Yo'el 4 - Fulfulde DC Bible

Kiita dow ummaatooje

¹ Jawmiraawo wi'i: “Saa'i man mi wartiran joonde Yahuuda e Urusaliima bana naane.

² Mi mooɓtan yimɓe ummaatooje fuu, mi jippina ɓe haa Waadiwol Yusafat. Mi hiitoto ɓe ton ngam daliila ummaatoore am e maral am Isra'iila. Ɓe caŋkiti Isra'iila caka ummaatooje goɗɗe, ɓe cenndi lesdi am.

³ Ɓe mbaɗi kur'u ngam anndugo mo marata ummaatoore am. Ɓe coorri derkeejo gorko ngam yoɓugo debbo daakaareejo, ɓe coorri derkeejo debbo ngam heɓugo nguykinoojam, ɓe njara ɗam.

⁴ Onon boo, Tirus e Sidon e lesɗe Filistiya fuu, ɗume on ɗaɓɓata haa am? Woodi ko ngiɗɗon waataago yam na? To non, jonta nii mi lortinan ɗum dow ko'e mooɗon.

⁵ Onon on kooci cardi am e kaŋŋeeri am, on njahri ndesaaji am ɓurɗi saman haa nder cuuɗi labbi mooɗon.

⁶ On coorri yimɓe Yahuuda e Urusaliima haa Yunaniŋke'en ngam daaynugo ɓe e lesdi maɓɓe.

⁷ Ammaa mi umminan ɓe, ɓe ngurto nokkuure nde on coorri ɓe, mi lortina kuuɗe mooɗon dow ko'e mooɗon.

⁸ Mi soorran ɓiɓɓe mon worɓe e rewɓe haa Yahuudu'en. Kamɓe boo ɓe coorra ɓe daayiiɗum haa Seba'en.” Bana non Jawmiraawo wi'i.

⁹ Ngooyne ɗum caka ummaatooje! Taaskane konu! Ewne semmbiɗɓe! Honooɓe fuu ɓadito, nasta haɓre!

¹⁰ Bee baaneeje maɓɓe ɓe tappiran kaafaaje, bee bafɗi maɓɓe boo labbe. Koo tampuɗo boo wi'a: Mi cemmbiɗɗo!

¹¹ Onon ummaatooje taariiɗe, ngare bee pargal, mooɓe! Yaa Jawmiraawo, jippin honooɓe maaɗa ton!

¹² Ummaatooje ɗe'e taasko, ngara haa Waadiwol Yusafat. Haa ton Jawmiraawo jooɗoto ngam o hiito ummaatooje taariiɗe fuu.

¹³ Halleende maɓɓe ɗuuɗi. Ngam maajum code ɓe bana no goɗɗo wa'irta alkamaari. Njaaɓe ɓe bana no goɗɗo ɓiɗɗirta inabooje nder ɓiɗɗirde heewnde, haa inaboojam rufa.

¹⁴ Ummaatooje ɗuuɗɗe ɗon haa Waadiwol kiita, ngam nyalaade Jawmiraawo ɓaditake ton.

¹⁵ Naaŋge e lewru nyiɓɓi, koode boo acci yaynugo.

¹⁶ Jawmiraawo ɗon hoola haa hooseere Siyona, ɗon telɓa haa Urusaliima. Asama e lesdi ɗon ndimmbo. Ammaa o hisrude ummaatoore maako, o nyukkorde semmbiɗnde ngam Isra'iila.

¹⁷ O wi'i: “Onon Isra'iila'en, to ɗum laatake, on anndan min woni Jawmiraawo, Allah mooɗon, jooɗiiɗo dow Siyona, hooseere am seniinde. Urusaliima laatoto berniwol cenaaŋgol, jananɓe meetataa saalaago nder maagol!”

¹⁸ Saa'i man kooseeje keewan gese inabooje, na'i ɗuuɗan dow towndiije fuu, maaje nder Yahuuda ilnan ndiyam ɗuuɗɗam, ndiyam ɓulan e suudu Jawmiraawo ngam soofnugo Waadiwol Sittim.

¹⁹ Misra laatoto yeeweende, Edoom boo laatoto ladde meere, ngam yimɓe lesɗe ɗe'e toonyi yimɓe Yahuuda, ndufi ton ƴiiƴam yimɓe ɓe ngalaa aybe.

^20-21 Jawmiraawo waatoto mbaraaɓe, o enɗataa aybuɓe. Yimɓe njooɗoto haa Yahuuda e nder Urusaliima haa foroy, Jawmiraawo boo jooɗoto dow hooseere Siyona.