1 Kaanankooɓe 12 - Dewtere Laamɗo Fulfulde Burkina Faso

Feccagol laamu Israa'iila

¹ Robo'am yehi Sikem sabo Israa'iila'en fuu na keɗinoo o toon faa ngaɗa o kaananke.

² Nde Yerobo'am ɓii Nebat nannoo ɗum fu, tawi na woni Misira to suuɗowinoo nde doggunoo kaananke Suleymaana ndeen. O warti leydi Israa'iila.

³ Ɓe nelani mo, o wardi e jamaare Israa'iila fuu. Ɓe kaaldi e Robo'am, ɓe mbi'i:

⁴ — Bammaa ronndiino min donngal teddungal, joonin le, sey koynanaa min maccungaaku teddungu ngu o tampinirannoo min nguun, kuyfinanaa min donngal teddungal ngal o ronndi min ngaal de min ɗowtane.

⁵ Robo'am jaabii ɓe wi'i: — Njehee de ngartowon caggal balɗe tati. Nii jamaa oon sankitorii.

⁶ Ndeen kaananke Robo'am filii tindinooje to mawɓe tindinannooɓe bammum Suleymaana nde wuurnoo ndeen. O ƴami ɓe o wi'i: — Tindingo ngole kokkoton kam? Ɗume haani mi jaaboo jamaa Israa'iila o?

⁷ Mawɓe ɓeen njaabii mo, mbi'i: — Si ni hannden a jaɓii laataade gollanoowo yimɓe ɓe, a jaabake ɓe haala lobba fu, ɓe laatoto gollanooɓe ma faa abada.

⁸ Ammaa Robo'am faɗɗii tindinooje ɗe mawɓe kokkunoo ɗum ɗeen, de filii tindinooje to jokolɓe banndiraaɓe muuɗum, mawnidinɓe e muuɗum.

⁹ O wi'i ɓe: — Yimɓe ɓee na mbi'a kam mi huyfinana ɗum'en donngal ngal baaba am yowunoo dow muɓɓen ngaal. Ɗume kaanumi jaabaade ɓe?

¹⁰ Ndeen jokolɓe ɓeen mbi'i mo: — Ngam yimɓe ɓeen mbi'i: «Bammaa teddini donngal amin de sanaa kuyfinanaa min ngal», inan ko njaabotoɗaa ɓe: «Honndu am famardu ndu, na ɓuri busal baaba am tekkude.

¹¹ Si baaba am yowiino dow mooɗon donngal teddungal fu, min kaa, mi ɓeydan teddeefi maggal. Si baaba am eeltiriino on dorri guri du, min kaa wo jahe eeltirammi on.»

¹² Nde balɗe tati ɗeen njottinoo fu, Yerobo'am e yimɓe ɓeen fuu ngari hono no Robo'am wiirunoo ɗum'en noon.

¹³ Kaananke Robo'am yoppi tindinooje mawɓe ɗeen de jaabii ɓe jaabagol mettungol.

¹⁴ O jaaborii ɓe no jokolɓe ɓeen tindiniri mo noon, o wi'i: — Si baaba am ronndiino on donngal teddungal fu, miin mi ɓeydan ngal. Baaba am eeltiriino on dorri guri, ammaa miin kaa jahe eeltinirammi on.

¹⁵ Ndelle Robo'am hettindanaaki yimɓe ɓeen. Nii Joomiraaɗo waylitiri ko waɗi ɗuum faa tabintina haala muuɗum ka haaldunoo Yerobo'am ɓii Nebat e hunnduko annabi Ahiya mo wuro Silo.

¹⁶ Nde Israa'iila'en fuu paamunoo kaananke hettindanaaki ɗum'en fu, njaabii, mbi'i: — Minen kaa baka amin walaa e Daawda. Ndongu walaa hakkunde amin e ɓii Yesa. En koota gure men! Accen Daawda oon haybana suudu muuɗum! Israa'iila'en ɓeen kooti gure muɓɓen.

¹⁷ Ndelle Robo'am laamii yimɓe Israa'iila wonɓe leydi Yahuuda tan.

