓeydon faa'e e konngol ngol ekintinanmi on ngool, wooɗi du, taa ɓuyton faa'e e maggol. Ɗowtanoɗon jamirooje Joomiraaɗo, Laamɗo mooɗon fodde no ekintiniranmi on hannden noon.

³ Gite mooɗon nji'ii ko Joomiraaɗo waɗi ley wuro Ba'al-Peyor: Joomiraaɗo, Laamɗo mooɗon halkii teddinannooɓe tooru Ba'al ndu Peyor nduun fuu hakkunde mooɗon.

⁴ Ammaa onon jokkuɓe Joomiraaɗo, Laamɗo mooɗon ɓeen kaa, inan on fuu oɗon mbuuri hannden.

⁵ Kettinee, miɗo janngina on jamirooje e sariyaaji fodde no Joomiraaɗo, Laamɗo am yamiri kam faa ɗowtanoɗon ɗum ley leydi ndi naatoton faa njeyton ndiin.

⁶ Ɗowtanoɗon ɗe de ngaɗon ko ɗe mbi'i. Ɗuum seedantoo lenyi nanooji haala jamirooje ɗeen hakkillo mon e anndal mon, faa ɓe mbi'a: — Sikke walaa, lenyol ngol na woodi hakkillo e anndal. Wo ngol lenyol manngol!

⁷ Lenyol ngole, fay hakkunde lenyi mawɗi woodi allaaji ɓattoriiɗi ɗum hono no Joomiraaɗo, Laamɗo meeɗen worri e meeɗen nde nodduɗen ɗum fuu ni?

⁸ Lenyol manngol ngole woodi jamirooje e sariyaaji dartiiɗi hono Tawreeta mo kokkammi on hannden oo?

⁹ Ammaa ndeentee, kakkilee faa wooɗa taa njeggiton ko njiiruɗon gite mon ɗuum. Taa ɗum wurtoo e ɓerɗe mooɗon haddi nguurndam mooɗon fuu. Ekintinon ɗe ɓiɓɓe mooɗon e taaniraaɓe mooɗon.

¹⁰ Ciwtoron nyannde ndarinoɗon yeeso Joomiraaɗo, Laamɗo mooɗon tiinde waamnde Sinayi, nde Joomiraaɗo wi'annoo kam: — Kawrondinaa jamaare Israa'iila yeeso am faa mi waɗa ɓe nana konngol am de ɓe ekitoo hulude kam haddi nguurndam maɓɓe ley duuniyaaru fuu. Ɓe ekintina ngol ɓiɓɓe maɓɓe.

¹¹ Nyannde majjum, ɓattiɗon ndariɗon tiinde waamnde ndeen. Yiite huuri waamnde ndeen fuu faa tukkowi kammu. Nimre ɓaleere waɗi, tawti ruulde nimre e nimre tekkunde.

¹² Ndeen Joomiraaɗo haaldii e mooɗon hakkunde yiite ngeen. On nanii konngol makko ammaa on nji'aay alhaali faa'e. Wo daande tan nanuɗon.

¹³ O holli on amaana mo o waddata e mooɗon, mo o yamiri kaybanon, ɗum woni jamirooje sappo ɗe o winndi dow alluuje kaaƴe ɗiɗi ɗeen.

¹⁴ Wakkati oon Joomiraaɗo yamiri kam mi janngina on jamirooje e sariyaaji ɗiin faa ngaɗon ko wi'i ley leydi ndi ponndiɗon faa laatoo jeyal mooɗon ndiin.

No ɗowtanagol tooruuji haɗiraa

¹⁵ Ndeentoɗon sanne sabo on nji'aay alhaali fay gooto nyannde Joomiraaɗo haaldannoo e mooɗon ley yiite dow waamnde Sinayi ndeen.

¹⁶ Taa ngaɗon ko boni hono tooru naa natal nanndinaangal e gorko naa debbo,

¹⁷ naa ndaaba jahoowa e leydi laatiinga fuu, naa foondu fiirooru laatiindu fuu,

¹⁸ naa ko daasotoo e leydi ko laatii fuu, naa liingu ley ndiyam laatiingu fuu.

¹⁹ Ndeentoɗon taa tiggitoɗon kammu, ndaaron naange e lewru e koode naa annoraaji kammu laatiiɗi fuu de muuynoo on ɗowtanaade faa cujidanon ɗi. Taa ngaɗon noon sabo wo kanji Joomiraaɗo, Laamɗo mooɗon hokki lenyi gonɗi ley adunaaru fuu.

²⁰ Ammaa onon kaa, Joomiraaɗo nanngii on wurtinii leydi Misira, duɗal taayinoowal njamndi ngaal faa laatoɗon ndongu muuɗum, yimɓe muuɗum, hono no laatoriɗon hannden ni.

²¹ Joomiraaɗo tikkanii kam saabe mooɗon de hunii wi'i mi faltataako Urdun mi naata leydi lobbiri ndi kam Joomiraaɗo, Laamɗo mooɗon hokkata on laatoo ndongu mooɗon ndiin.

²² Ndelle miin kaa, ley leydi ndii maayanmi. Mi heɓataa faltaade Urdun. Ammaa onon kaa, on paltoto, naaton leydi lobbiri ndi njeytoton ndiin.

²³ Ndeentee, taa njeggiton amaana mo Joomiraaɗo, Laamɗo mooɗon waddi e mooɗon de ngaɗanon ko'e mooɗon tooru gomma, natal nanndinaangal e ko Joomiraaɗo, Laamɗo mooɗon haɗi ɗuum fuu.

²⁴ Sabo Joomiraaɗo, Laamɗo mooɗon oon wo yiite nyanngunge, wo o Laamɗo kiroowo.

