Banndi 9 - Dewtere Laamɗo Fulfulde Burkina Faso

Noddaango hakkillo

¹ Hakkillo na nanndi e debbo darnuɗo bimmbeeje jeɗɗi, nyiɓi suudu mum.

² Ngo hirsii daabaaji, ngo hawrondirii cabijam, ngo segilake nyaamdu.

³ Ngo nelii horɓe maggo noddowa yimɓe, ngo ƴeeŋii nokkuuje huɓeere ɓurɗe toowde, ngo gooynii, ngo wi'i:

⁴ — Onon ɓe ƴoƴaa, ngaree ɗo. Ngo wi'i ɓe ngalaa ko'e:

⁵ — Ngaree nyaamee nyaamdu am, njaree cabijam ɗam kawrondirmi.

⁶ Accee puuyndam, de mbuuron, njokkon laawol paamal.

⁷ Tefoowo dartinde jalnortooɗo fooɗanan hoore mum yaweede, tindinɗo bonɗo waddanan hoore mum yennoore.

⁸ Taa felu jalnortooɗo yimɓe, o wanyete, felu jom hakkillo, o yiɗete.

⁹ Haalan jom hakkillo, o ɓeydan hakkillo makko, faamin ponnditiiɗo, o ɓeydan anndal makko.

¹⁰ Hulude Joomiraaɗo woni puɗɗam hakkillo, anndude Ceniiɗo woni paamal.

¹¹ Hakkillo kam ɓeydata nguurndam maa, ingo ɗuuɗina balɗe maa.

¹² Si a waɗii hakkillo, a waɗanii ngo hoore maa, si wo a jalnortooɗo yimɓe du, dow maaɗa pay ɗum saamata.

Noddaango puuyndam

¹³ Puuyndam na nanndi e debbo carkotooɗo, mo ƴoƴaa, mo anndaa faa'e,

¹⁴ jooɗiiɗo dammbugal suudu mum, dow nokkuure ɓurnde toowde ley huɓeere,

¹⁵ ina nodda faltotooɓe, jokkuɓe laawol muɓɓen, ina wi'a:

¹⁶ — Onon ɓe ƴoƴaa, ngaree ɗo. Imo wi'a fuuyɓe du:

¹⁷ — Ndiyam mbujjaaɗam na weli, neema nyaameteeɗo nder cuncukka na weli!

¹⁸ Tawi le ɓe anndaa ɗoon wo wuro maayɓe, naatuɗo ɗoon, naatii e laakara.