Fillitagol 30 - Dewtere Laamɗo Fulfulde Burkina Faso

No Israa'iila yeccortoo to Joomiraaɗo

¹ Wakkati kuddi naa barke ko kollumi on ɗuum fuu hewtowii on ley leyɗe to Joomiraaɗo, Laamɗo mooɗon yaari on toon ndeen, on miccitoto ɗum ley ɓerɗe mooɗon.

² Si on njeccake to Joomiraaɗo, Laamɗo mooɗon, on kettindanake ɗum e ɓerɗe mon fuu e yonkiiji mon fuu, onon e ɓiɓɓe mooɗon fodde no ekintiniranmi on hannden noon fu,

³ Joomiraaɗo, Laamɗo mooɗon oon yeccinanan on ko mursunoɗon, o yurmoto on, o hawrondinan on to o sankitinnoo on toon fuu.

⁴ Fay si tawi faa keerol leydi njaaraɗon, Joomiraaɗo, Laamɗo mooɗon hawrondinowan on toon de wartira on.

⁵ O wartiran on ley leydi ndi o hokkunoo maamiraaɓe mon laatoo jeyal muɓɓen de njeyton ndi. O barkinan on de o ɓurna on maamiraaɓe mon ɗuuɗude.

⁶ Joomiraaɗo, Laamɗo mooɗon heyɗintinan ɓerɗe mon, onon e ƴuwdi mooɗon faa njiɗiron ɗum e ɓerɗe mon fuu, e yonkiiji mon fuu, de mbuuron e jam.

⁷ Joomiraaɗo, Laamɗo mooɗon waɗan kuddi ndiin fuu saama dow wayɓe mon, tampinooɓe on ɓeen.

⁸ Onon du, on njeccoto kettindanoɗon Joomiraaɗo faa ngaɗon huunde fuu ko yamiri fodde no ekintiniranmi on hannden noon.

⁹ Joomiraaɗo, Laamɗo mooɗon barkinan golleeji mooɗon fuu. O barkinan ɓeyngu mooɗon e daabaaji mooɗon. O barkinan gese mooɗon sabo o yeccoto o seyoroo waɗande on moƴƴere hono no o seyorinoo waɗande maamiraaɓe mon noon.

¹⁰ Noon laatortoo si on njeccake to Joomiraaɗo, Laamɗo mooɗon, e ɓerɗe mon fuu e yonkiiji mon fuu, si on kettindanake ɗum, on ɗowtanake jamirooje muuɗum e sariyaaji muuɗum binndaaɗi ley dewtere Tawreeta ndee.

No konngol Laamɗo ɓadorii

¹¹ Yamiroore nde kokkammi on hannden ndeen tiiɗaa faa ɓuri semmbe mooɗon. Wanaa ko woɗɗi faa on mbaawaa hewtude ɗum.

¹² Yamiroore ndeen walaa faa dow kammu sakko mbi'on: «Moy waawi ƴeenyude faa dow kammu faa keɓen nanen nde de ngaɗen ko nde wi'i?»

¹³ Nde walaa faro too maayo sakko mbi'on: «Moy waawi feƴƴude maayo manngo ngo faa walla en keɓen nanen nde de ngaɗen ko nde wi'i?»

¹⁴ Ammaa haala kaan na tawaa faa ɗakkol mooɗon, ley kunnduɗe mon e ley ɓerɗe mon faa ngaɗon ko nde wi'i.

Suɓaade nguurndam

¹⁵ Inan mi waddii yeeso mooɗon hannden nguurndam e jam tawti maayde e bone.

¹⁶ Ko njamirammi on woni njiɗon Joomiraaɗo, Laamɗo mooɗon, ndewon laabi muuɗum, ngaɗon ko jamirooje e sariyaaji e kiite muuɗum mbi'i. Si on ngaɗii noon fu, on mbuuran de ɗuuɗon, wooɗi du, o barkina on ley leydi ndi naatoton faa njeyton ndiin.

¹⁷ Ammaa si on accii ɓerɗe mooɗon tottitake o, si on kettindaaki ko o wi'i, on accii allaaji goɗɗi muuynake on faa ɗowtaniɗon ɗum'en fu,

¹⁸ goonga kaalanammi on hannden, on timman faa laaɓon. Balɗe mon njuutataa ley leydi ndi njeytoyton nde peƴƴoyɗon Urdun.

¹⁹ Kammu e leydi ceedanoo kam hannden mi waddii nguurndam e maayde, tawti barke e kuddi yeeso mooɗon. Ndelle cuɓee nguurndam faa mbuuron onon e ƴuwdi mon fuu.

²⁰ Njiɗon Joomiraaɗo, Laamɗo mooɗon, kettindoɗon jamirooje muuɗum, kaɓɓondiron e muuɗum sabo wo kanko woni nguurndam e njuundam balɗe mon faa keɓon mbuuron ley leydi ndi o huninoo o hokka maamiraaɓe mooɗon Ibrahiima e Isiyaaka e Yaakuuba ndiin.