Yosuwa 8 - Fulfulde DC Bible

Gibbinki Ayu

¹ Jawmiraawo wi'i Yosuwa: “Yahdu bee honooɓe maaɗa fuu haa Ayu, Taa hul, taa tampu boo, ngam mi hokki ma laamiiɗo Ayu e yimɓe mum e berniwol mum e lesdi mum fuu.

² Waɗ Ayu e laamiiɗo maagol ko mbaɗɗa Yeriko e laamiiɗo maagol. Ammaa koo'e keɓal konu, waato jawdi e dabbaaji ngam ko'e mooɗon. Taaskitin ukkanaago berniwol bee baaltol haa ɓaawo maagol.”

³ Yosuwa e honooɓe fuu ummi, njehi, kippi Ayu. Yosuwa suɓi worɓe semmbiɗɓe ujine cappanɗe tato, neli ɓe jemma.

⁴ O wi'i ɓe: “Kakkile! Mbaɗe baaltol haa ɓaawo berniwol. Taa ndaaye ngol masin, taaskane haɓre.

⁵ Min e yimɓe wonduɓe bee am, min ɓadititto berniwol. To ɓe ngurtake dow amin bana naane, min ndoggan yeeso maɓɓe.

⁶ Ɓe taasnan min haa to min ndaayni ɓe bee berniwol. Kamɓe ɓe numan min ɗon ndogga yeeso maɓɓe bana naane.

⁷ Onon on ummoto haa ɓaawo berniwol, on koocan ngol. Allah Jawmiraawo mon hokkan on ngol.

⁸ To on kooci ngol, njamne ngol yiite, fodde umroore Jawmiraawo. Kakkilane umrooje ɗe anndinmi on!”

⁹ Bana nii Yosuwa neliri ɓe, ɓe njehi nokkuure baaltol haa hiirnaaŋge Ayu, hakkunde Ayu bee Baytila, ɓe njooɗi ton. Ammaa Yosuwa waali jemmaare man caka yimɓe.

¹⁰ Jaŋngo maajum Yosuwa dawi cub, taaskitini ummaatoore. Nden o ɗowi ɓe haa Ayu, kaŋko e ndotti'en Isra'iila.

¹¹ Honooɓe wonduɓe bee maako fuu njehi, ɓe ɓaditi berniwol, ɓe tiitotiri bee maagol. Ɓe caŋngini haa woyla Ayu, waadiwol ɗon hakkunde maɓɓe bee Ayu.

¹² Yosuwa hoo'i worɓe baakin ujine njowo, neli ɓe waɗugo baaltol haa hiirnaaŋge berniwol, hakkunde Ayu e Baytila.

¹³ Jama'aare konu saŋngini haa woyla berniwol, waɗɓe baaltol boo haa hiirnaaŋge maagol. Jemmaare maajum Yosuwa waali nder waadiwol.

¹⁴ Jaŋngo maajum fajiri cub, nde laamiiɗo Ayu yi'i Isra'iila'en, o yaawɗi wurtaago ngam haɓre, kaŋko e ummaatoore maako fuu. Ɓe njehi gal waadiwol Urdun haa nokkuure nde ɓe pottuno bee Isra'iila'en naane. Ammaa o anndaa ɓe mbaɗi baaltol haa ɓaawo berniwol.

¹⁵ Yosuwa e Isra'iila'en fuu mbaɗi dabare doggugo yeeso maɓɓe bee laawol ladde, bana ɓe jaalaaɓe.

¹⁶ Nde yimɓe nder Ayu fuu nani ewnaandu, ɓe ngurti taasnugo Isra'iila'en, walaa luttuɗo nder berniwol. Ɓe taasni Yosuwa haa ɓe ndaayi berniwol.

¹⁷ Walaa gorko mo lutti nder Ayu e Baytila. Ɓe fuu ɓe ngurti, ɓe taasni Isra'iila'en, ɓe acci dammuɗe berniwol ɗon maɓɓiti.

¹⁸ Nden Jawmiraawo wi'i Yosuwa: “Fortu labbo ma dow Ayu, mi hokki ma ngol.” Yosuwa forti labbo mum dow berniwol,

¹⁹ nde o forti juŋngo maako, yimɓe wonɓe haa baaltol boo ummi bee jaawal, nasti berniwol, kippi ngol e njamni ngol.

