1 Kaanankooɓe 15 - Dewtere Laamɗo Fulfulde Burkina Faso

No Abiyam laamorii dow Yahuuda

¹ Ley hitaande sappo e jeetataɓerde laamu Yerobo'am ɓii Nebat, Abiyam laamii Yahuuda.

² O laamorii ley Urusaliima duuɓi tati. Inniiko wo Ma'aka ɓii Abisalom.

³ O jokkii hakkeeji ɗi baabiiko ngaɗannoo yeeso makko ɗiin. O yiɗiraay Joomiraaɗo, Laamɗo makko e ɓernde makko fuu hono no maamiiko Daawda noon.

⁴ Ammaa saabe Daawda de Joomiraaɗo, Laamɗo makko hokkii mo ƴuwdi njaynoori yeeso muuɗum faa abada. Joomiraaɗo hokki mo ɓiɗɗo gorko faa laamu heddo ley Urusaliima.

⁵ Sabo Daawda waɗii ko wooɗi yeeso Joomiraaɗo, o luttaay jamirooje muuɗum haddi nguurndam makko fuu, si wanaa e kabaaru Uriya Hittiyankeejo oon.

^6-7 Wolde wonnoonde hakkunde Robo'am e Yerobo'am ndeen, na heddii ley nguurndam Abiyam fuu. Kabaaru Abiyam keddiiɗo e ko waɗi fuu, na winndaa ley Dewtere Kabaaruuji Kaanankooɓe Yahuuda.

⁸ Abiyam maayi, hawritowi e maamiraaɓe muuɗum. O uwaa hakkunde muɓɓen ley Galluure maamiiko Daawda. Ɓiyiiko Asa loomti mo laamii.

No Asa laamorii dow Yahuuda

⁹ E ley hitaande noogayaɓerde laamu Yerobo'am kaananke Israa'iila, Asa laamii dow Yahuuda.

¹⁰ O laamorii duuɓi 41 ley Urusaliima. Maamiiko debbo wo Ma'aka ɓii Abisalom.

¹¹ Asa golli ko fonnditii yeeso Joomiraaɗo hono maamum Daawda.

¹² O riiwi waɗooɓe woykuuru saabe tooruuji muɓɓen ɓeen, o halki tooruuji ɗi baabiiko waɗunoo fuu.

¹³ Katin, o itti fay maamum Ma'aka e teddeengal muuɗum saabe waɗanii Asera tooru nyiddiniindu. O fusi tooru nduun o niisi ɗum de o wuli ɗum ley gooruwol Kederon.

¹⁴ Ammaa nokkuuje cakkirɗe kalkaaka. Fay e noon fuu Asa na woodi ɓernde laaɓunde yeeso Joomiraaɗo haddi nguurndam muuɗum fuu.

¹⁵ O nanni ley suudu Joomiraaɗo dokke ɗe baabiiko ceninnoo e ɗe kanko e hoore makko senini, ɗum woni kaŋŋe e cardi e kujje feere feere.

¹⁶ Wolde na woodi hakkunde Asa e Ba'asa kaananke Israa'iila haddi nguurndam maɓɓe fuu.

¹⁷ Ba'asa kaananke Israa'iila oon wari faa haɓda e Yahuuda. Ba'asa nyiɓi wuro Rama faa o haɗa yimɓe wurtaade e naatude leydi Yahuuda to Asa laamii toon.

¹⁸ Ndeen Asa hooƴi jawdi, ɗum woni cardi e kaŋŋe keddiindi ley keesuuje jawdi suudu Joomiraaɗo e ley laamordu muuɗum fuu de hokki ndi gollanooɓe muuɗum faa njaara ndi to Ben-Hadad ɓii Tabarimon, taan Hejoyon, kaananke Siiriya jooɗiiɗo Damas. O neli du oon wi'e:

¹⁹ — En ngadda amaana hono no bammaa e baaba am ngaddunoo noon. Inan kaŋŋe e cardi dokkal ngal neldumi ma. Piirtaa amaana gonɗo hakkunde maaɗa e Ba'asa kaananke Israa'iila faa dilla yoppa leydi am.

²⁰ Ben-Hadad hettindanii kaananke Asa, neli hooreeɓe sordaasiiɓe muuɗum dow galluuje Israa'iila. Ɓe njaalii Iyon e Dan e Abel-Bayti-Ma'aka e Kinaret e leydi Naftali fuu.

²¹ Nde Ba'asa faamunoo ɗum ndeen, seli semmbinɗingol galluure Rama de heddii ley Tirsa.

²² Ndeen kaananke Asa hawrondini yimɓe Yahuuda fuu, fay gooto o yoppaay. Ɓe kooƴi kaaƴe e leɗɗe ɗe kaananke Ba'asa oon nyiɓiranno wuro Rama. Ɓe nyiɓiroyɗe Geba ley leydi Benjamin e Mispa.

²³ Kabaaru Asa keddiiɗo e baawɗe muuɗum e galluuje ɗe nyiɓii e ko waɗi fuu, na winndaa ley dewtere Kabaaruuji Nyalaaɗe Kaanankooɓe Yahuuda. Wakkati naywaaku makko, koyɗe naawi mo.

²⁴ Asa maayi, hawritowi e maamiraaɓe muuɗum. O uwaa hakkunde muɓɓen ley Galluure maamiiko Daawda. Yehosafat loomti mo laamii.

No Nadab laamorii dow Israa'iila

²⁵ Ley hitaande ɗiɗaɓerde laamu Asa kaananke Yahuuda, Nadab ɓii Yerobo'am laamii Israa'iila. O laamii dow Israa'iila duuɓi ɗiɗi.

²⁶ O waɗi ko boni yeeso Joomiraaɗo, o jokki laawol baabiiko e hakke mo watti yimɓe Israa'iila oon.

²⁷ Ba'asa ɓii Ahiya mo lenyol Isakar oon, na dawra faa waɗa kaananke Nadab oon ko boni. Ba'asa wari mo ley wuro Filistiyankooɓe wi'eteengo Gibeton. Tawi wakkati oon Nadab e Israa'iila'en na piilii wuro ngoon.

²⁸ Ndelle Ba'asa wari mo ley hitaande tataɓerde laamu Asa kaananke Yahuuda, de loomti mo laamii.

²⁹ Illa puɗɗam laamu makko, o wari yimɓe lenyol Yerobo'am fuu. O heddaay fay gooto. O halki ɓe fuu faa haala ka Joomiraaɗo haalirnoo e hunnduko maccuɗo muuɗum Ahiya mo wuro Silo kaan tabita.

³⁰ Ɗum fuu ɗum waɗii sabo Yerobo'am waɗii hakke, luttini yimɓe Israa'iila du, faa ɓe naati ley hakke oon. Saabe ɗuum o umminiri tikkere Joomiraaɗo, Laamɗo Israa'iila.

³¹ Kabaaru Nadab keddiiɗo e ko waɗi fuu na winndaa ley Dewtere Kabaaruuji Kaanankooɓe Israa'iila.

³² Wolde na wonnoo hakkunde Asa e Ba'asa kaananke Israa'iila haddi nguurndam maɓɓe fuu.

No Ba'asa laamorii dow Israa'iila

³³ Ley hitaande tataɓerde laamu Asa kaananke Yahuuda, Ba'asa ɓii Ahiya laamii dow Israa'iila ley wuro Tirsa. O laamorii duuɓi 24.

³⁴ O waɗi ko boni yeeso Joomiraaɗo, o jokki laawol Yerobo'am e hakke mo wattunoo yimɓe Israa'iila oon.