Fillitagol 14 - Dewtere Laamɗo Fulfulde Burkina Faso

¹ Oɗon laatii sukaaɓe Joomiraaɗo, Laamɗo mooɗon. Taa ɗeeɗon ɓalli mon, taa pemmbon tiiɗe mon saabe goɗɗo maayii.

² Taa ngaɗon noon sabo wo on lenyol ceniingol yeeso Joomiraaɗo, Laamɗo mooɗon. Wo onon o suɓii hakkunde lenyi adunaaru fuu faa laatoɗon jeyal makko korsungal.

Yamiroore dow teewu dagiingu nyaameede e ngu dagaaki

³ Taa nyaamon ko harmi fay gootum.

⁴ Inan daabaaji ɗi mbaawɗon nyaamude: nagge e mbaalu e mbeewa,

⁵ e kooba e lewla e sii lewli e mbeewa ladde e sii muɓɓen e hanfurde e mbaalu ladde.

⁶ Oɗon mbaawi nyaamude ndaaba fuu ngooduɗo holnyundu fecciindu de tawa na waccitoo.

⁷ Ammaa hakkunde daabaaji baccitotooɗi naa ɗi kolnyuli pecciiɗi ɗiin du, inan ɗi on njeyaa nyaamude: ngeelooba e wojere e gaynaare, sabo iɗi mbaccitoo ammaa kolnyuli majji peccaaki. Ndaardon ɗi hono ko harmani on.

⁸ Taa nyaamon ngiroowu sabo na woodi holnyundu fecciindu, ammaa waccitataako. Ndelle ndaardon ɗum wo ko harmani on. Taa nyaamon teewu daabaaji ɗiin, taa meemon caaɗɗum majji.

⁹ Hakkunde kujje buurɗe ley ndiyam fuu, inan ɗe mbaawɗon nyaamude: oɗon mbaawi nyaamude gooduɗi jinorɗe e koɓalaaje.

¹⁰ Ko walaa jinorɗe e koɓalaaje fuu, taa nyaamon teewu muuɗum. Ndaardon ɗum hono ko harmani on.

¹¹ Oɗon mbaawi nyaamude pooli laaɓuɗi fuu.

¹² Ammaa inan ɗi on njeyaa nyaamude: jigaare e dutal e ciilal maayo

¹³ e gabuure e sii ciile feere feere, e

¹⁴ daawuwal e sii muɓɓen,

¹⁵ e ndaw e ngooƴaare e sii foondu maayo manngo e goppere e sii muɓɓen,

¹⁶ e biigamiimolel e ngooƴaare mawnde e ngooƴayel daneyel,

¹⁷ e daawuwel e sii jigaaje e sii kore,

¹⁸ e waaliyal e sii kililiije e wudaawudaa e wilwilndu.

¹⁹ Menyoowel piiroowel laatiingel fuu, ndaardon ɗum hono ko harmani on. Taa nyaamon ɗum.

²⁰ Ammaa oɗon mbaawi nyaamude piiroohoy laaɓukoy fuu.

²¹ Taa nyaamon ko saaɗi. Kokkon ɗum janano jooɗiiɗo ley galluuje mooɗon naa conniron ɗum beero sabo onon wo on yimɓe seniiɓe yeeso Joomiraaɗo, Laamɗo mooɗon. Taa njongon ɓii mbeewa ley kosam innam.

Yamiroore dow jakka

²² Hitaande fuu, sey ittanon Joomiraaɗo jakka ko gese mon ndimi fuu.

²³ Njaaron ɗum yeeso Joomiraaɗo, Laamɗo mooɗon ley nokkuure nde suɓoytoo faa tabintina innde muuɗum ndeen. Wo toon nyaamoton jakka alkama e inaboojam kesam e nebbam e ko laatii awru daabaaji mon mawɗi e pamari. Noon ekitortoɗon hulude Joomiraaɗo, Laamɗo mooɗon oon haddi nguurndam mon fuu.

²⁴ Nde Joomiraaɗo, Laamɗo mooɗon barkinowi on fu, na hasii on mbaawataa ronndaade jakka mon oon faa e galluure nde suɓoytoo faa tabintina innde muuɗum ndeen sabo na woɗɗi e gure mon.

²⁵ Ndelle, connon jakka oon de njaaron buuɗi ɗiin nokkuure seniinde nde Joomiraaɗo, Laamɗo mooɗon suɓii ndeen.

²⁶ Nde njottoyɗon toon ndeen, oɗon mbaawi soodude daabaaji pamari e mawɗi e inaboojam e njaram lamminaaɗam, ko kaajaɗon fuu de nyaamon ɗum yeeso Joomiraaɗo, Laamɗo mooɗon. Ndeen ceyoɗon onon e yimɓe mon.

²⁷ Taa njeeboɗon Lewinkooɓe tawaaɓe ley galluuje mooɗon sabo ɓe ngalaa ndongu hakkunde mooɗon.

²⁸ Duuɓi tati fuu, mburtinon jakka ko gese mon ndimi ley hitaande ndeen de ndeson ɗum ley galluuje mon.

²⁹ Ndeen Lewinkooɓe ɓe ngalaa ndongu hakkunde mooɗon ɓeen e jananɓe e atiime'en e rewɓe ɓe goriraaɓe muɓɓen maayi jooɗiiɓe ley galluuje ɗeen ngaran nyaama faa kaara de Joomiraaɗo, Laamɗo mooɗon barkina golleeji mooɗon fuu.