Fillitagol 18 - Dewtere Laamɗo Fulfulde Burkina Faso

Ko Lewinkooɓe njeyi hokkeede

¹ Almaami'en Lewinkooɓe e ƴuwdi Lewi fuu ngalaa ndongu hakkunde Israa'iila'en. Nyaamdu maɓɓe wo ko sakkantee Joomiraaɗo, wo ɗuum woni ndongu maɓɓe.

² Ɓe ngalaa ndongu hakkunde sakiraaɓe maɓɓe Israa'iila'en. Joomiraaɗo kam woni ndongu maɓɓe fodde no fodoranii ɓe noon.

³ Inan ko almaami'en njeyi ley ko yimɓe cakkanta Joomiraaɗo: Si wo nagge naa mbaalu naa mbeewa fuu, almaami jey walaawo e gole e kujje reedu fuu.

⁴ Kokkon ɓe ko artii ɓenndude ley gese mon fuu, ɗum woni alkama e inaboojam e nebbam tawti leeɓi baali artiiɗi heseede,

⁵ sabo wo kamɓe e ɓiɓɓe maɓɓe Joomiraaɗo, Laamɗo mooɗon suɓii hakkunde cuuɗi Israa'iila fuu faa laatoo darotooɓe ngolla yeeso muuɗum faa abada.

⁶ To Lewinke tawaa ley galluuje mon fu, na waawi yaade wakkati mo haajaa fuu ley nokkuure nde Joomiraaɗo suɓoytoo ndeen.

⁷ Imo waawi gollude golle Joomiraaɗo ley nokkuure seniinde ndeen hono no sakiraaɓe makko Lewinkooɓe darotooɓe yeeso Joomiraaɗo ɓeen noon.

⁸ O hokkee nyaamdu ndu banndiraaɓe makko nyaamata, baka jawdi ndi o heɓata e sonnugol ndongu baabiiko walaa.

Haala daggadaaɓe e annabaaɓe goongaaɓe

⁹ Nde naatoyɗon leydi ndi Joomiraaɗo, Laamɗo mooɗon hokkata on ndiin fu, tinnoɗon taa nyemmbiton waɗude kujje karmuɗe ɗe lenyi ɗiin ngaɗata ɗeen.

¹⁰ Taa tawee hakkunde mon neɗɗo kooƴoowo ɓiyum debbo naa gorko wula, naa neɗɗo gaɗoowo ndaggadaaku naa tiimngal, naa gollidoowo e ginnaaji naa sukunyaajo,

¹¹ naa gollidoowo e beeli maayɓe naa cafaaje ɓaleeje naa kaaldoowo e maayɓe naa ginnaaji.

¹² Gaɗuɗo gootel e majji fuu, waɗii ko harmi yeeso Joomiraaɗo. Wo saabe majjum de Joomiraaɗo riiwi lenyi ɗiin fuu yeeso mooɗon.

¹³ Laatoɗon ɓe ngalaa feloore yeeso Joomiraaɗo, Laamɗo mooɗon.

¹⁴ Sabo lenyi ɗi ndiiwoyton ɗiin fuu wo filotonooɓe tiimgal, gollidooɓe e ginnaaji. Ammaa onon kaa, Joomiraaɗo, Laamɗo mooɗon hokkaay on iri ɗuum e banndum.

¹⁵ Joomiraaɗo, Laamɗo mooɗon, umminan annabaajo hakkunde mooɗon, gooto e sakiraaɓe mooɗon hono miin Muusaa ni. Kettindanoɗon joomum.

¹⁶ Wo ɗuum ŋaariɗon Joomiraaɗo, Laamɗo mooɗon dow waamnde Sinayi nyannde kawrital nde ndarinoɗon oɗon mbi'a: — Taa min keddoo miɗen nana konngol Joomiraaɗo, Laamɗo amin. Taa min keddoo miɗen nji'a yiite mannge ngee sabo min maayan!

¹⁷ Ndeen Joomiraaɗo wi'i kam: — Ko ɓe mbi'i ɗuum na wooɗi.

¹⁸ Mi umminan gooto hakkunde sakiraaɓe maɓɓe, laatanoo ɓe annabaajo hono maaɗa ni. Mi wattan konngol am e hunnduko muuɗum de holla ɓe ko njamirammi ɗuum fuu.

¹⁹ Mo hettindanaaki haalaaji ɗi annabaajo oon haalirta e innde am ɗiin fuu, wo miin e hoore am jukkotoo ɗum.

²⁰ Ammaa si annabaajo mawnitake de wi'i goɗɗum feere e innde am, tawi wanaa miin yamiri ɗum haala kaan, naa si haalii e inɗe allaaji goɗɗi fu, sey waree.

²¹ Na hasii on miiloto mbi'on: «Noy annditirten konngol ngol ƴuuraay to Laamɗo?»

²² Si annabaajo oon haalirii innde Joomiraaɗo de ko wi'i ɗuum tabitaay fu, paamon ngol ƴuuraay to Joomiraaɗo. Wo mawninkinaare tan o haaliri. Taa kulon o.