Yo'el 1 - Fulfulde DC Bible

Asar garki baɓɓatti

¹ Jawmiraawo wolwani Yo'el ɓii Petuwel, wi'i:

² Onon ndotti'en, nane ko mbi'anmi! Onon jooɗiiɓe lesdi Yahuuda fuu, keɗite! Irin ɗu'um meeɗi laataago nder nyalɗe mooɗon koo nder nyalɗe kaakiraaɓe mooɗon na?

³ Ngecce ɗum ɓiɓɓe mooɗon, ɓiɓɓe mooɗon boo ngecca ɗum ɓiɓɓe muuɗum'en. Kamɓe fahin ngecca ɗum yidere warannde ɓaawoɗon.

⁴ Ko nyaamoowu acci, mbaɓɓattu nyaami ɗum. Ko mbaɓɓattu acci, ngilŋgu maagu nyaami ɗum. Ko ngilŋgu acci, ndo'u nyaami ɗum.

⁵ Onon wuykooɓe, pine, mboye! Onon yarooɓe inaboojam, mboye, ngam inaboojam kesam ittaama e kunnduɗe mooɗon!

⁶ Ummaatoore semmbiɗnde, nde walaa limgal, ukkani lesdi am. Nyii'e maare nanndi bee nyii'e barooɗe, ƴakkirɗe maare bana ɗe mbarooga ndewa.

⁷ Nde wili inabohi am, nde yewi ibbi am, nde ɓolti ki fuu, lice maaki fuu purɗi.

⁸ Onon yimɓe, sey on mboya bana derkeejo debbo ɓorniiɗo limce buhuuje boyanɗo gorum kowɗo ɗum.

⁹ Dokke nyaamdu e dokke dufeteeɗe ngoodaa haa suudu Jawmiraawo. Liman'en jagganooɓe Jawmiraawo ɗon cuno.

¹⁰ Gese mbonni, lesdi ɗon suno, alkamaari natti, inaboojam kesam e nebbam kesam boo jinni.

¹¹ Onon remooɓe, cemte! Onon remooɓe inabooje, mboye! Sa'iiruuri e alkamaari e ƴaamle gese fuu mbonni.

¹² Inabohi yoori, ibbi ɗayli, rummaanoohi e dibinoohi e lekki dimanki ɓiɓɓe belɗe e leɗɗe haa ngesa fuu njoori. Nonnon, ko seynata ɓiɓɓe Aadama, ɗayli.

¹³ Kadde limce buhuuje, mboye, onon liman'en! Uume, onon jaggiiɓe haa hirsirde Jawmiraawo! Ngare, mbaale nder mettamɓeram, onon jagganooɓe Allah am! Ngam dokke nyaamdu e dokke dufeteeɗe ngoodaa haa suudu Allah mooɗon.

¹⁴ Taaskane suumaye, ewne yimɓe ngam ɓe mooɓo, mooɓte ndotti'en e jooɗiiɓe nder lesdi fuu haa suudu Allah Jawmiraawo mooɗon, ngookane mo!

¹⁵ Nyalaade Jawmiraawo ɓaditake! Nde waran diga Allah Baawɗo bana halkere. Kayto nyalaade nde'e!

¹⁶ Nyaamdu halki yeeso meeɗen, seyo e gimi njinni nder suudu Allah meeɗen.

¹⁷ Aawre yoori haa ngesa, cigorɗi perwi, beembe ngibbinaama, ngam alkamaari ɗayli.

¹⁸ Dabbaaji ɗon mbooka. Tokke na'i ɗon ngiilo, ɗi ngalaa durduɗe. Koo tokke dammooji boo ɗon njara bone.

¹⁹ Yaa Jawmiraawo, mi ɗon toro ma, ngam yiite nyaami durduɗe nder ladde, ɗemŋgal yiite wuli leɗɗe ladde fuu.

²⁰ Koo dabbaaji ladde boo ɗon laaha heedi maaɗa, ngam maahoy ɓeeɓi, yiite nyaami durduɗe nder ladde.