Ayuuba 11 - Dewtere Laamɗo Fulfulde Burkina Faso

Haala Sofar artiika: ina haani tawee Ayuuba saraama ko ɓuri noon

¹ Ndeen Sofar Naamankeejo jaabii wi'i:

² — Haalaaji ɗuuɗuɗi ɗi ngalaa jaabotooɗo ɗi naa? Waawude haala na hokka neɗɗo goonga naa?

³ Haala maa ɓola ka haɗan woɓɓe haalude naa? Ko ndufataa yawaara ɗuum, yalla fay gooto wo semtinire ɗum naa?

⁴ Aɗa wi'a ekintinol ngol kooliɗaa ngool wo goonga, a laaɓuɗo yeeso Laamɗo.

⁵ Yooyoy! Taweno Laamɗo haalan, wi'a goɗɗum dow maaɗa.

⁶ Taweno o holle paamal cuuɗiingal, sabo ngal makko waawaa fonndeede, paamaa du sariya mo Laamɗo ittani ma hewtaay hakkeeji ɗi ngaɗɗaa.

⁷ Aɗa waawi faamude haddu kujje Laamɗo cuuɗiiɗe, naa du annditaa haddu kabaaru Jom Baawɗe fuu naa?

⁸ Imo ɓuri njaayri kammu toowude. Ɗume mbaawataa waɗude? Imo ɓuri laakara luggude. Ɗume anndataa e majjum?

⁹ Njuuteefi kiin na ɓuri keerol adunaaru, njaajeefi kiin du na ɓuri maayo manngo.

¹⁰ Si o warii o nanngii neɗɗo o yaarii ɗum sariya, moy waawi haɗude mo?

¹¹ Ay, kanko koy imo anndi fewooɓe. Si o yi'ii bonandaaji, o taykataako ɗi naa?

¹² Araawa ladde kaa rimataa tomette, sakko puuyɗo laatoo jom paamal.

¹³ Si nii aan, Ayuuba, a waylitii ɓernde maaɗa, peertaa juuɗe maa de nyaagoɗaa Laamɗo,

¹⁴ si juuɗe maa ina tammbi bonandaaji, ceedaa e majji to woɗɗi, taa accu oonyaare du tawee ley wuro maa.

¹⁵ Ndeen a ɓantan hoore maa tawee feloore fuu walaa, walaa ko dimmbete, walaa du ko kulataa.

¹⁶ A yeggitan torraaji maaɗa, a miccitoto ɗi hono ndiyam ndoggoojam na faltoo.

¹⁷ Nguurndam maa yaynan faa ɓura jayngol naange, nimre laatiinde du fuu laatoto hono pooyngol.

¹⁸ Ɓernde maa waaltoto sabo aɗa woodi jikke, a reenete, a waalan ley jam.

¹⁹ A fukkoto walaa ko kulataa, ɗuuɗɓe piloto mballa to maaɗa.

²⁰ Ammaa gite bonɓe mbaatan tak, ɓe keɓataa fuu no ɓe ndaɗira. Ɓe ngalaa fuu jikke si wanaa maayde tan.