1 Samuwiila 28 - Dewtere Laamɗo Fulfulde Burkina Faso

Haala Sawulu e debbo dabaranke

¹ Ley balɗe ɗeen yimɓe Filistiya kawrunduri sordaasiiɓe muɓɓen faa ɓe kaɓa e Israa'iila'en. Akis wi'i Daawda: — Paamaa aan e worɓe maaɗa on njaadan e am miin e sordaasiiɓe am.

² Daawda jaabii, wi'i: — Wooɗi, a faaman ko miin maccuɗo maaɗa mbaawmi waɗude. Akis jaabii, wi'i: — Wooɗi, mi waɗan faa laatoɗaa doomoowo ɓanndu am haddi nguurndam maa fuu.

³ Ayyo, Samuwiila kaa maayii, Israa'iila'en fuu mboyi mo de uwi mo wuro makko Rama. Tawi Sawulu riiwii dabarankooɓe e noddooɓe beeli maayɓe e ley Israa'iila fuu.

⁴ Filistiyankooɓe kawriti de ngari ndaaki to wuro Sunem. Wakkati oon, Sawulu du hawrunduri Israa'iila'en de ndaaki to wuro Gilbo'a.

⁵ Nde Sawulu yi'unoo sordaasiiɓe Filistiya'en ndeen o huli, ɓernde makko na diwna kulol sanne.

⁶ O ƴami Joomiraaɗo, ammaa Joomiraaɗo jaabaaki mo, jaaboraaki mo koyɗi naa cumnal almaami'en naa annabaaɓe.

⁷ Ndeen Sawulu wi'i howruuɓe muuɗum: — Pilanee kam debbo dabaranke, faa mi yaha mi ƴama mo. Ɓe mbi'i mo: — Ina woodi gooto to wuro Endoro.

⁸ Ndelle Sawulu wayliti alhaali mum, wayliti kaddulem de yaadi e worɓe ɗiɗo. Ɓe njottii to debbo oon jemma. Sawulu wi'i mo: — Ngaɗanaa kam dabare de noddaa mo inndammi.

⁹ Ammaa debbo oon jaabii, wi'i: — Hettina, aɗa anndi no Sawulu riiwiri dabarankooɓe e noddooɓe beeli maayɓe e ley leydi Israa'iila. Ko waɗi aɗa waɗa tuugol e nguurndam am faa mi maaya?

¹⁰ Sawulu kaa hunanii mo wi'i: — Mi hunorake Joomiraaɗo buurɗo, a jukkataake saabe ɗum.

¹¹ Ndeen debbo oon ƴami: — Moy njiɗɗaa mi ummina? Sawulu wi'i: — Samuwiila.

¹² Nde debbo oon yi'unoo Samuwiila ndeen, feekii faa toowi, wi'i: — Ko waɗi kiiluɗaa kam? Aan woni Sawulu!

¹³ Kaananke jaabii, wi'i: — Taa hulu. Ɗume nji'ataa? Debbo oon wi'i: — Miɗo yi'a mbeelu na ummoo e leydi.

¹⁴ Sawulu ƴami: — Noy woni alhaali maggu? O wi'i: — Gorko nayeejo na ummoo, na mojii saaya tekkuka. Ndeen Sawulu annditi wo ɗum Samuwiila, de o leeƴinii, o sujidi e leydi.

¹⁵ Samuwiila wi'i Sawulu: — Ko waɗi de umminɗaa kam, aɗa mettinana kam? Sawulu jaabii, wi'i: — Miɗo wondi e torra mawɗo. Filistiyankooɓe na kaɓa e am de Laamɗo du toowtii kam. O jaabataako kam, wanaa e annabaaɓe wanaa e koyɗi. Ndelle miɗo nodde faa kollaa kam ko njeyumi waɗude.

¹⁶ Samuwiila wi'i: — Ko waɗi aɗa ƴama kam, si Joomiraaɗo toowtii ma de laatii ganyo ma?

¹⁷ Joomiraaɗo waɗii ma ko wi'unoo e hunnduko am. Joomiraaɗo seekii laamu e ley junngo maaɗa de hokki ngu gondo maaɗa Daawda,

¹⁸ sabo a jokkaay daande Joomiraaɗo. A yowaay tikkere muuɗum mawnde dow Amalek'en. Ɗum saabii de Joomiraaɗo waɗi ma nii hannden.

¹⁹ Katin du, Joomiraaɗo wattete, aan e Israa'iila'en fuu ley juuɗe Filistiyankooɓe. Jaango du, aan e ɓiɓɓe maaɗa worɓe, on ngondan e am. Sordaasiiɓe Israa'iila du, Joomiraaɗo wattan ɓe e ley juuɗe Filistiyankooɓe.

²⁰ Wakkati gooto Sawulu saami e leydi na foortii, kulol na heewi mo saabe haalaaji Samuwiila. Semmbe makko fuu hantake, sabo o nyaamaay fay huunde nyalooma oon e jemma oon fuu.

²¹ Debbo oon wari ɗakkol Sawulu de o yi'i ɗum ina diwna kulol. O wi'i mo: — Ndaar, miin korɗo maaɗa, mi waɗi ko njamirɗaa kam. Mi farritii nguurndam am e ley ko njokkumi ko njamirɗaa kam.

²² Jonle hettindana miin korɗo maaɗa. Accaa mi hokke ko nyaametee faa keɓaa semmbe kooƴaa laawol maaɗa.

²³ O salake, o wi'i: — Mi nyaamataa. Ammaa worɓe makko e debbo oon ndunƴi mo dow majjum, de sakitii o hettindanii ɓe. O ummii e leydi de o jooɗii dow leeso.

²⁴ Debbo oon ina woodi ɓii nagge payɗo to suudu mum, de o harii o hirsi ngel. O hooƴi conndi, o diibi ɗum, o defi buuru mo walaa ko ƴuufinirtee.

²⁵ O joƴƴini ɗum yeeso Sawulu e worɓe mum de ɓe nyaami. Jemma oon ɓe ummii ɓe ndilli.