²⁰ Nde yimɓe Ayu ngeesiti, ɓe ngi'i cuurɗe ɗon eeŋga diga berniwol haa asama. Ɓe ngalaa laawol doggugo koo gal nyaamo malla gal nano, ngam Isra'iila'en doggunooɓe yeeso maɓɓe gal ladde, ngayliti dow maɓɓe.

²¹ Nde Yosuwa e Isra'iila'en ngi'i yimɓe baaltol kooci berniwol, cuurɗe maagol boo ɗon eeŋga haa asama, ɓe ngayliti, ɓe ukkani worɓe Ayu.

²² Isra'iila'en luttuɓe ngurti berniwol, nasti haɓre. Worɓe Ayu ɗon caka Isra'iila'en wonɓe gal bakeeje fuu. Isra'iila'en mbari ɓe ɓe fuu, walaa daɗɗo, walaa kisɗo sam.

²³ Ammaa laamiiɗo Ayu, ɓe naŋngi mo o geeto, ɓe ngaddi mo haa Yosuwa.

²⁴ Isra'iila'en mbari yimɓe Ayu fuu wonɓe nder ladde haa ɓe taasni ɓe bee kaafaaje. Nden ɓe fuu ɓe lori haa Ayu, ɓe mbari wonɓe ton fuu bee kaafaaje.

^25-26 Yosuwa ɗon forti labbo mum dow Ayu haa Isra'iila'en nattini yimɓe Ayu fuu. Nyannde maajum, limgal mbaraaɓe, worɓe e rewɓe, waɗi ujine sappo e ɗiɗo (12.000).

²⁷ Ammaa keɓal konu, waato jawdi e dabbaaji, Isra'iila'en koo'i ngal ngam ko'e muuɗum'en bana Jawmiraawo umruno Yosuwa.

²⁸ Yosuwa wuli Ayu, laatini ngol winnde haa wargo hannde e ɗum luttan haa foroy.

²⁹ O ɓili laamiiɗo Ayu dow lekki, acci mo ton haa maŋngariba. Saa'i naaŋge ɗon muta, Yosuwa umri ɓe njippina ɓanndu maako. Ɓe ngudini ndu haa dammugal berniwol, ɓe mbaagi waagaare kaa'e mawnde dow maaru. Waagaare man lutti haa wargo hannde.

Jaŋgde tawreeta haa hooseere Ebal

³⁰ Saa'i man Yosuwa mahani Jawmiraawo, Allah Isra'iila hirsirde dow hooseere Ebal,

³¹ bana Muusa, jaggiiɗo Jawmiraawo umruno Isra'iila'en, bana ko winnda haa deftere tawreeta Muusa: Hirsirde huuwraande bee kaa'e ɗe cehirɗum njamndi meemaay sam. Dow hirsirde man ɓe lii'ani Jawmiraawo guleteeɗi e kirseteeɗi ngam kawtal yimɓe bee Allah.

³² Gite Isra'iila'en, Yosuwa winndi dow kaa'e hirsirde binndi tawreeta ka Muusa winnduno.

³³ Isra'iila'en bee ndotti'en e kaliifa'en e hiitooɓe, non boo hoɗɓe maɓɓe fuu, ɓe ndari haa bakeeje sundukru ɗiɗi fuu. Ɓe tiitotiri bee liman'en Lewi'en roondooɓe sundukru alkawal Jawmiraawo. Reeta maɓɓe ɗon ndari heedi hooseere Gerisiima, reeta feere heedi hooseere Ebal. Muusa, jaggiiɗo Jawmiraawo umruno ɓe ɓooyma ɓe mbaɗa bana nii ngam barkiɗingo ummaatoore Isra'iila.

³⁴ Ɓaawoɗon Yosuwa jaŋngi bolle tawreeta fuu, barka e naaloore, bana ko winnda haa deftere tawreeta.

³⁵ Umrooje Muusa koo ɗeye, Yosuwa jaŋngi ɗe yeeso jama'aare Isra'iila, kamɓe e rewɓe maɓɓe e ɓikkoy maɓɓe e hoɗɓe jooɗiiɓe caka maɓɓe fuu.