Fillitagol 16 - Dewtere Laamɗo Fulfulde Burkina Faso

Haala iidi Faltagol

¹ Ley lewru Abib fuu, ngaɗanon Joomiraaɗo, Laamɗo mooɗon iidi Faltagol sabo wo e ley lewru butaali nduun Joomiraaɗo, Laamɗo mooɗon wurtinnoo on leydi Misira ley jemma.

² Ngaɗanon Joomiraaɗo, Laamɗo mooɗon kirsamaaji saabe iidi oon. Itton kirsamaaji ɗiin ley cogge mon na'i naa baali naa be'i de cakkon ɗi ley nokkuure nde o suɓoytoo faa o tabintina innde makko ndeen.

³ Wakkati iidi oon fuu, taa nyaamon ko jillaa rabilla. Ley balɗe jeɗɗi ɗeen fuu, nyaamon buuru mo jillaaka rabilla. Buuru oon wo miccintinoowo on torra, sabo e henyaare mburtoriɗon leydi Misira. Noon ngatton faa miccitoɗon nyannde mburtinoɗon leydi Misira faa haddi balɗe mon fuu.

⁴ Ley balɗe jeɗɗi ɗeen fuu, taa rabilla yi'ee ley leydi mon fuu. Teewu kirsamaari cakkaandi futuro nyalaande go'aɓerde ndiin, jeyaa heddaade waalta.

⁵ Taa ngaɗon iidi Faltagol oon ley galluuje ɗe Joomiraaɗo, Laamɗo mooɗon hokkata on njooɗoɗon ɗeen fuu.

⁶ Wo ley nokkuure nde o suɓoytoo faa o tabintina innde makko ndeen tan njeyɗon waɗude sadaka iidi oon. Ngaɗon ɗum caamal naange, hono wakkati mo mburtinoɗon leydi Misira oon.

⁷ Nduppon kirsamaari ndiin de nyaamon ɗum ley nokkuure nde Joomiraaɗo, Laamɗo mooɗon suɓoytoo ndeen. Si weetii fu, njeccoɗon ley hukumuuji mooɗon.

⁸ Ley balɗe jeegom ɗeen fuu, nyaamon buuru mo jillaaka rabilla. Nyalaande jeɗɗaɓerde ndeen, ngaɗon kawrital manngal saabe Joomiraaɗo, Laamɗo mooɗon. Taa ngollon fay gootum nyannde ndeen.

Haala iidi Jeɗɗiije

⁹ Limon jeɗɗiije jeɗɗi gilla nyannde puɗɗuɗon taƴude gese mon ndeen.

¹⁰ Caggal ɗuum ngaɗanon Joomiraaɗo, Laamɗo mooɗon Iidi Jeɗɗiije. Ngaddon dokke yardamuye fodde no Joomiraaɗo barkiniri on.

¹¹ Ceyoɗon yeeso Joomiraaɗo, Laamɗo mooɗon ley nokkuure nde suɓoytoo faa tabintina innde muuɗum ndeen. Ceyodoɗon e ɓiɓɓe mon worɓe e rewɓe e maccuɓe mon e horɓe mon e Lewinkooɓe jooɗiiɓe ley galluuje mon e jananɓe e atiime'en e rewɓe ɓe goriraaɓe muɓɓen maayi wonɓe hakkunde mooɗon.

¹² Miccitoɗon on laatakeno maccuɓe leydi Misira. Tinnoɗon e ɗowtanaade jamirooje ɗeen de ngaɗon ko mbi'i.

Haala iidi Tenndeeje

¹³ Ngaɗiron iidi Tenndeeje balɗe jeddi, wakkati timminɗon taƴude gese mon e inabooje mon.

¹⁴ Ceyoɗon wakkati hiiro ngoon onon e ɓiɓɓe mon rewɓe e worɓe e maccuɓe mon e horɓe mon e Lewinkooɓe jooɗiiɓe ley galluuje mon e jananɓe e atiime'en e rewɓe ɓe goriraaɓe muɓɓen maayi wonɓe ley galluuje mooɗon.

¹⁵ Ngaɗiron iidi oon balɗe jeɗɗi saabe Joomiraaɗo, Laamɗo mooɗon ley nokkuure nde suɓoytoo ndeen sabo o barkinan gese mon e golleeji mon fuu. Ndeen on ceyoto seyo manngo.

¹⁶ Worɓe leydi mon fuu kawrita yeeso Joomiraaɗo, Laamɗo mooɗon ley nokkuure nde suɓoytoo ndeen kile tati ley hitaande fuu. Ɓe njaha toon wakkati iidi Buuruuje ɗe njillaaka rabilla e iidi Jeɗɗiije e iidi Tenndeeje. Taa ɓe njaha yeeso Joomiraaɗo juuɗe ɓole.

¹⁷ Mono e maɓɓe fuu hokka ko waawi fodde no Joomiraaɗo, Laamɗo mooɗon barkiniri ɗum.

No sarotooɓe kaani ngollira

¹⁸ Ley galluuje ɗe Joomiraaɗo, Laamɗo mooɗon hokkata on fuu, cuɓoɗon ardiiɓe e sarortooɓe goonga e laaɓal hakkunde lenyi mon fuu.

¹⁹ Taa oonyaa goonga, taa wooda mo njinngantaa ley sariya. Taa njaɓaa njeenaari to careteeɗo sabo njeenaari na wumna saahiiɓe, na ɗala dartiiɓe goonga.

²⁰ Tinnoɗaa e filaade dartaare faa mbuuraa de njeytaa leydi ndi Joomiraaɗo, Laamɗo maaɗa hokkete ndiin.

Ko Joomiraaɗo haɗi

²¹ Taa ndarnon leggal tooru Asera fay gootal ɗakkol sakkirde nde nyiɓanton Joomiraaɗo, Laamɗo mooɗon ndeen.

²² Taa ndarnanon ko'e mon kaaƴe cehaaɗe sabo Joomiraaɗo, Laamɗo mooɗon na wanyi iri ɗuum e banndum.