Amos 7 - Dewtere Laamɗo Fulfulde Burkina Faso

Ko Laamɗo holli Amos Holleede baɓɓatti

¹ Inan ko Laamɗo Joomiraaɗo holli kam: Imo wurtinannoo ornde baɓɓatti wakkati huɗo heso fuɗtannoo gaɗa ko kaananke wa'aantee koon.

² Wakkati baɓɓatti ɗiin timminannoo huɗo leydi ndiin mbiimi: — Laamɗo Joomiraaɗo, miɗo ŋaare njaafoɗaa. Noy Yaakuuba waawiri heddaade na darii dow? Kanko lokkaajo oo!

³ Joomiraaɗo, mimsiti de wi'i: — Ɗuum waɗataa.

Holleede yiite

⁴ Inan ko Laamɗo Joomiraaɗo holli kam: Imo gooynannoo ko o hiitorto yiite. Yiite ngeen hoortinii diyeele mawɗe de nyaami gese leydi Israa'iila.

⁵ Ndeen mbiimi: — Laamɗo Joomiraaɗo, miɗo ŋaare, ndarnaa ɗum! Noy Yaakuuba waawiri heddaade na darii dow? Kanko lokkaajo oo!

⁶ Joomiraaɗo, mimsiti de wi'i: — Ɗuum waɗataa.

Holleede njamndi teddundi

⁷ Inan ko o holli kam: Joomiraaɗo na darinoo ɗakkol kokuwol dartiingol, imo tiigii ɓoggol ponndirgol e junngo makko.

⁸ Ndeen o wi'i kam: — Ɗume nji'ataa, Amos? Njaabiimi o mbiimi: — Ɓoggol ponndirgol. Ndeen Joomiraaɗo wi'ii kam: — Mi wattan ponndirgol ngool ley Israa'iila, lenyol am ngool faa mi fonndira dartaare muuɗum, sabo ley ko warata mi accataa faa'e faltoo ɓolum.

⁹ Nokkuuje Isiyaaka cakkirɗe kalkete. Nokkuuje Israa'iila ceniiɗe laatoto bille. Mi ukkorto suudu Yerobo'am e kaafaahi.

No Amos riiwiraa Baytila

¹⁰ Ndeen Amasiya almaami wuro Baytila neli Yerobo'am, kaananke Israa'iila wi'ee: — Amos na wondi anniya umminande ma fitina hakkunde suudu Israa'iila. Yimɓe leydi ndiin mbaawaa heddaade na nana haalaaji makko ɗiin.

¹¹ Inan ko Amos oon wi'i: «Yerobo'am wardete kaafaahi, Israa'iila'en nanngete njaaree leydi mboɗɗundi.»

¹² Ndeen Amasiya wi'i Amos: — Aan ji'oowo oon, dillu ɗoo de njaha leydi Yahuuda. Toon aɗa waawi heɓirde nyaamdu e annabaaku maaɗa.

¹³ Ammaa taa hedda aɗa waɗa annabaaku ley Baytila sabo wo suudu kaananke seniindu. Wooɗi du wo nokkuure Israa'iila'en seniinde.

¹⁴ Amos jaabii Amasiya wi'i: — Miin mi wanaa annabaajo, mi wanaa ɓiyum. Miin wo mi duroowo na'i, mi demoowo leɗɗe ƴibbe.

¹⁵ Ammaa Joomiraaɗo hooƴii kam gaɗa coggal na'i de wi'ii kam: «Yahu kaaldiraa yimɓe am Israa'iila'en ɓeen e annabaaku.»

¹⁶ Ndelle joonin oo, kettinoɗaa ko Joomiraaɗo wi'i, aan biiɗo: «Taa haaldu e annabaaku ley Israa'iila, taa mbi'aa ko boni dow suudu Isiyaaka.»

¹⁷ Saabe ɗuum de inan ko Joomiraaɗo wi'i: «Deeka laatoto woykuuru ley galluure. Ɓiɓɓe maaɗa worɓe e rewɓe mbardete kaafaahi. Nokkuuje maaɗa ponndirte ɓoggol de njeɗondiree. Aan e hoore maaɗa a maayowan ley leydi heeferɓe, de Israa'iila'en nanngee njaaree faa leydi mboɗɗundi.»