Fillitagol 26 - Dewtere Laamɗo Fulfulde Burkina Faso

Haala ko artii ɓenndude ley gese

¹ Nde njottoyɗon leydi ndi Joomiraaɗo, Laamɗo mooɗon hokkata on faa laatoo jeyal mon ndiin, wakkati jeytuɗon ndi faa njooɗiɗon e mayri fu,

² itton ko artii ɓenndude ley barke gese mon, ngatton ley kanndeeje de njaaron nokkuure nde Joomiraaɗo suɓoytoo faa tabintina innde muuɗum ndeen.

³ Njahon to almaami jottinoowo sadakaaji ley nyalaaɗe ɗeen de mbi'on ɗum: — Hannden miɗen njiɗi hollude Joomiraaɗo, Laamɗo maaɗa ko min naatii ley leydi ndi hunaninoo maamiraaɓe amin hokkan min ndiin.

⁴ Almaami oon jaɓa kanndeeje ɗeen joƴƴina yeeso sakkirde Joomiraaɗo, Laamɗo mooɗon.

⁵ Ndeen muɓɓiton kunnduɗe mon mbi'on: — Baabii amin na laatinoo Araminkeejo egga-hoɗaajo. Ndelle o yehiino leydi Misira kanko e yimɓe seeɗa ɓe njooɗowii. Wari ɓe ɗuuɗi ɓe laatii lenyol manngol cemmbiɗingol.

⁶ Ammaa Misirankooɓe torrii min. Ɓe kollii min semmbe, ɓe ngattii min e maccungaaku.

⁷ Ndeen min mbullitii to Joomiraaɗo, Laamɗo maamiraaɓe amin. Joomiraaɗo du, nani daaɗe amin, o yi'i torraaji e mettorgal e bone mo min njarnetee fuu.

⁸ Ndeen o wurtiniri min leydi Misira ndiin e semmbe makko mawɗo e maandeeji kaayniiɗi kulɓiniiɗi.

⁹ O waddi min nokkuure ndee, o hokki min leydi ndi kosam e njuumndi ilata e muuɗum.

¹⁰ Saabe ɗuum de, inan min ngaddii ko artii ɓenndude ley barke gese amin ɗe kokkuɗaa min aan Joomiraaɗo. Ndeen pukkinon ɗum yeeso Joomiraaɗo de kofoɗon yeeso muuɗum.

¹¹ Caggal ɗuum, ceyoɗon, onon e Lewinkooɓe wonduɓe e mooɗon e jananɓe jooɗiiɓe hakkunde mooɗon saabe barke mo Joomiraaɗo, Laamɗo mooɗon waɗani on, onon e koreeji mooɗon.

Haala jakka

¹² Ley hitaande tataɓerde ɗum woni hitaande jakka ndeen, wakkati timminɗon tayri gese mooɗon fu, kokkon jakka tayri ndiin fuu Lewinkooɓe e jananɓe e atiime'en e rewɓe ɓe goriraaɓe muɓɓen maayi. Ɓe nyaama faa ɓe kaara ley galluuje mooɗon ɗeen.

¹³ Ndeen mbi'on yeeso Joomiraaɗo, Laamɗo mooɗon: — Min ittii jakka ceniiɗo ley cuuɗi amin de min kokki Lewinkooɓe e jananɓe e atiime'en e rewɓe ɓe goriraaɓe muɓɓen maayi fodde no njamirɗaa min noon. Min njeebaaki fay wootere e jamirooje maaɗa, min njeggitaay ɗe.

¹⁴ Min nyaamaay fay gootum e majjum wakkati min ngondunoo e mettorgal saabe maayreede, min ittaay faa'e nde min laatinoo tuunɓe wooɗi du, min cakkanaay faa'e saabe maayɗo. Min kettindanake Joomiraaɗo, Laamɗo amin, min ngaɗii no njamirɗaa min noon pay.

¹⁵ Yaa Joomiraaɗo! Miɗen ŋaare, tiimaa min gilla nokkuure maaɗa seniinde dow kammuuli toon de mbarkinaa Israa'iila, lenyol maaɗa e leydi ndi kokkuɗaa min fodde no kunoraninoɗaa maamiraaɓe amin noon. Ɗum woni leydi ndi kosam e njuumndi ilata e muuɗum ndiin.

No Israa'iila'en laatorii yimɓe Joomiraaɗo

¹⁶ Hannden Joomiraaɗo, Laamɗo mooɗon na yamira ngaɗon ko sariyaaji muuɗum e kiite muuɗum mbi'i ɗuum. Tinnoɗon e ɗowtanaade ɗe de ngaɗon ko ɗe mbi'i fuu e ɓerɗe mon fuu e yonkiiji mon fuu.

¹⁷ Hannden on ngaɗii amaana faa Joomiraaɗo laatoo Laamɗo mooɗon. On ndewan laabi muuɗum de ngaɗon ko yamiri, ɗowtanoɗon sariyaaji e jamirooje e kiite muuɗum, kettindanoɗon ɗum.

¹⁸ Hannden Joomiraaɗo waɗii on laatake jeyal muuɗum korsungal fodde no wiirunoo on noon, oɗon ɗowtanoo jamirooje muuɗum fuu.

¹⁹ Noon o waɗi faa o ɓurna on teddeengal e innde anndaaku e maneede hakkunde lenyi adunaaru ɗi o tagi fuu de laatoɗon lenyol ceniingol saabe Joomiraaɗo, Laamɗo mooɗon fodde no wiirunoo on noon.