¹⁸ O neli Adoraam, hooreejo golle tilsuɗe, to yimɓe ɓeen ammaa ɓe paɗɗi ɗum kaaƴe faa maayi. Kaananke Robo'am harii ƴeeŋi torkooru puccu muuɗum de doggiri Urusaliima.

¹⁹ Illa ndeen Israa'iila'en muurtani lenyol Daawda faa warde hannden.

²⁰ Nde yimɓe Israa'iila paamunoo gartol Yerobo'am fu, noddi ɗum kawrital, de ngaɗi ɗum kaananke dow Israa'iila fuu. Ndelle yimɓe lenyol Yahuuda tan njokki suudu Daawda.

²¹ Nde Robo'am wartunoo Urusaliima fu, hawrondini yimɓe Yahuuda e yimɓe Benjamin, konunkooɓe ujunaaje hemre e capanɗe jeetati (180.000) faa kaɓda e lenyi Israa'iila keddiiɗi ɗiin. Imo filonoo wartirde laamu dow makko kanko ɓii Suleymaana oon.

²² Ammaa konngol Laamɗo wari to Semaya nelaaɗo Laamɗo, wi'i ɗum:

²³ — Haaldu e Robo'am ɓii Suleymaana kaananke Yahuuda e yimɓe Yahuuda e Benjamin, e yimɓe heddiiɓe ɓeen fuu, mbi'aa ɓe:

²⁴ «Inan ko Joomiraaɗo wi'i: Taa kaɓde e banndiraaɓe mooɗon yimɓe Israa'iila. Mono fuu hoota wuro muuɗum, sabo huunde nde, wo to am ƴuuri.» Ɓe njaɓi haala Joomiraaɗo kaan, ɓe njeccii gure maɓɓe hono no Joomiraaɗo wi'iri ɓe noon.

No Kaananke Yerobo'am waɗiri ga'i kaŋŋe ɗiɗi

²⁵ Yerobo'am nyiɓii wuro Sikem dow baamle Efrayim de jooɗii toon. O yalti toon o nyiɓi wuro Paniyel.

²⁶ Ndeen o wi'i ley ɓernde makko: «Laamu na waawi yeccaade e lenyol Daawda.

²⁷ Si yimɓe na keddii na njaha Urusaliima faa cakkanowa Joomiraaɗo kirsamaaji ley suudu Dewal Joomiraaɗo Mawndu toon fu, ɓerɗe muɓɓen njeccoto to kaananke Robo'am. Ndeen ɓe mbara kam de ɓe njeccoo to Robo'am kaananke Yahuuda oon.»

²⁸ Yerobo'am miili e ɓernde muuɗum, waɗi nga'oy kaŋŋe ɗiɗoy de wi'i yimɓe muuɗum: — On tampii e yaade faa Urusaliima ɗowtowaade. Ndaaree, inan allaaji mooɗon burtinɗi on Misira, onon Israa'iila'en!

²⁹ O joƴƴini ngootiri dow waamnde wuro Baytila, keddiindi du, wuro Dan.

³⁰ Ɗum laati sabaabu hakke. Yimɓe na njaha ɗowtowaade faa Dan, soɓɓirre leydi ndiin.

³¹ Yerobo'am waɗi du nokkuuje cakkirɗe, suɓii almaami'en hakkunde yimɓe ɓe njeyaaka e lenyol Lewi.

³² Ley lewru jeetataɓurdu, nyalaande sappo e joyaɓerde lewru nduun, Yerobo'am waɗi iidi, iri iidi gaɗeteeɗo ley Yahuuda. O waɗi kirsamaaji dow hirsirde. Noon o waɗiri Baytila toon du, imo hirsana nga'oy koy o tafi koy kirsamaaji. Baytila toon du, o joƴƴini almaami'en saabe nokkuuje cakkirɗe ɗe o waɗi ɗeen.

³³ O ƴeeŋi dow hirsirde Baytila ndeen ley nyalaande sappo e joyaɓerde lewru jeetataɓurdu. Ndeen woni nyalaande nde o suɓii faa laatanoo yimɓe Israa'iila iidi. O wuli ure dow hirsirde ndeen.