Zekariya 1 - Fulfulde DC Bible

Ewnaandu ngam tuubu

¹ Nder nduuɓu Dariyus laamiiɗo Persiya ɗiɗaɓu, nder lewru joweetataɓru, Jawmiraawo wolwani annabi Zekariya ɓii Berekiya, taaniraawo Iddo ni'i:

² “Min Jawmiraawo mi tikkani kaakiraaɓe mooɗon masin.

³ Wi' ɓe, ndaa ko Jawmiraawo honooɓe asama wi'i: Lorte haa am, nden min boo mi lortoto haa mooɗon.

⁴ Taa laate bana kaakiraaɓe mon. Annabi'en ɓooyma ngooynani ɓe: Ndaa nii Jawmiraawo honooɓe asama wi'i: Lorte e laabi mooɗon kalluɗi, tuube, acce kuuɗe mooɗon kalluɗe! Ammaa ɓe nanaay, ɓe kakkilanaay wolde am.

⁵ Toy kaakiraaɓe mooɗon? Annabi'en boo ɗon ngeeɗa haa foroy na?

⁶ Ammaa mi ukkani kaakiraaɓe mooɗon naalooje fodde bolle am e farillaaji am ɗum umrumi sukaaɓe am annabi'en. Nden ɓe lorti, ɓe mbi'i: Jawmiraawo honooɓe asama anninino waɗugo min fodde laabi amin e kuuɗe amin, non o waɗi boo.”

Haala pucci

⁷ Nyalaade noogas e nayaɓre nder lewru sappo e go'ooru, waato lewru Sebat, nder nduuɓu Dariyus ɗiɗaɓu dow laamu, Jawmiraawo wolwani annabi Zekariya ɓii Berekiya, taaniraawo Iddo bana ni'i:

⁸ Haŋki ngi'mi kayɗiniiɗum: Goɗɗo ba'iiɗo puccu mboɗeewu ɗon dari caka leɗɗe asuraaje nder luggere. Ɓaawo maako woodi pucci boɗeeji e puri e daneeji.

⁹ Mi ƴami malaa'ikaajo bolidanɗo bee am: “Pucci ɗi'i ɗum ɗume, barkaama?” O jaabi yam: “Mi faamtinte haala maaji.”

¹⁰ Ba'iiɗo puccu caka asuraaje go wi'i: “Wa'iiɓe ɗi ngoni ɓe Jawmiraawo neli ngam ɓe taaroya duniyaaru.”

¹¹ Ɓe mbolwani malaa'ikaajo ba'iiɗo puccu caka asuraaje go: “Min taaroyi duniyaaru fuu, ndu ɗon de'i siriw.”

¹² Nden malaa'ikaajo Jawmiraawo wi'i: “Yaa Jawmiraawo honooɓe asama, ndey enɗata Urusaliima e gure Yahuuda? A tikkani ɗe duuɓi cappanɗe joweeɗiɗi jonta.”

¹³ Jawmiraawo jaabi malaa'ikaajo bolidanɗo bee am bee bolle booɗɗe, de'itinooje.

¹⁴ Nden malaa'ikaajo oo wi'i yam: “Wooynu ni'i: Ndaa ko Jawmiraawo honooɓe asama wi'i: Mi mari yiide haajunde masin dow Urusaliima e Siyona.

¹⁵ Mi heewi tikkere dow ummaatooje koolɗiniiɗe, ngam saa'i mi tikkanino berniwol Urusaliima seɗɗa, ammaa ɗe ɓesdi sarru maagol.

¹⁶ Ngam man Jawmiraawo wi'i: Mi wartanan Urusaliima bee enɗam. Haykaliiru am nder maagol nyiɓtete, berniwol Urusaliima mahititte. Non Jawmiraawo honooɓe asama wi'i.

¹⁷ Kadiboo wooynu: Ndaa nii Jawmiraawo honooɓe asama wi'i: Berniiji am keewan kuuje booɗɗe fahin. Jawmiraawo de'itinan Siyona, o suɓan Urusaliima fahin.”