Fillitagol 34 - Dewtere Laamɗo Fulfulde Burkina Faso

Maayde Muusaa

¹ Muusaa ummii fecciti njaayri Mo'ab, ƴeenyowi waamnde Nebo, faa dow seɓtoodu Pisiga yeeso Yeriko. Toon Joomiraaɗo holli o leydi ndiin fuu, gilla Galaad faa hewti Dan

² e leydi Naftali e ndi Efrayim e ndi Manasa e leydi Yahuuda fuu faa hewtowi maayo gorgaawo.

³ O yi'i Negeb e njaayri naɗɗol gilla Yeriko, galluure Tamarooje ndeen faa hewti Sowar.

⁴ Joomiraaɗo haaldi e makko wi'i: — Wo leydi ndii kunaninoomi Ibrahiima e Isiyaaka e Yaakuuba mi hokkan taaniraaɓe muɓɓen. Mi waɗii a yiirii ndi gite maaɗa, ammaa a naatataa ndi.

⁵ Wo ɗoon Muusaa, maccuɗo Joomiraaɗo oon maayi, ley leydi Mo'ab fodde no Joomiraaɗo wiirunoo noon.

⁶ Joomiraaɗo uwi Muusaa ley naɗɗol Mo'ab yeeso Bayti-Peyor. Fay gooto anndaa toy saabeere makko woni faa warde hannden.

⁷ Wakkati Muusaa maayannoo ndeen, duuɓi muuɗum wo 120. E noon fu, jiile makko lokkiɗaay, semmbe ɓanndu makko du ɓuytaaki.

⁸ Israa'iila'en mbulliri Muusaa balɗe 30 ley njaayri Mo'ab. Balɗe woyugol maayde makko ndeen timmi.

⁹ Yoosuwa ɓii Nuun, wo gorko keewɗo ruuhu hakkilantaaku sabo Muusaa dekiino juuɗe muuɗum dow makko. Israa'iila'en na ngaɗa ko o yamirta ɗum'en fuu fodde no Joomiraaɗo wiirunoo Muusaa noon.

¹⁰ Annabaajo hono Muusaa, mo Joomiraaɗo haaldi hunnduko e hunnduko, waɗaay leydi Israa'iila faa warde hannden.

¹¹ Fay gooto hewtaay o e waɗude maandeeji kaayniiɗi kulɓiniiɗi ɗi Joomiraaɗo neli o o waɗowi ley leydi Misira, yeeso Fira'awna e gollooɓe muuɗum e leydi ndiin fuu.

¹² Walaa fuu annabaajo keɓuɗo baawɗe waɗude kujje mawɗe kulɓiniiɗe sanne hono no Muusaa waɗiri e gite jamaare Israa'iila noon.