²⁵ Nde naywoyɗon ley leydi ndiin, tawi on ngaɗi ɓiɓɓe e taaniraaɓe, si on naatii e waɗude ko boni yeeso Joomiraaɗo, Laamɗo mooɗon, hono sehande ko'e mon tooru, alhaali laatiiɗo fuu, si on ngaɗii ko metti ɗum fu,

²⁶ hannden pay, kammu e leydi ceedanoo kam, on piɗɗete law e leydi ndi ponndiɗon faa laatoo jeyal mooɗon ndiin. Balɗe mooɗon njuutataa toon sabo on piɗɗete.

²⁷ Joomiraaɗo riiwan on, sankita on hakkunde leyɗe lenyi goɗɗi. Fay toon, seeɗa e mooɗon tan heddotoo.

²⁸ Toon ɗowtanoytoɗon allaaji tagiraaɗi juuɗe ɓiɓɓe-Aadama, tooruuji leɗɗe e kaaƴe ɗi mbaawaa yi'ude naa nanude naa nyaamude naa uurnaade.

²⁹ Ndeen on piloto Joomiraaɗo, Laamɗo mooɗon de njiiton ɗum, si on tewtirii ɗum e ɓerɗe mon fuu e yonkiiji mon fuu.

³⁰ Nde tiiɗorma mawɗo oon hewtowii on to ngonoyɗon toon fuu, on njeccoto to Joomiraaɗo, Laamɗo mooɗon de kettindanoɗon ɗum.

³¹ Sabo Joomiraaɗo, Laamɗo mooɗon oon, wo Laamɗo jurmotooɗo, o yoppataa on, o halkataa on, o yeggitataa amaana tedduɗo mo o haɓɓidinnoo e maamiraaɓe mooɗon oon.

Barke mo Israa'iila'en keɓi

³² Miilee ko wittii, ƴamon duuɓi paltiiɗi fadde mon e rimeede, gilla nyannde Laamɗo tagunoo ɓii-Aadama ley adunaaru. Ƴamon gilla keerol leydi ngol faa yaade ngoltoo yalla woodii ko mawni foti ɗuum naa, naa hono ɗuum nananooma abada?

³³ Yalla woodii lenyol nanungol daande alla gomma ley yiite hono no mooɗon ni de heddodii e yonki naa?

³⁴ Yalla woodii alla ennduɗo warude hooƴira lenyol hakkunde lenyol gonungol ley torraaji e maandeeji e kaayeefiiji e konu e semmbe mawɗo e kujje mawɗe kulɓiniiɗe, hono no Joomiraaɗo, Laamɗo mooɗon waɗiri ley leydi Misira e gite mooɗon noon naa?

³⁵ Ndelle ɗuum seedanake on wo Joomiraaɗo woni Laamɗo. Goɗɗo walaa si wanaa kanko.

³⁶ Gilla kammu, o waɗii nanuɗon daande makko faa o eelta on. Dow leydi du, o waɗii on njiirii gite mooɗon yiite makko maawnge de nanuɗon konngol makko hakkunde magge.

³⁷ O yiɗii maamiraaɓe mooɗon de o suɓii ƴuwdi muɓɓen. Wo kanko e hoore makko wurtiniri on leydi Misira e semmbe mawɗo.

³⁸ O riiwii lenyi ɓurɗi on manngu e semmbe fuu faa o nanna on leydi muɓɓen ndi o hokkata on laatoo ndongu mooɗon hono no worri hannden ni.

³⁹ Ndelle annditon gilla hannden, wooɗi du taa njeggiton ko Joomiraaɗo woni Laamɗo dow kammu e leydi fuu. Goɗɗo fuu walaa si wanaa kanko.

⁴⁰ Njogitoɗon sariyaaji makko e jamirooje makko fodde no ekitinirmi on hannden noon faa keɓon jam onon e ɓiɓɓe mooɗon de balɗe mon njuuta ley leydi ndi Joomiraaɗo, Laamɗo mooɗon hokkata on ndiin faa abada.

Haala galluuje moolorɗe

⁴¹ Ndeen Muusaa senndi galluuje tati faro lettugal Urdun.

⁴² Galluuje ɗeen wo jaɓɓotooɗe waɗuɓe war-hoore faa baruɗo banndum de tawi hensaaki, wanaa saabe nganyaandi fu, heɓa ɗo suuɗoo de hisina yonki muuɗum.

⁴³ Inan inɗe galluuje ɗeen: Beser, ley ladde baamle woni nde yimɓe Ruben. Ramot ley leydi Galaad woni nde yimɓe Gad. Golan ley leydi Basan woni nde yimɓe Manasa.

Konngol Muusaa ɗiɗaɓol

⁴⁴ Oo woni sariya mo Muusaa hokki Israa'iila.

⁴⁵ Ɗee ngoni jamirooje e sariyaaji e kiite ɗe Muusaa janngini Israa'iila'en nde mburtinoo leydi Misira.

⁴⁶ Wakkati oon iɓe njooɗii lettugal Urdun ley naɗɗol yeeso Bayti-Peyor, leydi Sihon kaananke Amorinkooɓe jooɗinooɗo Hesbon mo Muusaa e Israa'iila'en njaalii nde mburtinoo leydi Misira ndeen.

⁴⁷ Ɓe njeyti leydi makko e ndi Oga kaananke Basan. Kaanankooɓe Amorinkooɓe ɗiɗo ɓeen fuu lettugal Urdun njooɗinoo.

⁴⁸ Israa'iila'en teeti gilla Aro'er daande gooruwol Arnon faa hewti waamnde Siriyon ɗum woni Hermon,

⁴⁹ ley njaayri Araba faro lettugal Urdun faa yottii maayo Lamɗam ley jippitorɗe Pisiga.