1 Kaanankooɓe 10 - Dewtere Laamɗo Fulfulde Burkina Faso

No Laamiiɗo Seba weerdani Suleymaana

¹ Kaananke Seba debbo nani kabaaru manngu innde Suleymaana saabe innde Joomiraaɗo. O wari to muuɗum faa o ndaartindoroo ɗum ƴamɗe tiiɗɗe.

² Kaananke debbo oon wardi Urusaliima e jamaa ɗuuɗɗo, e geelooɗi dimndaaɗi urdiiji belnooji neema e kaŋŋe ɗuuɗɗo e kaaƴe dime korsuɗe. O yottii to Suleymaana, o haalani ɗum ko woni ley ɓernde makko fuu.

³ Suleymaana laaɓinani mo ko o ƴami ɗuum fuu, walaa fuu ko kaananke hunngii jaabaade.

⁴ Kaananke debbo oon yi'i anndal Suleymaana manngal ngaal e no nyiɓiri suudu muuɗum laamordu nduun,

⁵ e neemaaji dekiiɗi dow taabawal e cuuɗi howruuɓe laamu lobbi, e no gollooɓe muuɗum ɓornorii kaddule lobbe na ndarii, e hokkooɓe njaram, wooɗi du e sadakaaji buleteeɗi ɗi o waɗata ley suudu Joomiraaɗo. Ɗum fuu ɗum haayni debbo oon faa wembaa.

⁶ Ndeen o wi'i kaananke: — Ndelle kabaaru mo nanunoomi dow hakkilantaaku maaɗa e innde anndaaku ma ɗuum fuu wo goonga!

⁷ Mi jaɓaayno ɗum sanaa ko ngarumi njiirumi ɗum e gite am. Goonga du, sifa mo nannoomi oon hewtaay fay feccere ko tawumi. Anndal maa e jawdi maaɗa fuu na ɓuri ko nanumi.

⁸ Gollooɓe maaɗa e heɓooɓe ndaroo ɗakkol maaɗa kettindoo hakkilantaaku ma wakkati fuu ɓeen, wo welɓe ko'e.

⁹ Yettoore woodanii Joomiraaɗo, Laamɗo maaɗa ceyortooɗo ma de joƴƴini ma dow jooɗorgal laamu Israa'iila. Saabe njinngu ngu Laamɗo woodanii Israa'iila nguun, saabii de o waɗi ma kaananke faa caroroɗaa laaɓal e fonnditaare.

¹⁰ Ndeen o hokki kaananke Suleymaana kilooji kaŋŋe 4.000 tawti urdiiji keewɗi e kaaƴe dime korsuɗe. Caggal makko, yi'aaka hono urdiiji ɗi o hokki kaananke Suleymaana ɗiin e ɗuuɗude.

¹¹ Laanaaji ndiyam ɗi kaananke Hiram dondinooɗi kaŋŋe Ofir, ngartidi e leɗɗe bi'eteeɗe «almug» e kaaƴe korsuɗe ɗuuɗɗe.

¹² Leɗɗe ɗeen kaananke waɗiri pale suudu Joomiraaɗo e laamordu e kolli e munkaruuji yimooɓe fuu. Caggal ɗuum hono ɗeen leɗɗe nji'aaka leydi Israa'iila faa warde hannden.

¹³ Kaananke Suleymaana du, hokki kaananke debbo oon ko muuyi e ko ŋaarii fuu, tawti e dokke yardamuye ɗe o resannoo ɗum. Ndeen debbo oon e jamaare muuɗum fuu kooti leydi muɓɓen.

Jawdi kaananke Suleymaana

¹⁴ Hitaande fuu Suleymaana na heɓa kilooji kaŋŋe 23.000

¹⁵ Ɓeydi ko luumotooɓe e sonnooɓe njoɓata mo. Imo heɓa katin e lampooji kaanankooɓe Arabiya e dawrooɓe dow leyɗe Israa'iila.

¹⁶ Kaananke Suleymaana waɗiri bawaaɗe 200 kaŋŋe tappaaɗo. Wawaade fuu waɗiraa kilooji kaŋŋe jeegom.

¹⁷ O waɗi du bawaaɗe pamare 300. Gootel fuu waɗira kaŋŋe kilo gooto e feccere. O watti ɗe ley suudu wi'eteendu «Cukkuri Liban».

¹⁸ Kaananke waɗiri jooɗorgal laamu manngal e nyiiƴe nyiibi. O mooytiri ngal kaŋŋe dimo.

¹⁹ Jooɗorgal ngaal na woodi ƴeeŋirgal ngal jaaɓirɗe jeegom. Ingal waɗana ɓaarorgal tulɓal gaɗa maggal. Ngal waɗana powtinorɗe juuɗe nano e nyaamo fuu. Katin, ngal waɗana alhaali dawaaɗi ladde na ndarii senngo nyaamo e nano fuu.

²⁰ Ndelle dawaaɗi ladde 12 na ndarii dow jaaɓirɗe jeegom ɗeen, wooturu nano, wooturu nyaamo dow yaaɓirde fuu. Abada hono majjum waɗaayno e laamuuji.

²¹ Njardukoy kaananke Suleymaana fuu kaŋŋe ngaɗiraa. Gineeji gonɗi ley «Cukkuri Liban» fuu kaŋŋe ɓurɗo laaɓude ngaɗiraa. Ginewol fay gootol waɗiraaka cardi sabo ley jamaanu Suleymaana cardi teddinaakano.

²² Kaananke na woodunoo laanaaji ndiyam ɗi gollooɓe Hiram ndorbotonoo na njaha Tarsis. Duuɓi tati fuu iɗi ngartida kaŋŋe e cardi e nyiiƴe nyiibi e pooli ŋarɗuɗi.

²³ Kaananke Suleymaana laatake ɓurɗo kaanankooɓe adunaaru fuu jawdi e hakkillo.

²⁴ Yimɓe na ƴuura tatteeji adunaaru fuu, na piloo yi'ude mo faa kettindoo anndal ngal Laamɗo watti e makko.

²⁵ Garoowo fuu na warda e dokkal muuɗum: kujje gaɗiraaɗe kaŋŋe e cardi e kaddule e kaɓitirɗe e ure feere feere e pucci e araaji baaneeji. Hitaande fuu wo noon.

²⁶ Suleymaana hawrondini torkooji pucci e waɗɗotooɓe ɗi. Imo tawranoo torkooji ujune e keme nay (1.400) e waɗɗotooɓe ɗi ujunaaje sappo e ɗiɗo (12.000). O yaari woɓɓe ley gure to torkooji ɗiin ndesaa toon, woɓɓe du keddii Urusaliima ɗakkol makko.

²⁷ Kaananke hebbini cardi ley Urusaliima faa nanndi e kaaƴe dow leydi. O hebbini leɗɗe seddere du faa foti e leɗɗe bi'eteeɗe Sikomor na puɗa ley leydi leeƴundi.

²⁸ Pucci Suleymaana na ƴuurannoo leydi Misira e ndi Kewe. Luumotooɓe makko na coodowannoo ɗi Kewe.

²⁹ Torkooru leydi Misira fuu wo buuɗi cardi 600 soodetee. Puccu du, buuɗi cardi 150. Luumotooɓe kaananke ɓeen na cottirowa ɗi e kaanankooɓe Hittiyankooɓe fuu tawti kaanankooɓe Siiriya.