Banndi 25 - Dewtere Laamɗo Fulfulde Burkina Faso

Banndi Suleymaanu goɗɗi

¹ Inan banndi Suleymaanu ɗi yimɓe Hesekiya, kaananke Yahuudiya cottini.

² Teddeengal Laamɗo wo suuɗude kujje, Teddeengal kaananke du, yiitude ɗe.

³ Moy anndi haddu tooweefi kammu naa luggeefi leydi? Sakko ɓernde kaananke.

⁴ Ittu tuundi nder cardi, ndeen bahillo waɗiran ndi jardugal.

⁵ Ittu bonɗo yeeso kaananke, ndeen laamorde mum semmbiɗan nder fonnditaare.

⁶ Taa manu hoore maa yeeso kaananke, taa jooɗa nokku tedduɓe.

⁷ Sabo mbi'eɗaa: «Hewtu ɗo,» na ɓuri pamɗineɗaa yeeso ɓii laamu. Si gite maaɗa nji'ii goɗɗum dow goɗɗo,

⁸ taa yaawu tuumude mo, sabo noy ngattaa si o jiiɓii ma?

⁹ Si aɗa hiitodoo e neɗɗo, taa ɓanginaa sirri goɗɗo,

¹⁰ heɓa taa goɗɗo nanu ko mbi'uɗaa, de semtine. Ndeen, innde maa bonan faa abada.

¹¹ Haala kegitiika na nanndi e koɗol kaŋŋe ngol toɓɓe cardi.

¹² Jom hakkillo tindinoowo kettintooɗo na nanndi e hootonnde kaŋŋe naa peɗe kaŋŋe dimo.

¹³ No peewol weliri wakkati nguli noon nelaaɗo koolniiɗo wa'ani neluɓe ɗum, na welna ɓerɗe mawɓe mum.

¹⁴ No henndu e kammu e duule ɗe toɓaay ngorri, noon manoowo hoorem dow dokkal ngal hokkaay wa'i.

¹⁵ Gaɗuɗo munyal jaaloto kaananke, haala peewka na hela fay ƴi'al.

¹⁶ Si a heɓii njuumndi, nyaamu haddu ko heƴete, heɓa taa a yawtinowi, de tuuta.

¹⁷ Taa heewu yaade wuro gondo maa, sakko o sawte, de o wanye.

¹⁸ Ceediiɗo fewre dow goɗɗo, na nanndi e sawru e kaafaahi e kural mbelngal.

¹⁹ Hoolaade jambotooɗo nyannde bone, na nanndi e nyiinde helnde naa koyngal laƴoowal.

²⁰ Jimanoowo jom ɓernde mettunde, na nanndi e ittuɗo saaya mum jaangol hakkunde dabbunde, naa dufuɗo lammuɗam dow ɓuure.

²¹ Si ganyo ma yolbii fu, hokku ɗum nyaama, si ɗomɗii, hokku ɗum yara.

²² Si a waɗii noon, a dekii semteende dow hoore makko, Joomiraaɗo yoɓete.

²³ Hono no kammu ɓalinirta lettugal de toɓa, noon hunnduko nyo'oowo ɓawlinirta geese.

²⁴ Wuurude dow soɓɓundu suudu na ɓuri wondude e debbo kaɓeteeɗo ley mayru.

²⁵ Kabaaru belɗo ƴuwɗo leydi mboɗɗundi, wo hono ndiyam peewɗam kokkaaɗam ɗomɗuɗo.

²⁶ Ponnditiiɗo mo bonɗo wayliti hoore mum, na nanndi e feto diibiingo naa ndiyam ɓunndu nyolɗam.

²⁷ Yarde njuumndi ɗuunndi wooɗaa, noon du tefande hoorem manngu.

²⁸ Neɗɗo mo walaa nanngitaare, na nanndi e wuro ngo walaa kokuwol deenorgol.