Yonas 4 - Fulfulde DC Bible

Metteeŋga Yonas e hinnuye Allah

¹ Ammaa Yonas seyaaki, o tikki masin.

² O tori Jawmiraawo: “Ayye, yaa Jawmiraawo! Na kanjum mbi'mi, wakkati mi ɗonno haa lesdi am tawon? Ngam maajum aartumi, ndoggumi yahugo Tarsis. Mi anndi a Allah marɗo enɗam e hinnuye, mo tikkataa law, mo mbooɗeeŋga mum ɗuuɗi, mo faasititta huuwugo sarru.

³ Kadi ittu yoŋki am, yaa Jawmiraawo! Ndikkanammi maayugo dow mi yeeɗa!”

⁴ Jawmiraawo jaabi mo: “Tikkere ma fotti na?”

⁵ Nden Yonas wurti berniwol, yehi haa fuunaaŋge maagol. Ton o waɗi bukkaaru haa o jooɗo les ɗowdi maaru, o yi'a ko laatanto berniwol.

⁶ Jawmiraawo Allah fuɗni lekki kolakolaahi, ki mawni, ki waɗi ɗowdi dow hoore Yonas, ki itti metteeŋga maako. Yonas seyori lekki maajum masin.

⁷ Ammaa jaŋngo man nde weeti, Jawmiraawo umri ngilŋgu: Ngu mbari lekki man, ki yoori.

⁸ Nde naaŋge ɗon fuɗa, Jawmiraawo umri henndu fuunaaŋge wulndu. Naaŋge boo wuli dow hoore Yonas, haa o faɗɗaama, seɗɗa o yana. O ɗaɓɓi maayugo, o wi'i: “Ndikkanammi maayugo dow yeeɗugo!”

⁹ Allah ƴami Yonas: “Tikkere ma dow lekki ki fotti na?” Yonas jaabi: “Ɗum fotti mi tikka haa yotto maayde!”

¹⁰ Jawmiraawo wi'i: “An, a yurmini lekki ki a torraaki ngam maaki, a mawninaay ki boo. Ki waŋgi nder jemmaare woore, ki halki nder jemmaare woore boo.

¹¹ Kadi, min mi yurmintaa Niniwe, berniwol maŋngol na? Yimɓe ujine teemerre e noogas (120.000) ɗon nder maagol, ɓe anndaa senndindirgo juŋngo nyaamo bee juŋngo nano, non boo dabbaaji ɗuuɗɗi!”