2 Kaanankooɓe 24 - Dewtere Laamɗo Fulfulde Burkina Faso

¹ Ley balɗe ɗeen Nebukannejar kaananke Baabiila haɓdi e Yahuuda de dawrani Yehoyakim duuɓi tati. Caggal ɗuum Yehoyakim muurtani mo.

² Joomiraaɗo waɗi Baabiilankooɓe e Siiriyankooɓe e Mo'abinkooɓe e Amoninkooɓe koni Yahuuda faa kalka ɗum fodde konngol ngol haalirnoo e kunnduɗe annabaaɓe muuɗum.

³ Wo e yamiroore Joomiraaɗo ɗum fuu ɗum hewtorii Yahuuda faa ittee yeeso muuɗum. Ɗum fuu, ɗum waɗi saabe hakkeeji Manasa ɗiin.

⁴ Wooɗi du, wo saabe ƴiiƴam yimɓe laaɓuɓe faa heewi tatteeji Urusaliima fuu ɗaam waɗi de Joomiraaɗo salii yaafaade ɓe.

⁵ Kabaaru kaananke Yehoyakim keddiiɗo e ko waɗi fuu na winndaa ley Dewtere Kabaaruuji Kaanankooɓe Yahuuda.

⁶ O maayi, o hawritowi e maamiraaɓe makko. Ɓiyiiko Yehoyakin loomti mo laamii.

⁷ Kaananke Misira du wurtaaki leydi muuɗum katin sabo kaananke Baabiila oon teeti jeyal makko fuu gilla pogowol Misira faa yotti maayo Efrat.

No Yehoyakin laamorii Yahuuda

⁸ Nde Yehoyakin laamotonoo ndeen duuɓi muuɗum wo 18. O laamorii lebbi tati ley Urusaliima. Inniiko na wi'ee Nehusita ɓii Elnatan jeyaaɗo Urusaliima.

⁹ O waɗi ko boni yeeso Joomiraaɗo hono no baabiiko waɗirnoo noon.

No Nebukannejar nanngiri yimɓe Urusaliima

¹⁰ Wakkati oon, konunkooɓe Nebukannejar, kaananke Baabiila, ngari piilii Urusaliima.

¹¹ Nebukannejar e hoore muuɗum du yottii galluure ndeen.

¹² Ndeen Yehoyakin e innam e gollooɓe ley laamordu e mawɓe laamu e gollooɓe muuɗum heddiiɓe mburtii faa kokkita ko'e muɓɓen kaananke Baabiila oon. Kaananke oon watti ɓe ley kasu hitaande jeetataɓerde laamu muuɗum

¹³ de hooƴi jawdi ngonnoondi ley suudu Joomiraaɗo e ley laamordu fuu fodde no Joomiraaɗo wiirunoo. O taƴi kujje ɗe kaananke Suleymaana waɗirnoo kaŋŋe gonnooɗe ley suudu Joomiraaɗo fuu.

¹⁴ O nanngi yimɓe Urusaliima ardiiɓe e sordaasiiɓe e tafooɓe jamɗe e sehooɓe leɗɗe fuu, o heddaay fay gooto si wanaa yimɓe lokkaaɓe ley leydi ndiin.

¹⁵ O yaari Yehoyakin Baabiila, kam e innam e deekiraaɓe muuɗum e gollooɓe ley laamordu e hooreeɓe leydi ndiin fuu.

¹⁶ Konunkooɓe semmbiɗinɓe 7.000, tawti tafooɓe jamɗe e sehooɓe leɗɗe 1.000, ɓe fuu wo ɓe waawuɓe konu, o nanngi ɓe fuu o yaari Baabiila.

¹⁷ Ndeen Nebukadenesar hooƴi bappaanyo Yehoyakin bi'eteeɗo Mattaniya waɗi ɗum kaananke loomti Yehoyakin de wayliti innde muuɗum wi'i ɗum Sedekiya.

No Sedekiya laamorii Yahuuda

¹⁸ Nde Sedekiya laamotonoo ndeen duuɓi muuɗum wo 21. O laamorii duuɓi 11 ley Urusaliima. Inniiko na wi'ee Hamutal ɓii Yeremiya jeyaaɗo Libina.

¹⁹ O waɗi ko boni yeeso Joomiraaɗo, hono no baabiiko Yehoyakim waɗirnoo.

²⁰ Ɗum fuu ɗum hewtake Urusaliima e Yahuuda saabe tikkere Joomiraaɗo. Joomiraaɗo riiwi ɓe yeeso muuɗum. Sedekiya muurtani kaananke Baabiila.