Ayuuba 2 - Dewtere Laamɗo Fulfulde Burkina Faso

Haala Laamɗo e Ibiliisa ɗiɗaɓa dow Ayuuba

¹ Wooɗi, katin nyannde gomma du, maleyka'en Laamɗo Joomiraaɗo kawriti yeeso muuɗum, Ibiliisa du wari ley kawrital Joomiraaɗo ngaal.

² De Joomiraaɗo ƴami Ibiliisa: — Toy ƴuuruɗaa? Ibiliisa jaabii, wi'i: — Miɗo waancoo ley adunaaru, miɗo yaha nokkuuje fuu miɗo wara.

³ Ndeen Joomiraaɗo ƴami mo, wi'i: — Yalla a faamanii maccuɗo am Ayuuba naa? Mo hono muuɗum walaa ley adunaaru, wo neɗɗo laaɓuɗo, dartiiɗo, kulɗo kam, bosiiɗo ko boni fuu. Imo heddodii e laaɓal makko faa joonin, fay ko ngaɗɗaa mi halka mo ɓolum ɗuum fuu.

⁴ De Ibiliisa jaabii, wi'i: — Ay! Yonki kam yoɓata yonki! Neɗɗo hokkan ko woodi fuu faa hisina yonki muuɗum.

⁵ Ammaa si a foortii junngo maa, a meemii ɓanndu makko fu, tannyoral o wurtoto e njaayri, o huɗe.

⁶ De Joomiraaɗo wi'i mo: — Wooɗi ndelle, inani mo ley junngo maa. Ngaɗaa mo no njiɗɗaa, ammaa taa meemaa yonki makko.

⁷ Ndeen Ibiliisa dilli yeeso Joomiraaɗo, yehi wattowi nyawu ɓuuye mbonngu dow Ayuuba, ngu nanngi ɗum gilla njaaɓirdi koyɗe faa yottii hoore.

⁸ De Ayuuba hooƴi keltel heeɗoore, na nyaancoroo ɓanndu mum, ina jooɗii ley ndoondi.

⁹ Ndeen deekiiko wi'i mo: — Faa joonin aɗa heddii e laaɓal maaɗa ngaal naa? Huɗu Laamɗo de maayaa.

¹⁰ Ammaa Ayuuba wi'i mo: — Aɗa haalira hono debbo puuyɗo! Nde Laamɗo hokkunoo en ko wooɗi ndeen en njaɓii, de hokka en ko boni de caloɗen naa? E ley ɗuum fuu, Ayuuba waɗaay hakke ley haala mum.

Garol yigiraaɓe Ayuuba

¹¹ Ayuuba ina woodi yigiraaɓe tato, kam'en ngoni Elifas Teemankeejo e Bildat Suhankeejo e Sofar Naamankeejo. Nde ɓe nannoo kabaaru bone kewtuɗo Ayuuba ndeen, ɓe anniyii ɓe kawritan ɓe ngara faa ɓe njeewtida e muuɗum, ɓe mbaaltina ɓerndem. Ndeen mono e maɓɓe fuu ummii to woni.

¹² Nde ɓe njottotonoo ndeen, ɓe kaynii mo to woɗɗi de ɓe annditaay mo. Ndeen ɓe ƴepti daaɗe maɓɓe ɓe mboyri semmbe, mono e maɓɓe fuu seeki kaddule muuɗum. Ɓe nokki leydi, ɓe paɗɗi dow, ndi saami dow ko'e maɓɓe.

¹³ Ɓe njooɗodii e makko e leydi jemma e nyalooma faa waɗi balɗe jeɗɗi. Fay gooto haaldaay e makko, sabo ɓe nji'ii naawalla makko oon no foti sattude.