Yimre Suleymaanu 1 - Fulfulde DC Bible

¹ Ndaa yimre Suleymaanu ɓurnde wooɗugo nder gime fuu.

Ngeewta hakkunde yiɗindirɓe ɗiɗo Paanyo debbo

² Hebbam kebbaaɗe bee hunnduko! Yiide ma ɓuri inaboojam welugo.

³ Uureeŋgol uurle maaɗa weli masin, innde maaɗa woni uurdi ilanndi, ngam daliila man faanyɓe fuu ngiɗi ma.

⁴ Fooɗam ɓaawo ma, njaawen bee pargal! Laamiiɗo nastini yam nder cuuɗi mum. En ngonan nder welwelo e seyo ngam barka maaɗa, en maŋgtan yiide ma ko ɓuri inaboojam. Bee daliila laaɓka rewɓe fuu ngiɗi ma.

⁵ Ndaa, mi ɓalwi, ammaa mi ŋarniiɗo boo, onon faanyɓe rewɓe nder Urusaliima fuu. Bana laymaaji haa Keedar mi ɓalwiri, bana wiirndallooji Suleymaanu mi wooɗiri.

⁶ Taa ɓalwal ɓanndu am sukla on, ɗum naaŋge ɓalwini yam! Deerɗiraaɓe am tikkani yam, ɓe ndooli yam aynugo gese inabooje, ngesa inabooje am kam, mi aynaay ka.

⁷ An mo ɓernde am yiɗi ɗum, anndinam: Toy a durata tokkere baali ma? Toy a siwtinta ɗi caka naaŋge boo? Ngam taa mi laato bana debbo nootoowo haa kommbi tokke ngorgiraaɓe ma.

Yimooɓe

⁸ To a anndaa nokkuure man sam, an boo, an mo ɓuri rewɓe fuu wooɗugo, nden kam tokka batte dammooji non, mbe'oy maaɗa ndehoy, a yahra koy durugo ton, haa nokkuure waynaaɓe fuu njooɗoto.

Sukaajo

⁹ Bee puccu ndewu haa moota Firawna, bana nii nanndinmaami, giɗaaɗo am.

¹⁰ Gole maaɗa ɗe mbooɗi bee yeri ma, non boo daande ma caka koɗoy ma.

¹¹ Sey min mbaɗane koɗel kaŋŋeeri boo, bee jaagnorɗe cardiije ngel jaagnoro.

Paanyo debbo

¹² Yaake laamiiɗo am ɗon nyaama, nardi am waɗan uureeŋgol boo.

¹³ Bana hafre baɗaadi, non giɗaaɗo am, hafre maajum ɗon waali caka enɗi am.

¹⁴ Kaŋko laati bana wukkuru pinndi nalleehi nder gese inabooje haa En-Gedi.

Sukaajo

¹⁵ An a ŋarniiɗo masin, an giɗaaɗo am, a ŋarniiɗo masin! gite maaɗa ɗon mbooɗi bana pooli.

Paanyo debbo

¹⁶ An a ŋarniiɗo, a belɗo, an giɗaaɗo am, haako hecco tan laato be'itte men.

¹⁷ Leɗɗe cemmbiɗɗe ngoni kaataakooje cuuɗi men, leɗɗe booɗɗe cuddi mahi men.