1 Samuwiila 10 - Dewtere Laamɗo Fulfulde Burkina Faso

¹ Ndeen Samuwiila hooƴi jollooru nebbam, joori ɗam e dow hoore Sawulu, muccii ɗum, wi'i: — Nii Joomiraaɗo waɗiri ma hooreejo dow lenyol muuɗum cuɓaangol. Inan maande holloore ɗum:

² Nde ndilluɗaa to am hannden fu, a hawran e worɓe ɗiɗo ɗakkol saabeere Rahiina to wuro Selsa wonngo keerol leydi Benjamin. Ɓe mbi'ete: — Araaji ɗi pilotoɗaa ɗiin njiitaama. Joonin bammaa selii miilaade ɗi, de joonin kaa wo aan haɓɓi ɗum hoore. Imo wi'a, «Noy ngaɗammi de mi faamana ɓiyam?»

³ Ndeen a yahan yeeso faa kewtaa lekki mawki ngonki wuro Tabor. A hawran e worɓe tato toon, yahooɓe wuro Baytila to nokku Laamɗo. Gooto maɓɓe ina tiigii ɓiɓɓe be'i tati, gooto buuruuje tati, gooto du sumalle cabijam.

⁴ Ɓe calminte, ɓe kokke buuruuje ɗiɗi, de njaɓaa ɗe e juuɗe maɓɓe.

⁵ Caggal ɗuum a yahan waamnde Laamɗo Gibeya to jipporde Filistiya'en woni. Nde ɓattiɗaa wuro ngoon fu, a hawran e kawrital annabaaɓe jippodotooɓe nokku toowɗo, iɓe kaalda annabaaku. Fiyooɓe kolli mawɗi e pamari, e tummbuɗe lenngoy, e cereeli, na ardii ɓe.

⁶ Ruuhu Joomiraaɗo jippoto e maa e semmbe de a haaldan annabaaku hakkunde maɓɓe, aan du a waylitoto hono wo a neɗɗo goɗɗo.

⁷ Nde maandeeji ɗiin tabiti fu, ngaɗaa ko njiɗɗaa waɗude fuu, sabo Laamɗo ina wondi e maa.

⁸ A ardoto kam wuro Gilgal. Miin yaa, mi hawran e maa, mi hirsa sadakaaji buleteeɗi e sadakaaji jeɗeteeɗi. Aan kaa keɗoɗaa balɗe jeɗɗi faa mi wara mi holle no ngaɗirtaa.

No Sawulu laatorii kaananke

⁹ Wakkati Sawulu totti faa yoppa Samuwiila ndeen, Laamɗo waylitii ɓernde muuɗum, de maandeeji ɗiin fuu laatii nyannde ndeen pay.

¹⁰ Nde ɓe njottinoo wuro Gibeya ndeen, kawrital annabaaɓe hawri e makko. Ruuhu Laamɗo wari dow Sawulu e semmbe, de o waɗi annabaaku hakkunde maɓɓe.

¹¹ Wakkati yimɓe anndunooɓe Sawulu nji'i ɗum ina haalda annabaaku hakkunde annabaaɓe ndeen, iɓe ƴamundura, «Ɗume ɓii Kis o laatii? Yalla Sawulu du ina woni ley annabaaɓe naa?»

¹² Gorko jeyaaɗo wuro ngoon jaabii, wi'i: — Moy woni baabiiɓe du? Ndelle ɗum laatake banndol: «Yalla Sawulu du ina woni ley annabaaɓe naa?»

¹³ Nde Sawulu tilinoo e annabaaku ndeen, o yehii nokku Laamɗo toowɗo oon.

¹⁴ Wooɗi, bappaanyo Sawulu yi'i ɗum, kam e maccuɗo mum. O ƴami ɗum: — Toy njahunoɗon? Sawulu jaabii, wi'i: — Araaji min pilotonoo, de wakkati min paami ɗi njiitataake oon, min njehi to Samuwiila.

¹⁵ Bappaanyo Sawulu wi'i: — Kaalanaa kam ko Samuwiila wi'i on.

¹⁶ Sawulu jaabii, wi'i: — O haalanii min faa wooɗi araaji ɗiin njiitaama. Ammaa Sawulu hollaay mo ko Samuwiila wi'i e dow laamu.

¹⁷ Samuwiila noddii yimɓe Israa'iila faa ɓe kawrita yeeso Joomiraaɗo wuro Mispa.

¹⁸ O wi'i ɓe: — Inan ko Joomiraaɗo, Laamɗo Israa'iila wi'i: «Mi wurtinii Israa'iila'en e leydi Misira, mi hisinii on e juuɗe Misirankooɓe e laamuuji torruɗi on fuu.»

¹⁹ Joonin kaa on calake Laamɗo mooɗon, kisinoowo on e baasiiji e torraaji fuu. On mbi'ii, «A'aa, Joƴƴin kaananke dow amin!» Jonle ɓattitoɗon Joomiraaɗo ley lenyi mooɗon e cuuɗi mooɗon.

²⁰ Samuwiila ɓattinii ƴuwdiiji Israa'iila fuu, de ƴuwdi Benjamin suɓaa.

²¹ O ɓattini ƴuwdi Benjamin saare saare, de saare Matari suɓaa. Sakitii Sawulu ɓii Kis suɓaa. Ammaa nde ɓe pilinoo mo ndeen, ɓe njiitaay mo.

²² Ndelle ɓe ƴami Joomiraaɗo katin: — Yalla gorko oon waraay tafon naa? Joomiraaɗo wi'i: — Inani mo, imo suuɗii hakkunde gineeji.

²³ Ɓe ndoggiri toon, ɓe ngaddi mo faa o darii hakkunde yimɓe. Hoore makko na jiimta yimɓe fuu.

²⁴ Samuwiila wi'i yimɓe fuu: — Yalla on nji'ii cuɓaaɗo Joomiraaɗo o naa? Potuɗo e makko walaa e ley yimɓe fuu! De yimɓe fuu ƴeewnii, mbi'i: — Kaananke, njuutaa balɗe!

²⁵ Samuwiila fiirtani yimɓe jamirooje laamu. O winndi ɗe e ley dewtere, de o resi nde to nokku Joomiraaɗo ceniiɗo. Ndeen o hokki mono fuu laawol hoota wuro muuɗum.

²⁶ Sawulu du hooti wuro muuɗum Gibeya, ina yaada e worɓe suusuɓe ɓe Laamɗo meemi ɓerɗe muɓɓen.

²⁷ Ammaa woɓɓe jaasuɓe kaa mbi'i: — Noy neɗɗo o waawri dannude en? Ɓe kuyfini mo, ɓe ngaddanaay mo dokke. Sawulu kaa deƴƴinii.